1 Timotey 6
6
Beke hay
1Tobiyaha ndaw ma ndza hiya da beke na hay na, ka nəkafəmata ka ndaw ma wumata na hay na, ɗa andza ndaw ma ɗəmatar ndaw ahiya, ma aza ka da tsaɗama mezəley ma Bay ma Bəla, ta me tetəkey a neney zlay. 2Beke na ndaw ma wumata na hay, a pam 'ar ana hay na, ka da ləvam la hasəkadəmatara bəzay kakay zlay zləna, la ta malam ahiya zlay. Dzadzak na, ka kəmatar mber a fəna sa, hərway taya ndaw me pey 'ar ahiya, malam ma wuɗəmata na hay, ka yəmam da bəzay ma mber ata neney hayna hay.
Me pey ’ar dərka na
Nəkafa, neney na tek eɗek ma da tatəkadatara a ndaw hay andza mewey aha na. 3Kendzey ndaw a tetəkey ndaw hay ta me tetəkey mekelehe, haɗaw a dzəmam ka vaw ta mey hayna ma Bay’ərlam a lakwa Yezu Kriste kakay na, ta me tetəkey ana ka daway ka vaw ta tsəveɗ ma mey pey ’ar kakay na, 4na ŋga na na, ma wuləfa dey aha ta me ŋgelekey. Ŋga na ndaw ma sərada tek kakay ana, ndaw dzedzey aha me səpey guma so na hay, ta dzendze ma guma hay. Tek ana ŋga na na, a sadərawa na, me ney dey, dzendze, me tseɗey Bay'ərlam, me ŋgəley bəzay haya kakay ana, 5me tərey vaw ka pas ka pas da walaŋ ma ndaw ta me dzeley 'ar hay me zləgey ndaw ana hay, dərka da taya dakay, taya aŋga na a dzalam na, ma ɗamara ’ar na andza ’ar yam ma ndzafada zleley. 6Ayaw me pey 'ar na, tek me ndzefey da huɗa ɗuhwa ha, ma ndaw andza me pətey har kakay ana na. 7Akwa na, i ka zəgukwawa tek da har a bəla ɗey dakay, kəɗey satsa na, i da slafakwa ha me zəgey tek a har dakay. 8Haɗaw azlakwa tek me zəmey ta zana a rafandakwar daha na, na ŋga na na, ɗarandakwar. 9Ma ndaw me wuɗey me tərey zleley ahiya na hay na, a kəlam a gendeɗ ma me pey wuiya, a tek me sey so lamba na hay haɗadzidzay, haya kakay ana hay, a kuyadata ndaw hay a me zləgey ta me zəɗey. 10Akwa na, slasləlay ma tek a neney hay tabiyaha na, me wuɗey sumkwo. Sa ma ndaw na me səpey zleley ana hay na, ka zləgam ba dreŋ da 'ar me pey, ka slakama mezek ta ba, ta me dzeley ’ar ka tek hay haɗadzidzay.
Ma ɓada me pey 'ar hayna
11Ŋga ɗek kah ndaw ma Bay ma Bəla na, hway ba dəreŋ ka tsakay ma tek a neney hay. Səpey na dzerey, ma ɗamara ’ar aha, me pey 'ar, ma wuɗa vaw, matandəroŋ, ləfeɗeɗe. 12Kəɗey vaw na, me kəɗey vaw hayna ma me pey 'ar, hayna ha ndzafa mendzey me ndəvey kakay ana, na ma zələmaka kava na, andza na kah ma səradərawa da Guma na hayna, kah ma təɓa ka mevel da 'ar me pey ana, ka slam dey ma ndaw seydewe hay haɗadzidzay ana. 13I tsaka ka slam dey ma Bay ma Bəla na me vəley mendzey a tek hay tabiyaha na, arka ka slam dey ma Kriste Yezu na, ma kawa seydewe ka slam dey ma Pons Pilat da ma ɓada guma ma me pey 'ar hayna. 14Wafa vaw ka mey ma mewey a neney mandzara ha ŋgəsey, mandzara ka ŋgələmaka bəzay, ha kasl ka ma da ɓawa vaw ma Bay’ərlam a lakwa Yezu Kriste, 15ma da badərawa ka har ana ma tsa ha na Bay ana ŋga asləta wuiya ha na, Bay ma Bay hay, Bay’ərlam ma bay hay. 16Ŋga asləta me mətsey kakay ana. Ŋga ma ndzaha da waw me nəkey dey na ndaw a ndzafa har kakay ana. Na ndaw ɗaɗa a nəkada kakay ana, kwa ndaw a da slafa ha ma nəkada ha kakay ana. Ŋga na a wezley dey, a slafa ma kwozaha na…Amen.
Me tsey guma a 'ar a ndaw zleley ana hay
17A ndaw zleley ma bəla neney hay, ləvatar na ka da ŋgalakam zlay, ka da padama 'ar ata a zleley a neney me ndzey kakay ana zlay, amana, ka Bay ma Bəla, ŋga ndaw ma vəlandakwar zleley tabiya ha kəras kəras ana, ma lakwa ka kadakwa wuiya. 18Hayna ka kam hahaya, ka kam zleley me key tek hayna hay, ka wuradama har, ka wanəkadama andza sa ma ndaw hay. 19Kəɗey tok na, a da kwarsam zleley a vaw ta na, na mambay ana, na gədaŋ ana na, ka mey, ma aza ka da ndzafadama mendzey dərka na.
Me tsey guma a 'ar dok ana
20Ŋgey Timotey, wafa vaw ka tek ana ma pa ha da har eɗek ana. Gərada me bebəley tek so ha me zləɓey ndaw ana, ta guma ma ndaw waya la səradama tek ana hay. 21Da ma təɓama guma ma ndaw hay ma ləvam waya la səradama tek ana hayna, sa ma ndaw hay ka gəradama tsəveɗ ma 'ar me pey ba. Hayna hahaya ka ndzey ta kuray!
Currently Selected:
1 Timotey 6: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun