TUWUY 5
5
Bumbulvuŋ, mo ti ndra ng'avi ka a muŋ
1Aw Bumbulvuŋ ndra, ɓi mandilo avu ndra na, inga wulka keŋ takwa:
ani, pura taŋ mazam ndra na ayɗi!
2Hirwuy ndra a tiri ngi mulakay le,
hay ndrahay a tiram ngi mizli manja siney le.
3Pura, ndr'ani i mutuhuhoy, zlaɗ manja cine,
mumuŋ ndrahay a tiram wudigahay le.
4Yam ndra ngi si, sey i hiɗikaka ti hiɗiki,
dum ngi ɗiya vu, sey wuruk le.
5Mizli misipi ndrahay nder ndere, a pam ndra le sek a mbuŋ,
gidaŋ ndra a tiki le, ko ndr'anta musukom vu ta.
6I sukom gwat ti suk avu hirwuy Ezipte waɗ avu hirwuy Asiri,
ɓa i lumam ɗaf ngi zum ngi kiɗa ndra maya.
7Miyi ndrahay a gam mungra le: t'anta mata,
muzuɓaka zayɓi ngi malambaˀ taŋ i ndra.
8Bekehey a tiram buy ndrahay le,
ko mbur anta ngi tiɓa ndra tisi haŋ taŋ ta.
9Mufuyovuhoy a ɓuh,
ɓa i lumoko gwat ngi zumo na, a wuɗam kiɗ ndra vagay.
10Kuturkuy ndra culok kaɓa liwis,
asi may a bul vu le a hur ndra kaɓa ngi kiɗa ndra.
11A jam ngwasay a Siyoŋ ti gidaŋ ngi hin taŋ,
ar walahay ngi si ruwuy Yudeheye, a jam ziri diilihey ti gidaŋ ngi hin taŋ.
12A luwaka mizli madiɗa ngi slra ndraˀahaya a muŋ,
anta ɗuvaka hirnga neˀ le da micawwahaya mata.
13Mizli ziri ziri aruŋ, a jijiram ngurvuŋhoy ngi yiˀi,
yo ziri gawlahay a ram takay takay ti dumoy.
14Mizli micawwahaya, anta ram ar li kus ngi ngila wuyo mata,
yo ziri ziri aruŋ a taˀaka zli dimise le.
15Mumul anta a mevel ndra mata,
ɓuruk ndra a tiri tuwuy ngi vagay le.
16Loppol ngi hirnga ndra a puk le pok avra.
Aw ma, bonoy a luuma ndra le, asi i gam mungra le.
17Vurˀe, dumvu ndra gar i misi jiji,
yo hiri ndra a pur gruv gruv na vurˀe.
18Hana gar na, asi muwã Siyoŋ a tiri le daŋ daŋ,
yo a tiri li liˀi ngi biigaɗay le.
19Haˀaw Bumbulvuŋ ɗu, ka na, ka micifi buy na, i ngi wãˀa,
zumabuy ɗike, naŋ da vur dideˀ vur dideˀ.
20Ki puyuk hirnga ti ndra ngi wãˀ kwa?
Ki pula ndra mbak wãˀ hã ngi set kwa?
21Aw Bumbulvuŋ ndra, mo ti ndra ng'avi ka a muŋ, naɓa i sa moko gisiŋ gisiŋ,
tiri ti hin ngi siifa ndra nawaya nawaya a muŋ, kaɓa misi zleˀe.
22Malla ki zliɗa ndra le avra ngi wãˀ far kwa?
Ki ji mevel le wãˀ, fineˀ gidaŋ ar ndra far kwa?
Currently Selected:
TUWUY 5: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.