Santiago 1
1
Uandajperakua
1Ji Santiagu, engani Diósïni ka Acha Jesukristuni jántspekuni jámka, uandajperata axakuaxaka témbeni tsimani (12) Israeliri sïrukuechani engaksï ma parhakpeni jámani jaka.
Uinhapentani enga ts'éjkunhaaka
2Erachicha, kánekua tsípe je engaksïni ts'éjkuni jauaka. 3Chájtsï mítetixaka eska chári jakajkukua ts'éjkunhaaka, ísïjtsï jurhengorheaka sánderu tekaantani. 4Ka jángorhentsï je eskaksïni chári tekantskua sési jájkuaka, eskajtsï sési míakua jukaaka, eskajtsï nómbe ma arhikua jukaaka.
5Eka cha ma ísï no xáni mímixeka, Diósïni kurhakue ka ima mímixekua kóndeati, jimboka ima iámendu ambe kánekua tsípekua jinguni íntspesïnga. 6K'óru uétarhesïndi eska kánekua mintsikaparini kurhajkorheaka, ka nósani tsimantsimaneaparini: Jimboka ima enga tsimantsimaneajka, ima ísïsti eska k'éri japunderi jenguerakua enga tarhiata axueni ka axueni kántka. 7Ima enga xáxeka, ásï ambe ma mintsikani jaue eska Acha íntskuaka; 8ne enga méntku mómuntani jarhajka, iámendu ambe jimbo tsimantsimaneani jarhasïndi.
9Ásï k'uratse engari no jatsikorheka, k'éri p'ikuarhera jimbokakini Diósï k'érikuarhu péraaka. 10Ka t'u jatsikorheri, ásï k'uratse engakini Diósï ísku nemeni exejka. Jimboka jatsikorhekua ísku k'amandeaka ísï eska tsïtsïki juátarhu anapu, 11jimboka enga uinhamu tsándeni jarhajka, tsïtsïki k'arhisïndi ka tsïpata uauarhuni ka nóteru kasïpesïndia. Jatsikorherijtu xántku ísïsï nóneuati iámendu imeri úkua ambe jinguni.
12¡Tsípe ima enga ts'éjkperatani jakujka! Jimboka enga sési uérakuaka, tsípekua méntkisï anapuni andaati, enga Diósï imechani aiakuaka engaksï xénhchajka. 13Ásï nema uande eska Diósïsï ts'éjkuni jaka enga nósesi ambe únhchani jarhajka, jimboka Diósïni, nósesi jásï no úsïnga terungutani, ka Diósïjtu nónemani terungutasïndi. 14Méntku ménderuenisti, juchachi jandiojkusï terungutakorhejka juchari ísku jánhchakua jimbo engajtsïni antsitka, ka antsitasïndijtsïni ka ísku ambemajtsïni únhchatarasïndi. 15Ísku jánhchakua, tátsekua k'amanharhintskua úkorhesïndi, ka k'amanharhintskua úkorhetinia, uarhikuesïndia.
16Jucheti erachicha engani ji xáni xénhchajka, ásï támisï jánhaska je. 17Iámendu sési jásï ambe engachi intsïnhajka, ka sési jásï ambe engachi kóndenhajka auandarhu anapuesti, Diósïjtsïnisï axachejti; ima enga jóskuechani kueraaka, ima enga no mójtakorhejka o k'umandeni nipani.
18Jimboka Diósï ísï tsípentaska, tsípekuajtsïni íntskusti uandakua jimbo enga ísïka, jimbokajtsïni ima juchantsïni sánderu urhepani pérakorheska imeri kueraakatecha jinguni.
K'uanisïndi ambakiti aiangperakuani marhuatani
19Jucheti erachicha, míani ja je: Iámenduechajtsï jinguntku jauaka kurhakuekani; ka nójtsï sóntku ambe uandakuekaaka, ka nójtsï jámaaka sóntku ikiani. 20Jimboka ne enga ikiatku jámka no úsïndi sési irekani ísï eska Diósï na uéjka. 21Ísï jimbo, jurajku je iámendu nósesi jásï ambe, ka jurajku je nósesi úkua ambe enga xáni japuka, ka kaxumbekua jinguni kurhajtsïta je imani uandakuani engaksïni Diósï intsïmpekia, jimboka ima uandakua uinhapeska ka úatiksïni p'ímutantani.
22K'óru no marhuasïndi uandakuani ísku kurhani; k'uanisïndi marhuatani, ekajtsï ísku kurhaska, ísïuati eskajtsï ambe jandiojku tandojchakorheni jarhani. 23Ima enga tsípejka uandakuantku kurharini, ka jini no ísï irekani; ima ísïsti eska ima enga eratekorhejka, 24ka enga na eratekorhejka kéndikusïndi ka mirikurhisïndi nénasï jánharhi. 25K'óru ima enga sési arhintajka ambakiti juramukuani enga p'íjpentajka, ka sési kurhanguni; ka no mirikurhini ka marhuatani ambe enga jima arhijka, ima tsípeati ísï jámatini.
26Eka nema ísï p'ikuarherani jaka eska kánekua jakajkutiska ka k'óru no p'ímukukorheni, jandiojku tandojchakorhexati ka imeri jakajkukua nósani jukaparhasti. 27Jakajkukua enga juchari Táte Diósïni jimbo jukaparhaka ka pímbinhaxeni, aristi: Jarhuataani uerandi jupindichani ka uarhiti tsîndichani engaksï kómu nitamakorheni jauaka, ka eska parhakpeni anapu nósesi jásï ambe nósani jájkuaka.
Currently Selected:
Santiago 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.