Hebreos 4
4
1Ju je Diósïni chénharhini, jimboka uandarixaka eskaksï máru imeri mintsikorhekuarhu no inchaaka, jimboka jámaaka cha ma ísï pakarakuni ka no niárani. 2Májkueni eskaksï ima, juchajtuchi jimbanhe aiangperakua ma aiangunhaska, enga úka, imechani no marhuakuasti jimbokaksï no jakajkukua jimbo májkuentatixapka imecha jinguni engaksï kurhapkia. 3Juchachi incharixakaia engachi jakajkutika, enga Diósï uandaka:
“Jimbosïni ikiatini uandaka eskaksï
mintsikorhekuarhu no inchapiringa.”
Enga úka, Diósï parhakpenini úni jámani imeri ánchekorhetani méntku k'amaraspti; 4jimboka karakatarhu mápuru jataska eska iúmu tsimani jurhia úni jámani:
“Enga na iámu ambe k'amarapkia,
iumu tsimani jurhia úni jámani,
Diósï mintsikorhespti.”
5Ka eska na uandapkia:
“Nóksï inchaati jucheti mintsikorhekuarhu.”
6Ísï jimbo, sési jánhaskatini eskaksï máru inchaaka, ka eskaksï no inchaska, urhetku aiangperakua p'iticha jimbokaksï no kurhandiraska.
7Ka Diósï máteru jurhia míndasti, enga iásïka, Dabini xáni ióni jimbo imani karakakata jimbo uandarasti enga arhijka:
“Ekajtsï iásï Diósïni
kurhajchakorheni jaka
ambe enga uandani jaka,
mintsitani ásï chúpera je.”
8Jimboka, ekaksïni Josue jiáretapiringa eskajtsï mintsikorhepiringa, Diósï tátsekua máteru jurhiatekueri ambe nóteru uandapirindia. 9Jimbo, sési kurhangukorhesti eska jakajkuticheri jimbo, k'éri mintsikorhekua janoxaka. 10Jimboka ne enga ísï mintsikorhejka eska Diósï, iámu imeri ánchekorheteri mintsikorhesïndi ka Diósïjtu mintsikorhesïndi. 11Ju je jángorhentani xásï mintsikorhekuarhu inchani, eska ísï jámani nónema imechani chúngumauaka engaksï no jakajkupka.
12Diósïri uandakua sési jimbo tsípitisti ka sési ambe úsïndi, ka sánderu uinhamu akuarhpesïndi eska náki uéjki tiámu atajpetarakua enga tsimoru uarhomujka. Jima jamberi inchakutspesïndi engaksï kurhangukua espiritu jinguni arhukurhijka, ka kutukuecharhu jamberi ka únirhu teruakuni jamberi, ka p'ikuarhenhekuechani ka eratsekuechani miiuntspeantaasïndi. 13Ima iámendu ambe exeni jarhasïndi ka nónema úsïndi jirikorhekuni; ima iámendu ambe xéntasïndi, ima engachi iámu ambe jurhimbitku aianguntaaka.
Jesusi Táta p'amojkpiristi.
14Engachi xáni k'éri tátani jatsikorheka, Jesusini, Diósï Uájpani, enga auandarhu inchaka, ju je kánekuamendu jakajkuni jarhani. 15Jimbokajtsïni juchari k'éri táta sési kurhangucheaka engachi no úni jarhajka p'íngukorheni, jimboka imajtu májkueni ts'éjkunhaska; enga úpka, ima nómeni k'ámanharhintasti. 16Ísï jimbo, ju je Diósï kóntpiriri k'éri uaxantskuarhu nósani chéparini andarhentani, eskachi kóntperata íntsïnhaaka ka eskajtsïni jarhuataaka na engachi jatini uétarhenchaaka.
Currently Selected:
Hebreos 4: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.