Hebreos 12
12
Nósesi nitamakuarhu uinhapentskua
1Jimbo, engachi xáni uáni jatsikorheaka imechani, engaksï jakajkukua xarhatani jaka, ju je k'ámanharhintskuechani ka nósesi jásï ambe uauarhekorhentani, ka ju je uinhapekua jinguni kúmani ambe engajtsïni ts'éjperakua janocheska, 2Jesusini sési erateparini, imani enga jakajkutpeni uénajka ka enga jakajkutpejka, ima enga uékaka eska krúsirhu cháparhatanhapiringa náuejki xáni k'uratsekua ambepka ka enga iásï Diósïri juramukuarhu tirerkandani uaxakatini jaka. 3Chájtu imani eranhakua p'itaku je, enga k'amanharhintstichani jimbo ísï kánhaka, ka no jámani je chkétakorheni. 4Nótkijtsï méni kuájpekorhexaka enga k'uanika iurhiri jamberi tsîtani xáni k'amanharhitskuani no jiókorheni. 5Mirikurhiskajtsïa imani engaksïni: Jucheti uátsïti arhika:
“Jucheti uátsi, ásï no jiókorhe,
Acheri jurhimberperata,
ka ásï chkétakorhe engakini xukaska.
6Jimboka Acha imanisï jurhimberajka
néni enga xénhchajka,
ka iámendu imechani
enga imeri sapini míngorheajka, ataasïndi.”#12.6 Pr 3.11-12 (gr.).
7Nósesijtsï nitamakorhexaka jimbokaksïni uéksïnga jurhimberantani. Imeri sapinksïni kámasïndi, ¿Andi náki sapi no jurhimberanhasïnki? 8Ka ekachi ambe no jurhimberanhaska, eska iámenduecha na jurhimberanhajka, arhikuekasïndi eskachi máteru uájpeska ka nóchi ima uájpeni. 9Ka támu, jatsikorheaspkachi juchari tátechani engajtsï anhanhatakua íntskuka, engajtsïni jurhimberempka, ka juchachi janhanharhiasïrempka. ¿Andi no sánderu sésiski Espirituecheri Táte auandarhu anapuni iámu kurhandirakuni, ka ísï jámani, sési irekani? 10¡Nándijtsïni ima imeri jurhengua jimbojku jurhimberempki ka enga namoni jurhiajku marhuapiringa! Ka imajtsïni juchari sési jimbosï jurhimberani jati ka eskachi juchajtu intsïmbenhaaka imeri kaxumbekua 11Ísïsti eska nóma jurhimberperakua sési p'ikuarherakorheska, sánderu sáni p'amesïndi; enga úka, tátsekua xarhakuantaasïndi sési jakua, engaksï nómbema úkorhenchaaka, imechani engaksï jurhenaaka jurhimberperakua p'irani. 12Jimbo, tarhatantsï je jájkichani engaksï andatserani jákaia, ka jauataa je jurhintskuechani engaksï xúrini jaka 13ka jurhimberantskantsï je xanharichani engaksï nósesi jándepka, eska ambakentaaka ima enga no újka xanharani, ka no sánderu kánerani p'amenchakua. 14Jángorhentsï je iámenduecha jinguni sési jarhani, ka kaxumbeni, jimboka eka no ísïuaka nónema úati Diósïni exeni. 15Exeni ja je eska nónema no jiáretanhaaka eska Diósï kóndeaka; ka eska ísï jámani, nónema sïrangua k'ameri jukaaka ka nójtu máteru nemani pájtamani. 16Eska nónema Esaueni jámaaka: Ísku jándi úkorheni, enga máxanhari t'irekua jimbojku imeri urhetikuani atarantaka. 17Míteskajtsïa enga tátsekua uékani jápkia eska újchakuranhapiringa; ka nóteru jiókorhenhania, ka no úspti mójtsïtpentani, náuejki uérani jápka. 18Chájtsï no imani ambe andarheraska enga p'ikuarherakorheka: Chpíri, pájpakandekua, kánekua pájpakandekua, akuitse janikua, 19sïuangua kúskani, ka xáni uinhachamenhani engaksï jamberi uandakorhepka eskaksï xántku uandaxemenhapiringia. 20Jimbokaksï no úsïrempka kurhandirakuni imani enga arhimpka: “Ne enga juatarhu atastaaka, ne uéjkini, náuejki manakorheri méni, tsakapkurhantsï je imani.” 21Nósesi jánhaskorhespti jimbosï Moisesi jamberi uandapti: “Manaraxaka xáni chéni.” 22Ka jimini ménderueni, chájtsï andarheraska Sióni juatani, enga Diósïri tsípitiri k'éri ireteka, auandarhu anapu Jerusalenini ka exeaskajtsï uánekua ánjelichani engaksï tángorhentatini jaka Diósïni k'éri ambe arhini, 23ka imechani exeani, uájpa urhetichani, ka Diósïni enga iápuru ísï arhinharhikpirika ka kaxumbiticheri espirituni engaksï niántakia, 24ka Jesusini, enga jimbanhe pakatperakueri maiampetspitika ka iurhirini engachi jimbo iámu p'imbinhajkunhantaaka enga Abeliri iurhiri jinguni sánderu ambakitika. 25Ásï jáma je no kurhakuni imani engaksïni uandajpani jaka; nándiksï imajtu no úia andi uérakuani engaksï no jiókorheka eska parhakpeni anapu arhijkutaauaka; juchachi sánderu no úaka ekachi no kurhaska imani egajtsïni auandarhu uératini uandajpani jaka. 26Jiájkani imeri uandakua eratsetarpentaspti. Ka iásïjtsïni arisï aiachexati: “Ménderu uéntaaka jencherani ka nóteru echerirhuterkia; auandantuni jencheraaka.” 27Enga arhijka “Ménderu,” arhini. Arhikuekaxati eska manatanhaaka ima ambe enga úkateka, jimboka úkateska, ka eska ísï jámani méntkisï jauaka ima ambe enga no úkateka. 28Jimbochisï jucha engachi p'ikaia irechekua enga no újka manatanhani, no euanhantaaka kóntperata, ka indeni jimbochi Diósïni aiakuntaaka ambe enga ima jaiapanhentaaka, kánekua k'éri ambe arhiparini ka kánekuamendu janhanharhiparini, 29jimboka juchari Diósï chpíriska enga apejpentka.
Currently Selected:
Hebreos 12: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.