TUWUY 4
4
Ndaha hirnga ngi Zeruzalem, gwat mukuyta wãˀ
1ˀEy ehe! Ɓiri bara anta wucuɗ mata,
yo ɓiri tapasl tapasl pal naŋ kine a lus le!
Ɗugur muvuku vu taŋ a zliɗam hirnga purla purla,
ng'ar mazlaka jiviɗ madiɗahay gar na mbri mbri maka?
2Ziri mizile ngi Siyoŋhoy, mupuɗaw puɗaw,
kaɓa cikili ngi ɓiri tapasl tapasl pal naŋ kine tuwa,
wurenna a bam vu ati girgak ngi hohoyoy,
misi mbur mindira taŋ ti ndir mbri mbri maka?
3Ko kiriɓuhoy tekeɗe kwana, ada vulaka ɗuwa da ziri taŋhaya, a sam,
amma mizli ɗuwoyo, a tiram le i misi moˀorehey,
kaɓa maduulihey a ɓuh.
4Irne ngi ziri gazahay ara ngbˀam a balama,
asi madalyam,
ziri memeɗehey a cufuɗam ɗaf,
amma ko mbur masa taŋ di anta.
5Mizli mazumam gwat mundum ndumoy zleˀe na, a roko micam a jiviɗ madiɗahaya.
Mizli migilam ar wuya zleˀe na,
ara wunjulam gwat ngi zum ar kitikil.
6Malambaˀ ngi mizli ɗuwoy migaka na,
naŋ haɗa fineˀ malambaˀ ngi Sodom zleˀe,
Sodom a kiɗ mi a haŋhaŋ si,
manja mbur a kil widi naŋ.
7Yarma naŋhaya taŋ njezl njezl zleˀe fineˀ yama,
kuturkuy taŋhaya babara ndar fineˀ ɗuwa,
a wucuɗam deŋ fineˀ ɗugur mazilaka koray,
dimbasl ngi vu taŋhaya kaɓa ɗugur mupuɗaw ngil ngil
8Wurenna a tiram titirahay le fineˀ hilseɓe,
a jiviɗ madiɗahaya, a sinam mata,
kuturkuy cap cap ar tesle tewle,
kuturkuy muˀulo le kaɓa dum.
9Muc ti kiɗ ti maslalama zuwen,
a funa muc ti maya le,
a funa muc manja gwat ngi zumo le.
10Ti bonoy muluma mizli ɗuwoy na,
ngwas muwuɗa ziri taŋhaya,
a da ka ziri taŋhaya ti haŋ taŋ tehhe,
ziri a tiram gwat ngi zum taŋ.
11Bumbulvuŋ a ma himaˀ naŋ le ng'ar siyoŋ,
a slikiɗa mevele le,
a bul vu le ngiɗ ngiɗ,
ɓa a zuma si virzi ngi Siyoŋ ngbasl.
12Buy madiɗa ngi ruwuyoy malla mbur ar duniya misenna,
ɓa a wulkam, mbur mazlir ti mbur ta malla mesene a sa ci a hur Zeruzaleme na,
a wulkam ɗaˀ ta.
13Bonoy nah a gi gar na, asi malambaˀ ngi mijiviɗ ngi raˀahay,
yo asi mungra madiɗa ngi masay ngi raˀahay,
a kiɗaka mizli mijeŋŋeheye daˀ a hur walahay vuna.
14A ram ti liˀi kiŋkiŋ lambaˀ, kaɓa dangaray a jiviɗ madiɗahaya,
zana taŋhaya jigiɓ jigiɓ ti pumbusu,
mbak ko jiviɗ anta ngi ja haŋ avu zana taŋhaya ta.
15Da ara cohom na, mizli a wudam ar taŋ: «Kiraham! Dili!»
«Kiraham! Kiraham! Ki jaka haŋ avu taŋ ta!»
A kilam, a laˀam kiŋkiŋ lambaˀ, joˀ duniyahay a ɓam ar taŋ:
«Kay, ndr'nta tiɓaka taŋ ngi masay ndraˀahaya gu mata.»
16Bumbulvuŋ ti hirnga naŋ a zliɗa taŋ hirnga le mber mber,
naŋ anta wuɗ pur taŋ avu hiri mata.
Mizli anta sinaka masayaya kaɓa i mizli mata,
anta ɗuvam hiri ar mizli micawwahaya mata.
17Ngi ndra, gidaŋ ngi hiri ndra a tiki le,
asi i ra njaham hiri asi kila widi, amma a ndilo ta.
Ar li ngi slra ndraˀahaya, i roko kutukom
so ngi sukwi ngi mizli malaham vu gu ta.
18Mesene ndraˀahaya, a roko sesek ar sar ndra,
i bam ng'ar luuma ndraˀahaya gu mata.
Pas ngi kiɗa mi ndra gweˀe, hin ndra a ndila le muduba,
haˀaw, pas ngi kiɗa mi ndra a ndilo le.
19Misipi ndrahay nder ndere, taŋ wirwir haɗa,
kaɓa muluhoy:
ara ɓulam ndra garra a muwãhaya,
a wam vu le weˀ weˀ vur ndra a ɓuh.
20Mbur, ndra mamusuwunam vurˀe,
naŋ buy, Bumbulvuŋ muwunaŋ na,
a jakaŋ le ar butum taŋ.
Naŋ i mbur, ndra maɓam zleˀe vurˀe:
«Ndra mangiram a wuzla sukwi mekelemey na, mbele naŋ majigina ndra tuwa.»
21Kum mizli Edomoy, kum mujoasi ruwuy Us na,
mumulom, zluzluɓam!
A sa vulukukum mbaazla, kisam aya,
kisa wam duwlak duwlak, jo kisa ndiram gulndiŋ gulndiŋ kine!
22Kum mizli Siyoŋhoy, bonoy kum vur gi moˀore kum na, a kiɗ mi le muduba,
Buymisemuŋ anta sa jukum nga ruwuy mulaka mata.
Amma kum mizli Edomoyo, Buymisemuŋ a sa kutukum vur moˀore kumo:
a sa njika mungra kumoyo ngbay ar li babaraŋ.
Currently Selected:
TUWUY 4: BEGDC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.