1. Mose 9
9
Gott sien Fräds Tieekjen
1Un Gott säajend Noah un siene Säns, un säd: Habt june Famieljes, un vemieet junt, daut de Ieed bevelkjat woat. #1Mo 1,28 2Jieda Tia oppe Ieed un jieda Voagel waut doa flicht un jieda Fesch em Wota, woat sikj fa junt schuen, un jie woaren de Macht äwa an haben. 3Jieda Sort von Tieren oppe Ieed es doa fa junt toom äten. Krakjt soo aus ekj junt daut, waut doa waust, jeef, jäw ekj junt aules. #1Mo 1,29; Kol 2,16 4Oba jie sellen nich Fleesch met daut Läwensbloot doa noch bennen äten. #3Mo 3,17; 17,10-14; 5Mo 12,23 5Wan doa een Mensch sien Läwen jenomen woat, woat doa eene Veauntwuatunk sennen. Von jieda Tia, waut eenen Mensch ombrinjt, woat waut velangt. Von jieda Mensch, dee een Menschenläwen nemt, woat sien Läwen velangt. #2Mo 21,28-29
6Wäa een Menschenläwen nemt,
däm sien Läwen saul jenomen woaren,
wiels Gott haft dän Mensch
soo aus sikj selfst jemoakt. #2Mo 21,12; 3Mo 24,17; 4Mo 35,33; Mat 26,52; Reema 13,4; Opb 13,10
7Jie sellen Kjinja haben un Grootkjinja;
got aulawäajen oppe Ieed un vemieet junt.
8Un Gott säd to Noah un siene Säns, 9Horcht emol. Ekj moak eenen Bunt met junt un june Nokomen, #1Mo 6,18 10met jieda Sort von Väajel, Vee, un Tieren oppe Ieed, dee met junt ut daut Schepp kjeemen. #Hos 2,20 11Dit es mien Bunt met junt:
Ekj woa niemols wada aulet Läwen ombrinjen met eene Äwaschwamunk.
Ekj woa nienich wada met eene Äwaschwamunk de Ieed gaunz vedoawen.
12Un Gott säd: Ekj woa dit Tieekjen jäwen, daut ekj opp emma disen Bunt jemoakt hab. De Bunt es tweschen mie un junt un june Nokomen, un aule Tieren, aules waut oppe Ieed dän läwendjen Odem haft. 13Ekj woa mienen Boagen en de Wolkjen saten fa een Tieekjen von mienen Bunt met de Ieed. 14Wan ekj woa Wolkjen brinjen, un de Boagen doa woat to seenen sennen, 15woa ekj aun dän Bunt tweschen mie un junt un aule Tieren denkjen, un daut Wota woat nienich wada eene Äwaschwamunk jäwen waut aule Menschen un Tieren ombrinjen woat. #Jes 54,7-10 16Wan de Boagen enne Wolkjen es, woa ekj dän seenen un aun dän Bunt tweschen mie un aule Menschen un Tieren, dee eenen läwendjen Odem haben, denkjen. 17Dit es daut Tieekjen von däm Bunt dän ekj met aule Menschen un Tieren oppe Ieed moak.
18Noah siene Säns dee ut daut Schepp kjeemen wieren Sem, Ham un Jafet. Ham wia de Voda to Kanaan. #1Mo 5,32 19Von dise dree Säns von Noah komen aule Menschen oppe Ieed.
20Noah wia de ieeschta waut de Ieed beoabeiden deed. Hee plaunt eenen Wiengoaden, 21un drunk Wien. Hee bedrunk sikj un lach noaktich en sien Zelt. 22Un Ham, Kanaan sien Voda, sach daut sien Voda noaktich wia un jinkj rut un säd siene Breeda daut. #2Mo 20,12; Spr 30,17 23Dan neemen Sem un Jafet eene Dakj un hilden dee jieda opp äare Schulla un jinjen äwaroasch, soo daut see äaren Voda bedakjten. See sagen am nich noaktich. 24Aus Noah dan nichta wort von däm Wien, un hieed waut sien jinjsta Sän am aunjedonen haud, 25säd hee:
Lot eenen Schoden opp Kanaan komen.
Hee woat de läachsta Deena
fa siene Breeda sennen.
26Un hee säd uk:
Mucht de Har mien Gott Sem säajnen,
un lot Kanaan een Deena fa am sennen.
27Mucht Gott Jafet siene Nokomen
loten toonämen
un en Sem siene Zelten wonen,
un lot Kanaan äa Deena sennen.
28No de Äwaschwamunk läwd Noah noch 350 Joa. 29Hee storf aus hee 950 Joa oolt wia.
Currently Selected:
1. Mose 9: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.