2 KORINTENA 7
7
1Nigi sa hayan kigina, kay nay fi dita-ŋaɓayta ta ki kayn nala, muzay tuway goyo kay gesna vi sliw-tuwna hiɗi gesna vi dikga kaw. Nay ma jor peldetta vaya ta-ta daba' ya'a hay narta kuɗ Lawna.
Hamda vi sa Korintena hiɗi firita vi Paulus
2Nigi ma vulma liyna hay dikgiya. Numa may li va ma joo'o tam saɗi, numa may ɓulak va vi saɗi, numa may yaw va vi saɗi kaw. 3Nan di kayni may kay ka kitat kigiɗi, may nan di jew ala: Nigi ka hay dikma'a tam irita, tam mitta kaw. 4Nan var hiɗi teŋ-irta ŋolo kigiya, nan subur tuwan ŋolo kigiya, nan hobawa hiɗi teŋ-irta kigiya, nan hobawa ŋolo hiɗi firita jar zumalda vuma kaf kaw.
5Kay hay li ma numa co Makedoniya pa, sliw-tuwma may fi tun-sukka noŋ ne'ɗi, may zumalda tara'a tara'a kaf fuma'a, duura goy jiy tuwma'a, narta hayma' kalafi kaw. 6May Lawna, nam mi ma teŋ-ir nisi sa maŋayna, nam teŋma irma'awa hiɗi cota vi Titus. 7May kuɗ cota valamu ɦawaɗi, kuɗ teŋ-irta ta nam fa' kuɗgi nigiya kaw. Nam vulma labara kay minda vigi ta ŋolda, tiyta vigiya, ciwerta vigiya kanu, ta-ta firita vanu jor ŋol suwa.
8La nan ɓulakgi dikgi hiɗi ɗerwelda van kaw, nan as gi hama mi tuwan kay kaynɗi, la nan gi hama mi tuwan kay kayn kaw -- kay nan wi ala ɗerwelda kayni ɓulakgi dikgi ir liyn neeɗa. -- 9Nan li firiya kuɗ liyn ma wulinna, may kuɗ ta nigi fi yortaɗi, may kay yorta vigiya kalgi vun hamda, kay nigi fi yorta kayni kuɗ Lawna, kay nigi may fi ɓulakka kuɗmaɗi. 10Kay na'ta, yorta ta kuɗ Lawna vuɗ hamda, ta nar tam su'da, su'da ta san as yor tuwam ka'ɗita, may yorta vi nagat vuɗ mitta. 11Lawna li lopawa hiɗi yorta ta nigi fa'ta, wulini nigi wi vuɗna va'awa tige! Suw kayni lo, nigi job hamdawa, nigi yor tuwgiyawa, nigi laawa nari, minda ŋolda kalawa hay dikgiya, nigi muɗi ciwere, vungi gatawa kaw. Nigi ɗekawa goy gasi ala lawt kayn nigi may haya'ɗi.
12La nan ɗoowa tigi nala, kayni may kuɗ sa ma li jootaɗi, kuɗ sa ma li joot talamɗi kaw, may nan ɗo tigi kayni kay ciwerta vigi kuma'a, ma ɗek goy jargi vok Lawna. 13Kay na'ta, numa fi teŋ-irtawa. May bugol kayni lo, numa li firi ŋol suwa kuɗ firita vi Titus, kay nigi sleɗem dikamay sleɗe.
14La vok iramu, nan subur tuwan neeɗa kigiya, nan may muɗ zuloɗi, may ki numa law tigiya hiɗi gasita nala, va ma numa subur tuwma kalam vok ir Titus kayni ti gasita. 15Ti-kamda valamu kigiya ka ŋolo suwa, hay li ma humam gum kay hum-vunda vigiya kuɗ (sumun) kafe, kay nigi vumu hiɗi narta hiɗi tuwgi vigi bat-bat'. 16Nan firiya kay vida van tuni kigiya hay slen kaf.
Currently Selected:
2 KORINTENA 7: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001