Hebreos 5
5
1Jimbokaksï iámendu k'érati tátecha parhakpeni erakunhasïnga ka imaksï uandapetspesïndi ka imaksï iámu ireteri k'amanharhintskuechani jimbo Diósïni kéjtsïtakua ambe íntskuntasïndi. 2Ka p'amojkuasïndi imechani engaksï no mítetini ka xerejtsïtini k'amanharhintajka, jimbokaksï imajtu k'amanharhintstiska. 3Ka jimbosï jatsiti eska mámaru járhati ambe intspentaaka imeri k'ámanharhintskuechani jimbo ka iámu ireteri k'amanharhintskuechani jimbojtu. 4Ka nónema uandakorhesïndi eska ima k'éri táteuaka, imajku enga Diósï arhiaka, májkueni eska Aaronini na erakuka. 5Ka májkueni, Krístujtu no uandakorhesti eska ima k'éri tátepiringa, sánderu sáni, Diósïsï k'érikua íntskupti enga arhipka:
“Jucheti uátsïtiskari;
iásïkini tsípekua íntskuska.”#5.5 Sal 2.7.
6Ka máteru nanijtu arhisïndi:
“T'úri méntkisï táteska,
májkueni eska Melkisedeki.”
7Enga Krístu íni parhakpeni jámani jápka, uinhamu ka ueparini kómarhispti imani enga úpiringa uarhikuarhu p'ímutantani, ka Diósï kurhajchaspti jimboka kaxumbespka. 8Ka náuejki uájpepka, imani jimbo eska na kánhapka, jurhengorhespti kurhandirani; 9ka enga na iámu ambe úkorhepkia, Jesusi p'ímutantspiri úkorhesti imecheri engaksï kurhandirakujka, 10ka Diósï k'éri táteni pérasti, májkueni eska Melkisedekini.
P'ímarhperata jakajkukuani kánerani
11Inderi ambechi uánekua uandakua kámaxaka, k'óru úkua jukasti sésiksïni jánhastani, jimbokajtsï ióndasïnga kurhanguni. 12Jimbokajtsï ióniskia, jamberijtsï jurhentpiripiringia, ka chájtsï uétarhenchasïnga eskaksïni ménderu uéntaaka Diósïri uandakua uénatarakua ambe jurhendani, xántsï k'uanhatsentaska eska sapi ma enga etsukua no újka jurajkuni, ka enga nótki újka xaxani. 13Jimboka ne enga útasteru etsukua p'irani jaka, charhakuestiteru ka nótki úsïndi sési eratsekuntani. 14Ka k'ératicha k'óruksï xaxasïndia ka únksïa chuperi ambe arhani; ka engaksï xáni ióni ísï úrini jurhengorhekia erakuni ambesï sési ka ambesï nósesi.
Currently Selected:
Hebreos 5: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.