1. Chronik 5
5
De Nokomen von Ruben
1Hia kjemt daut Rejista von Ruben siene Nokomen: Ruben wia de ieeschte Sän von Israel. Wiels hee oba sienen Voda siene Näbenfru nich tochjeloten haud, wort sien Ieeschtjeburtsrajcht opp Josef siene Säns äwadroacht. Un doch wort hee nich en daut Jeschlajchtsrejista aus ieeschtjebuarna Sän betieekjent, #1Mo 35,22; 49,3-4 2wan am daut Ieeschtjeburtsrajcht uk toojesproaken wia. Soo wort doch de Staum Juda majchtich mank de israelitische Stam, un eenem ut sienen Staum wort daut Kjennichsrajcht jejäft. #1Mo 49,8.10.22; 5Mo 33,7.13-17 3Ruben, däm ieeschtjebuarnen Sän von Israel, siene Säns wieren: Henoch, Palu, Hezron un Karmi. #2Mo 6,14 4Joel sien Sän wia Schemaja, un däm sien Sän wia Gog, un von däm staumd Schimi, 5un von däm Micha, un däm sien Sän wia Reaja, Reaja sien Sän wia Baal, 6un Baal sien Sän wia Beera, däm Tiglat Pileser, de Kjennich von Assierien, jefangen wajchfieed. Hee wia to dee Tiet de Staumleida em Staum Ruben. #1Chr 5,26 7Oba siene Breeda sent soo no äare Volkjsgruppen no, em Rejista oppjetieekjent worden: Jeiel, de väaschta, dan Secharja 8un Bela, Asa sien Sän un Schema sien Grootsän von Joel siene Nokomen.
Bela un siene Nokomen wonden en de Jäajent von Aroer bat Nebo un Baal Meon 9un wonden nom Oosten han bat aun de Wiltnis aum Eufrat Riefa, wiels see hauden väl Vee em Launt Gilead. 10En Saul siene Tiet kjriejden see jäajen de Hagarita, un besiejden dee un besaden dee äare Wonstäden aun de Oostjrens von Gilead.
De Nokomen von Gad
11De Nokomen von Gad wonden aunjrensent aun däm Staum Ruben en de Jäajent von Baschan bat Salcha. 12Äa väaschta wia Joel, un Schafam de tweeda, un wieda, Janai un Schafat. Un see wonden en Baschan. 13Un doatoo kjeemen noch säwen Mana met äare Volkjsgruppen: Michael, Meschullam, Scheba, Jorai, Jakan, Sia un Eber. 14See wieren de Nokomen von Abihajil, dee Huri sien Sän wia, dee Jaroach sien Sän wia, dee Gilead sien Sän wia, dee Michael sien Sän wia, dee Jeschischai sien Sän wia, dee Jachdo sien Sän wia, un dee Bus sien Sän wia. 15Ahi, Abdiel sien Sän, dee Guni sien Sän wia, wia eena von de väaschte en äare Volkjsgrupp. 16Dise wonden en Gilead, un en Baschan, un en de Städa, waut to de Jäajent jehieeden; un opp aul de Weidplaza, waut to de Launtschoft von Scharon jehieeden. 17Dise worden aula en dee Tiet oppjetieekjent aus Jotam de Kjennich en Juda, un Jerobeam de Kjennich en Israel wia. #2Kjen 15,32; 14,23
18Von de Rubenita, de Gadita un däm haulwen Staum Manasse, talden aule Mana, waut fäich wieren met Schilt, Schwieet un Flizboagen omtogonen, 44.760 Kaumf fäje Mana. 19Un see kjamften jäajen de Hagarita, Jetur, Nafisch un Nodab. 20See saden äa vetruen opp Gott un roopten am om Help aun. Un Gott erhieed an un stunt an em Kaumf bie, soo daut see de Hagarita met aul äare Helpasch toop besiejen kunnen. 21Un daut Kjrichskaptol wia: 50.000 Kameelen, 250.000 Schop, 2.000 Äsels, un doatoo noch 100.000 Mana aus Jefangne. 22Un väle von äare Jäajna wieren em Kaumf jefollen, wiels Gott de Israeliten jeholpen haud. Un see bleewen en de Jäajent wonen, bat see selfst en de Jefangenschoft wajchjefieet worden.
De Nokomen von Manasse aun de oostne Sied vom Jordan
23De haulwe Staum von Manasse oba wond en de Jäajent von Baschan bat Baal Hermon un bat Senir un bat aum Boajch Hermon. Dis Deel vom Staum Manasse wia sea groot. #5Mo 3,8-9 24De Leida von äare Volkjsgruppen wieren: Efer, Jischi, Eliel, Asriel, Jirmeja, Hodawja un Jachdiel. Dit wieren aules stoakje Kjrieja un aunjeseene Volkjsleida. 25Wiels see sikj oba aun äare Vodasch äaren Gott vesindijden un deenden de Jetta von de Urenwona, waut Gott ver de Israeliten vedräwen haud, 26stroft de Har, Israel äa Gott, an derch de Kjennichs Pull, un Tiglat Pileser von Assierien. Hee fieed de Rubenita, Gadita un dän haulwen Staum Manasse wajch, un brocht dee no Halach, aun däm Riefa Habor, un no Hara un en daut Tol von Gosan. Un doa bleewen see bat disen Dach. #2Kjen 15,19.29
De Nokomen von Levi: De Priesta äare Lienje
27Levi siene Säns wieren: Gerschon, Kehat un Merari. #1Chr 6,1 28Kehat siene Säns wieren: Amram, Jizhar, Hebron un Usiel. 29Amram siene Säns wieren: Aaron un Moses, un Mirjam wia äare Sesta. Un Aaron siene Säns wieren: Nadab, Abihu, Eleasar un Itamar. #2Mo 6,20.23; 15,20; 4Mo 26,59.60; Micha 6,4 30Eleasar haud eenen Sän Pinhas. Pinhas haud eenen Sän Abischua. 31Abischua haud eenen Sän Bukki. Bukki haud eenen Sän Usi. 32Usi haud eenen Sän Serachja. Serachja haud eenen Sän Merajot. 33Merajot haud eenen Sän Amarja. Amarja haud eenen Sän Ahitub. 34Ahitub haud eenen Sän Zadok. Zadok haud eenen Sän Ahimaaz. #2Sam 8,17; 15,27.36 35Ahimaaz haud eenen Sän Asarja. Asarja haud eenen Sän Johanan. 36Johanan haud eenen Sän Asarja. Un Asarja es dee, dee en däm Tempel, dän Salomo en Jerusalem jebut haud, Priesta wia. 37Asarja haud eenen Sän Amarja. Amarja haud eenen Sän Ahitub. 38Ahitub haud eenen Sän Zadok. Zadok haud eenen Sän Schalum. 39Schalum haud eenen Sän Hilkija. Hilkija haud eenen Sän Asarja. #2Kjen 22,4 40Asarja haud eenen Sän Seraja. Seraja haud eenen Sän Jozadak. #2Kjen 25,18; Esra 7,1; Neh 12,26 41Jozadak oba wort aus Jefangna metjenomen, aus de Har Juda un Jerusalem von Nebukadnezar jefangen wajchfieren leet. #2Kjen 25,21
Currently Selected:
1. Chronik 5: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.