ǀGapiǁnaetsanas 2
2
1Tita ge Sarons di ǃkhāta
ǃgoaǃnāgu di lelita.
Aorekhoeb
2Lelis ra ǁkhūn ǁaegu mâǂoa
khamis ge ti ǀnamsasa khoedi ǁaegu ra mâǂoa.
Tarekhoes
3Apelhais ra ǃgarob hain ǁaegu mâǂoa
khamib ge ti ǀnamsaba ǂkham khoegu ǁaegu ra mâǂoa.
ǁÎb sommi ǃnâ ǂnûsa ta ge ra ǁkhore
tsî ǂûn âb ge ti namǃhanaba a ǂkhonba.
4ǁÎb ge tita ǂauxûib di oms tawa hā-ū
tsî ǀnammi âb ǀkha ge ǃgū-ai te.
5Rosainjin ǀkha ǀgaiǀgai,
î apeln ǀkha ǀasaǀasa te re,
ǀnammi xa ta ǀaesen hâ xuige.
6ǁÎb ǁareǀkhāb ǁôab ge ti danas ǃnaka hâ
tsî amǀkhāb ǁôab âb ge ǁnam te hâ.
7Mîmâiba te re Jerusalems khoeso
nū re ǀgaen tsî ǁgûn tawa
sim ǀnamma so toa tamab hâ hîa ǁara tidesa.
ǀGamǁî ǁnaetsanas
Tarekhoes
8Ti ǀnamsab di domma ta ge ra ǁnâu.
ǁÎb ge ǃnâugu ai ra urise
tsî ǃhomgu ai ra ǂgamse ǃkhoeǃgoaxa.
9Ti ǀnamsab ge ǀgae-i khami ī;
ǁgûdi di ǂkhamro-i khami.
ǁNāb ge ǂnubiǂgoab xōǀkhā mâ,
mûǂuidaodi ǃnâ kō
tsî tralidi ǃnâ-u ra ǂuise.
10Ti ǀnamsab ge ra ǃhoa-ū te.
Aorekhoeb
Hā re, ti ǀnamsase,
ti îsabese.
11Saoǁaeb ge go ǃkharu; ǀnanub ge go ǀapiǀû;
12ǃgarob ǃnâ di ge ǃkhāde ra ǃkhā.
Nēb ge ǁnaes ǁaeba
tsîb ge ǂnabun ǁnaeba ǃhanagu ǃnâ ra ǁnâuhe.
13ǀNomahais di ǂguro ǂûn ge ra ǁantsoatsoa
tsî ǂoab ge draiben di hammi xa ǀoa hâ
xuige hā re ti ǀnamsase,
ti îsabese tita tawa hā re.
14Sas ge ǂnabus
ǃhaob di ǁhāb ǃnâ ra gaus khami ī.
A ta ais âsa mû
tsî ǃgâise ra ǀō dommi âsa ǁnâu re.
15ǀGirina ǃkhō, ǀgirirona
sam di îxa draibeǃhanagan nî hîkākās aiǃâ ǃkhō.
Tarekhoes
16Ti ǀnamsab ge a ti, tsî tita ge ǁîb di.
ǁÎb ge ǀgoan âba lelin ǃnâ ra ǃûsi
17ǁgoaǂoab ra sauǀau
tsîb ǃkhaeba ra bēs kōse.
Ti ǀnamsase, oahā re ǁgû-i khami,
ǂkham ǁkhama-i Beters ǃhomgu ai hâ-i khami.
Currently Selected:
ǀGapiǁnaetsanas 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.