Hebreos 13
13
1Méntkisï xénhchperani ja je. 2Ásï miripakurhi je sési eropeni; ísï jámanksï ma xanhari, no jámberi míteparini ánjelichani sési eroaspti. 3Ásï mirikurhia je imechani engaksï ónhakorheni jaka, chájtu májkueni p'ikuarherani ja je eskajtsï ambe imecha jinguni márku ónhakata jarhani, imechantu ásï jurajkua je engaksï nósesi kánhka, mía je eskajtsï chájtu méni nósesi kánhaaka. 4Iámenduecha janhanharhpera je tembuchaticha, eskaksï tembuchaticha no inchaakutsperaaka; jimboka Diósï arhinharhikuauaka ísku jándichani, ka máteru néma jinguni ísku ambe úrichani. 5Ásï tumina kánhcha je; tsípe je imani jimbo eskajtsï xáni ambe jatsikorheka, jimboka ima uandaska: “Nókini méni jurajkuaka, níkini méni jurarkua.” 6Jimbochisï nósani chéparini arhiaka:
“Acharini jarhuataati; no chéaka.
¿Ambejtujtsïni úchea?”
7Míaua je imechani engaksïni urherukuchejka, imechani engaksïni Diósïri uandakuani aianguntaka ka exea je néna engaksï uarhika, chájtu májkueni jakajku je eskaksï ima. 8Jesukristu méntkisï májkueniuati, ka méntkisï ísïuati. 9Ásï jurajkutakorhe je eskaksïni máteru ambe jurhendaaka. Sánderu sésisti mintsitani kóntperakua jimbo uinhaperani, eska t'irekua jimbo uékani uinhaperani, enga nómbema marhuakuauaka imechani engaksï xáni ambe aka. 10Juchachi kéjtsïtatarakua ma jatsikorheska engaksï tátecha no újka jima arhani. 11Manakorhericheri kuiripeta engaksï k'érati tátecha tióstarhu pérka, enga k'ámanharhintskua maiampetarakueka, ekuarhuksï kurhinhantasïndi. 12Jimbosï Jesusijtu iretani kaxumberantani imeri iurhiri jimbo uérakua atanhapti uándikunhani. 13Ju je juchajtu uérani jurajkuchi juchajtu méntkueni k'uratsetanhani; 14jimbokachi ixu parhakpeni no májku k'éri iretani jatsikorheska, sánderu sánichi imanisï jirinhani jámani jaka enga jimbanhe ireteuaka. 15Ju je méntku Jesusini jimbo aiakuntani jarhani k'éri ambe arhikua. ¡Ju je juchari penchumekua jimbo k'éri ambe arhini! 16Ásï miripakurhi je sési ambe úni ka jarhojperani; Diósï indeni jásï aiatspentskuasï jaiapanhentajti. 17Kurhandirakua je chári úrhejtsïkurichani, ka iámu kurhajchaa je, jimbokaksïni ima méntku uandanheaxaka eskajtsï Diósïni aianguntaaka, eskajtsï tsípeparini uandantaaka ka no ueparini, ískuepirindia uerani jarhani. 18Arhijpechejtsïni juchantsïni, jimbokani jucha iámu ambe sési miákorhexaka úni, ka iámendu ambechi sési uékaxaka úni. 19Ka sánderu uinhamujtsïni arhijpeche eskani úaka sóntku ménderu cha jinguni jarhani.
Uandanukorhentani ka újchakuraani
20Ka eska Diósï enga sési jakueka, enga Jesusini tsítantaka, imani enga karichi Erangutika enga imeri iurhiri jimbo ts'ïrimeraka pakatperakuani, 21chánksïni iámu ambe jimbo séseraaka, ka eska juchantsïni kámaaka eska ima na uéjka, Jesukristueri jimbo enga méntkisïuaka. Ísïchi jakajkuni jauaka. 22Kómu arhixakaksïni tatecha eskajtsï íni sapichu p'imarhperatani jiókorheaka. 23Aianguxakaksïni eska erachi Timoteo jurajkunhaskia. Enga no ióndaska junguani márkuchi niuaka chánksïni exentani. 24Uandakua axakuaxaka iámendu urherukutichani ka kaxumbitichani. Italia anapuechaksïni uandakua axachexati. 25Kóntperakua cha jinguni jaue.
Currently Selected:
Hebreos 13: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.