Nm 34
34
Li xnub'ajlil li na'ajej Kanahán
1Li Qaawa' kixye re laj Moisés:
2“Ye li aatin a'in reheb' laj Israel: Ok eere sa' li na'ajej Kanahán. A'an li na'ajej toxeereechani, ut a'aneb' a'in li xnub'ajlil:
3“Leenub'ajlil sa' xjayal xsak'leb' iq' natiklaak chalen sa' li chaqich'och' re Sin, toj chi junqre xnub'ajlil Edom. Leenub'ajlil sa' xjayal releb'l saq'e natiklaak chaq toj wan wi' li Atz'aminb'il Palaw. 4Leenub'ajlil tixq'ot chaq sa' li xTaqsink laj Xook', sa' xjayal xsakleb'aal iq', toxnume'q Sin ut toxraqe'q sa' xnub'ajlil Kadés-Barné. Chirix chik a'an taaxik toj Jasar-Adar ut toxnume'q Asmón. 5Tixq'ot chaq rix li xnub'ajlil Asmón toj chire xNima'il Ejiipt ut toxraqe'q sa' li palaw.
6“Leenub'ajlil sa' xjayal rokeb'l saq'e a'an toj chire li Nimla Palaw. A'anaq leenub'ajlil sa' xjayal rokeb'l saq'e.
7“Leenub'ajlil sa' xjayal releb'l iq' a'an a'in: teeraq chaq chalen toj chire li Nimla Palaw toj sa' li tzuul Hor. 8Chalen sa' li tzuul Hor teeraq leenub'ajlil toj Jamat, ut tox'elq sa' xnub'ajlil Sedad. 9Chirix chik a'an leenub'ajlil tox'elq Sifrón ut toxraqe'q sa' li na'ajej Jasar-Enán. A'anaq leenub'ajlil sa' xjayal releb'l iq'.
10“Leenub'ajlil sa' xjayal releb'l saq'e, teeraq chalen chaq Jasar-Enán toj Sefán. 11Taakub'eeq chaq Sefán toj Riblá, sa' xjayal releb'l saq'e re Ayin, ut toj taakub'eeq chaq toj chire li palaw re Kinéret sa' xjayal releb'l saq'e, 12taakub'eeq toj chire li nima' Jordán ut toxraqe'q sa' li Atz'aminb'il Palaw.
“A'anaq leech'och' rik'in chixjunil li xnub'ajlil sutsu wi'”, chan li Qaawa'.
13Laj Moisés kixnumsi eb' li aatin a'in reheb' laj Israel, ut kixye ajwi': “A'an a'in li na'ajej teejek'i cherix chi b'uulinb'il, a' li xye li Qaawa' naq taaq'axtesiiq reheb' li b'eleeb' teep ut li xyiijachil li jun chik,#34,13 Nm 26,52-56. 14xb'aan naq li xteepaleb' laj Rubén ut li xteepaleb' laj Gad ak xk'ulumeb' li xna'ajeb'. Jo'kan ajwi' li xyiijachil xteepaleb' laj Manasés ak xk'ulumeb' li xna'ajeb'. 15Eb' li wiib' teep ut li xyiijachil li jun teep chik ak xk'ulumeb' li xna'ajeb' toj junpak'al li nima' Jordán, sa' xka'yab'aal Jerikó, sa' xjayal releb'l saq'e”,#34,13-15 Jos 14,1-5. chan laj Moisés.
16Ut li Qaawa' kixye re laj Moisés:
17“A'aneb' a'in li xk'ab'a'eb' li te'jek'inq re li ch'och': laj Elehasar laj tij ut laj Josué, ralal laj Nun. 18Teexaqab'eb' ajwi' junjunq xjolomileb' li junq teep chi tenamit re te'xjek'i li ch'och'. 19A'aneb' a'in li xk'ab'a'eb': laj Kaleb, ralal laj Jefuné, sa' xteepalil laj Judá; 20laj Samuel, ralal laj Amiud, sa' xteepalil laj Simehón; 21laj Elidad, ralal laj Kislón, sa' xteepalil laj Benjamín; 22laj Bukí, ralal laj Yoklí, a'an li xjolomil xteepalil laj Dan; 23laj Janiel, ralal laj Efod, xjolomil xteepalil laj Manasés, ralal laj José; 24laj Kemuel, ralal laj Siftán, xjolomil xteepalil laj Efraín; 25laj Elisafán, ralal laj Parnak, xjolomil xteepalil laj Sabulón; 26laj Paltiel, ralal laj Asán, xjolomil xteepalil laj Isakar; 27laj Ajiud, ralal laj Selomí, xjolomil xteepalil laj Aser; 28ut laj Pedahel, ralal laj Amiud, xjolomil xteepalil laj Neftalí”.
29A'aneb' a'in li ke'taqlaak xb'aan li Qaawa' chi xjek'inkil li na'ajej Kanahán, chireechaniheb' laj Israel.
Currently Selected:
Nm 34: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.