1. Mose 8
8
Gott jeft Noah een Vespräakjen
1Oba Gott hilt Noah un de Tieren un Vee, dee met am em Schepp wieren, em Denkj. Un Gott leet eenen Wint äwa daut Wota komen un daut Wota neem auf. 2De Kjwalen von enne Ieed un de Fenstren aum Himmel jinjen too, un de Räajen jeef no. 3Dan fa 150 Doag jinkj daut Wota emma läaja, 4bat sikj daut Schepp aun däm 17. Dach von de 7. Moonat opp eenen Boajch en de Ararat Boaj sad. #1Mo 7,11 5Daut Wota jinkj dan noch wieda rauf, bat aun däm 1. Dach von de 10. Moonat de Spetzen von de Boaj to seenen wieren.
6No noch emol 40 Doag, muak Noah daut Fensta em Schepp op, #1Mo 7,12.17 7un leet eene Krauj loos. Dee fluach han un trigj, bat daut Wota von de Ieed gaunz aufjetrocken wia. 8Dan leet hee eene Duw loos, wiels hee wull seenen auf daut Wota aufjetrocken wia, 9oba dee funk kjeene Städ, wua see sikj hansaten kunn, wiels daut Wota noch too huach wia. Un dee kjeem trigj no daut Schepp soo daut Noah siene Haunt rut stuak un ar trigj em Schepp nenn neem. 10No säwen mea Doag leet Noah noch wada de Duw loos. 11Dän Owent kjeem dee trigj met een jreenet Blaut von eenen Oliewenboom em Schnowel. Dit säd Noah, daut daut Wota aufjetrocken wia. 12Dan no noch emol säwen Doag leet hee de Duw loos, un dee kjeem dautmol nich trigj.
13Aus Noah 601 Joa oolt wia, aun däm 1. Dach von de 1. Moonat, wia daut Wota wajch von oppe Ieed. Un Noah neem daut Dak von daut Schepp rauf un kjikjt rut un sach, daut de Ieed aufdrieejen deed. #1Mo 7,11 14Aun däm 27. Dach en de 2. Moonat wia de Ieed drieech. 15Gott säd to Noah: 16Nu got ut daut Schepp rut, du un diene Fru un diene Säns un äare Frues. 17Un brinj aul de Tieren, Väajel un Kruptieren rut, daut see kjennen Junge haben un sikj oppe Ieed vemieren. 18Un Noah jinkj ut daut Schepp rut met siene Famielje. #2Pet 2,5 19Un aules waut sikj oppe Ieed bewäajd, jieda Tia, un jieda Kruptia, un jieda Voagel, emma met sient jlikjen, jinjen ut daut Schepp rut.
20Un Noah muak eenen Aultoa fa däm Harn un muak een Opfa von jieda reinet Tia un von jieda reinet Voagel. Hee vebrend dee oppem Aultoa en een Brauntopfa. #1Mo 7,2 21Aus de Har dan daut scheene Jeroch von daut Opfa rikjt, säd hee to sikj selfst: Ekj woa nienich wada de Ieed bestrofen wäajen de Menschen. Ekj weet daut von junk aun sent de Menschen äare Jedanken beese Jedanken. Ekj woa nienich wada met eenen Fluch aulet Läwen oppe Ieed ombrinjen, soo aus ekj ditmol hab. #1Mo 6,5; Hiob 14,4; Psa 14,3; Mat 15,19; Reema 3,23
22Soo lang aus de Ieed steit
woat Sodeltiet un Arnt Tiet,
kolde Tiet un heete Tiet,
Somma un Winta,
un Dach un Nacht
nich opphieren. #Jer 33,20.25
Currently Selected:
1. Mose 8: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.