Miqueas 3
3
Mana allin kamachikuqkuna juzgasqa kanankumanta
1Hinaptinmi ñoqañataq kaynata nirqani:
Jacobpa mirayninpi munaychakuqkuna,
Israelpa mirayninpi kamachikuqkuna, uyariwaychik.
¿Manachum qamkunaqa allinta ruwanaykichikpaq kamachisqa kachkankichik?
2Qamkunam ichaqa alli ruwayta cheqnispa
mana allin ruwayta kuyankichik,
ovejata hinaraqmi llaqtaytapas
tullunwan qarallantaña ruwarunkichik.
3Llaqtaytam mikuypaq mikunkichik,
qaranta chustuspam tulluntapas pakinkichik,
timpuchkaq mankapaq otaq rupachkaq hornopaq
kuchupachkaq hinam parteparunkichik.
4Huk punchawmi Tayta Diosta qayakunkichik,
ichaqa manam uyarisunkichikchu.
Tukuy mana allinkunata ruwasqaykichikraykum
chay tiempopi qamkunamanta pakakurunqa.
5Llaqtanta pantayman apaq profetakunapa contranpim Tayta Dios kaynata nin:
Paykunam mikuy qoqninpaq hawkayayta profetizanku,
mana mikuy qoqninpaqñataqmi sasachakuyta.
6Chayraykum profeciapas mana kanqañachu,
revelación chaskiypas tukurunqañam.
Paykunamantaqa intipas pakakunqam,
paykunapaqqa punchawpas kanqa tutayaymi.
7Profetakunapas penqaypim tarikunqaku,
adivinaqkunapas muspaypi hinañam rimanqaku.
Tayta Diosmanta mana imatapas chaskisqankuraykum
siminkutapas wichqarunqaku.
8Ñoqam ichaqa
Tayta Diospa Espiritunwan, allin ruwayninwan,
chaynataq atiyninwan huntasqa kachkani,
Jacobpa mana kasukuyninta qawachinaypaq,
Israelta huchanmanta qaqchanaypaq.
9Jacobpa mirayninpi munaychakuqkuna,
Israelpa miraynimpi kamachikuqkunata, kayta uyariychik.
Qamkunam allin ruwayta millakunkichik,
allin kaq ruwaytañataqmi qewirunkichik.
10Sión llaqtatam yawarta chaqchuspa hatarichinkichik
Jerusalentañataqmi ñakariypa hawanpi hatarichinkichik.
11Kamachiqninkunapas pagollapaqmi kamachikunku,
sacerdotenkunapas qollqellapaqmi yachachikunku,
profetakunapas qollqellapaqmi profetizanku,
Tayta Diosman hapipakuq tukuspankum kaynata ninku:
Diosmi ñoqanchikwan kachkan,
manam ima sasachakuypas chayamuwasunchu, nispanku.
12 #
Jer 26.18. Chaynaqa, qamkunapa huchaykichikmantam
Sión llaqtapas yapusqa chakraña kanqa,
Jerusalenñataqmi soqyasqa rumillamanña tikrasqa kanqa.
Templopa kanan moqopas mana allin qorakunawanmi monteyanqa.
Currently Selected:
Miqueas 3: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012