ISAIA 1
1
1Igê na buka ikê ka oga igê na maruteha iana o Isaia, karena o Amose, renirerua i Juta ma i Jerusaleme, matena ga heheuri igê o Usia, mo Jotama mo Agasi mo Hesekia, ka marungia i Juta.
God ki ramonira na kariana
2Vavearo ma na ano, mu rongo!
Mu karinga maninga,
suria na Araha ki tamasi, ki vi:
“Na kare, gê bani marupera,
manga vi inê na vaemata,
ka guguruga bâraha tangê.
3Na puruka ki girara na avanuna.
Na tonki ki girara na tavani ngêra iana.
Ma na Isiraelita ka pe girarê.
Na kariaku ka bonobonoga ngavê.”
4Isiraelita, ki page era ngavê tangagamu!
Igamu kamu ama ni tasitasi nga.
Igamu kamu erataga ma kamu aharê.
Na tasi ka higegamu ngavê.
Igamu kamu bani murisigea na Araha.
Igamu kamu bani usitenia na God iami.
5Renia ta mu ama ni guguruga nga?
Mu obania kê nikâ vari na hagaitangiha?
Na bêmi ka bani mamanu noga.
Na bunaniami ka maeha.
Na aitangihami ka pe ramo.
6Haganega i bêmi tari i ugami
ki pe apekoro rârâ tagua.
Na apemi hagenani ki mamanu,
ki babasu ma ki mamari.
Na babasumi ka nanaga, ka pe baraigi,
ma ka pe purigi renigi na meresini.
7Ga bani erasia ngavê na apanena iami,
ma ka bani hagasuhigi na hinua iami.
Mu bâsira râ na mahuara,
ga parênia na mako iami,
ma ka erasigi na ara ni marâ hato,
ka magahuru manga i Sotomo.
8Nga noga ma i Jerusaleme ki hita so,
ma na merongata ka taharia.
Ngaia ki manga na ruhu igê na pariki ni vaini,
se manga na mamaruku igê na mu ni meloni.
9Manga na Araha raramohaga hunia,
ma ke pe katora tani na enoni ke tahi,
vikê i Jerusaleme ke bani aruhu ngavê,
mangarerua i Sotomo me Gomora.
10Igamu na maneraha ma na ai ni Jerusaleme,
igamu kamu maratorata na ai ni Sotomo me Gomora.
Mu rongogi na tamasinga iana na Araha iami.
Mu karingagi na hagesuringa iana God iami.
11Ngaia ki vi: “Mu takusia vari,
vi inê kê obanigi na ara ni vogasiha hato iami,
mu ama ni nga vogasiê renigi?
Igamu kamu susu tangê renigi na sipi mane
ma na êbena na puruka binibinikaga.
Inê kê mâmâaga renigi!
I mâmâaga na obaku
renigi na gaputa na puruka mane
ma na sipi ma na goti.
12Ti ki vi tangagamu, kamu vogasiê renigi,
matena mu ahi me kamu rahesiê?
Ti ki bonasigamu, kamu râ me,
kamu arârâ purua ma
igê na mahera na Ruma ni Rotu?
13Siana kamu rahesiê
renigi na vogasiha purua ma.
Inê kê usitenigi ngavê
na siginihani na marâ, mu sungigi.
Igamu kamu hagarahasigi na Hageha Haoru
ma na Tangiani ni Mamaroha,
ma kamu hakuhaku me, kamu rahesiê.
Ma na tarani ngegana inê kê kitenigi ngavê,
suria ga era renigi na bagatarihami.
14Inê kê kitenigamu, matena mu hagahigasigi
na Hageha Haoru ma na tangiani raha ni rotu ngegana.
Igamu kamu higeê,
ma ki usi na apeku renigamu.
15Matena mu nunginungi ma kamu avarasiê,
inê kê bunigi na karingaku.
Naka ma hagehita mu avarasiê igê,
i asa hagetage be rongogamu,
suria ga gagapuga ma ka purupuruaga na rimami.
16Mu mamanu, kamu matarotaro.
Siana kamu katogi nikâ i maaku na bagatarihami.
Mu kasigi vê nga na eraha!
17Ma kamu haganega kamu paronga koro ma ototo.
Mu katogi na tarani, ga ototo.
Mu rêra pusira na enoni,
ga hagamamasiagara na enoni getera.
Mu roherohe pusira na kare banogo ma na gete na nâ.”
18Na Araha ki vi:
“Hoi, ge hagaotogi na marâ.
Naka ma igamu kamu makoraga ngavê
renigi na tasi, ga manga na mako memera,
igamu kamu page matarotaro ngavê.
Naka ma igamu kamu makoraga renigi na tasi,
ga manga na mako rotorotoaga memera,
igamu kamu page manga na gahu, i siki ahuru ngavê.
19Manga mu agana ma kamu têtê viteaku,
ki page aharêsigamu na ngauha koro.
20Ma ki manga mu ama ni guguruga ma tangê,
mu page meme igê na hearihatana.
Ngaia kani gê visia, inê na Araha.”
Na angiha renia Jerusaleme
21Evaê, na hinua i Jerusaleme,
i bani toto suriê i nago,
i ngekê ki toto surira na ataro.
Ngaia ki manga na êrâ.
I nago ngaira i ngekana ka koro ma ka oto,
ma i ngekê ngaira ka nahunahu enoni ma.
22I nago igamu na ani ni Jerusaleme,
kamu matarotaro manga na siliva,
ma i ngekê igamu kamu mangagi na marâ, ga hegahegaraga.
I nago igamu kamu manga na vaini koro,
ma i ngekê igamu kamu manga na ve purua ma.
23Na maneraha iami ka oga sutaga,
ma ka hakunira na mane hanago.
Ngaira ka vanasigi tare na haga ma na vatevate.
Ngaira ki asa, vige roherohe pusira na kare banogo,
ma ka usi, vige karinga na kotiha renira na gete na nâ.
24Tahema na Araha God raramohaga hunia,
na Isiraelita ka rahesia, ki vi:
“Inê be naka na siva tangagamu.
Inê be mangariaga tangagamu, na merongaku.
25Inê be hagaitangigamu.
Inê be hagamatarotarogamu manga na mane,
i hagamatarotarogi na aiani renia na gi,
ma be tananigamu tenigi na makoraha hato iami.
26Na maneraha iami igê na kotiha
ngaira ka page koro aporo mangara na ani i nago.
Na enoni, ga hagaotogamu,
ki hato, vige page hagabekasigamu nikâ.
Ma ka page hêtana nikâ Jerusaleme,
vi na Hinua ni Otoha ma ni Totosuriha.”
27Na otoha ki na tahingana Jerusaleme.
Na koroha ma na otoha ka na tahingata na enoni hato,
ga urisi parongata maninga.
28Ma na Araha ki page mutera ngavê
na enoni hato, ga guguruga tanga.
Ngaia ki page nahuira ka meme
na enoni hato, ga murisigea.
29Igamu kamu maki,
suria mu vogasi igê na apinige, i apuna,
ma kamu rahesira na ataro tangagi na mu iami.
30Igamu kamu manga na apinige, i maria,
se manga na mu berataga.
31Na enoni raha ka mangagi na go maria,
ma na bagatarihata ka mangagi na aegani na gi.
Na gi ki page ngaura henigi na bagaparongata,
ma ki bara ngavê, vige hunia na gi ngekana.
Currently Selected:
ISAIA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific