2 KORINTENA 8
8
VULDA VI SA VIYNA SA HAY YERUSALEMNA
Vulda ta hiɗi firita vi ziyda-Lawna Hay Makedoniya
Rom 15:25-27; 1 Kor 16:1-4
1Ɓosiyomana, numa min ɗekgiya kay slugota ta Lawna vul mi sa tapna hay Makedoniya. 2hiɗi zumalda visi ta ŋolda pet, firita visi li ŋolo, hiɗi hawta visi ta suw petta kaw, nisi li vulda-minda ŋolo. 3Nan di goy kisi ala, nisi vul kuɗ donota visiya, awa, nisi vul suw donota visiya kaw, nisi vul kuɗ minda visiya. 4Nisi siɗawma ŋolo kay nisi min fi slugota kay tap gut kuɗ sa peldetna. 5Nisi vul ki numa var ɦawa naɗi, may nisi vul tuwsi goy jewe mi Bum-Sumuna, nisi vul tuwsi mi numa'a kaw kuɗ minda vi Lawna.
A sum sa Korintena ma li hiɗi minda kay vul kaw
6Nala numa siɗaw tam Titus kay nam ma hob vun lop ma slugo namna ma nam tunum cawam jargina. 7Nigi asawa hay slen kaf: Hay vida, hay yoboyna, hay wida, hay ciwerta kuɗ jafa' kafe, hay ti-kamda vigi kuma'a; nala nigi ma hob hiɗi lop ma slugona kayni kaw.
8Nan tun kayni kigi ki vun-ma-gatna naɗi, may nan min wak gasita vi vida vigiya hiɗi ciwerta vi segena. 9kay nigi wi slugota vi Bum-Sumuna vaya Yesu Kristu, a nam sa ma faray ŋolo, nir na'ta kep kuɗgi nigiya, nam muɗ tuwam sa ma hawna, kay hiɗi hawta valamu, nigi ma muɗ goy sum sa faraya.
10Nan vul varta vanu kay kayni, kay kayni nigi as lumu, kay mige hay jumda pa nigi si sa tun caw tar gurjut jewna, nigi si sa vi law na'ta jewna kaw. 11May wulini vatgi vun lopna namna vat, kay ki minda vigi ka kay li'e, nigi ma hob vun minda na'ta hiɗi sle ma donota vigi fumna. 12La minda kay li vulda ka'a, na' ŋaa'a hay li ma slen ka'a, may na' may ŋaaɗi hay li ma slen mayɗi.
13Nan di kayni, hiɗi varta ta hob segen may, hingi nigi vun hawt may, may naɗi. 14May kay asta visiya ma gut ŋray ca kuɗ maŋayta vigiya, kay a nigi ma li ŋray ca ki tuwgi nala. 15Ki ɗot ɗo'ay nala:
Sa ma fi slen ŋolo va hin kalamɗi,
Sa ma fi slen kiɗaya, va kiɗa kalamɗi kaw.#8:15 Ŋram hiɗi Kg 16:18.
Kay vulda ma co hay hagata va'a
16May gi deɓ mi Lawna ma vul ciwerta na'ta hay dik Titus kigi nigiya. 17Kay hiɗi firita nam hum kuɗ va ma nan dumtina. Nam min tuɗis katgiya kuɗ minda valamu kaw. 18Nan gi ɓasuyna ma tapna mara kep hiɗi namu, ɓasuyn namna sum sa tapna hay liyn arige pet di ŋaa kalamu kay lopna valamu hay labara ma firina. 19Kayni kepɗi kaw, sum sa tapna vilekem goyo kay nam ma tap kuɗma hay rogoyta kay lop ma slugo namna, ma numa ka lumu kay vul gajijita tam Bum-Sumuna, kay ɗek minda vuma' goyo kay gut segena kaw.
20Kay numa min ala nisi ma law kuɗ vulda ŋolda ta numa ka li lop ka'taɗi. 21Kay numa garam mi va ma ŋaana, may kir Bum-Sumuna kepɗi may kir sumuna kaw.
22hiɗi nisiya, numa gi ɓasuyna ma numa fum li ciwer hay slen ŋolo, may wulini nam ciwer ŋol suwa, kay nam viy ŋolo haygiya. 23May kay Titus, nam mi niranna, sa ma li lop hay baŋalanu jargiya; kay ɓosiyay segena, nisiya si sa cuki sunna vi sa viyna, nisiya gajijita vi Kristu. 24Nigi ma ɗeksi vok tapna ala nigi minsi gasiya, nigi ma ɗeksi va ma numa subur tuwma kigi vok irsina.
Currently Selected:
2 KORINTENA 8: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001