Nm 32
32
Kijek'imank li ch'och' junpak'al li nima' Jordán
(Dt 3,12-22)
1Eb' li ralal xk'ajoleb' laj Rubén ut li ralal xk'ajoleb' laj Gad, jwal naab'aleb' li xketomq ut q'axal ninqeb' ajwi'. Naq ke'ril naq li na'ajej Jaser ut Galahad a'an chaab'il ch'och' re k'iiresink ketomq, 2koheb' rik'in laj Moisés, laj Elehasar laj tij ut chixjunileb' li xjolomileb' li komonil, ut ke'xye reheb':
3—Li na'ajej Atarot, Dibón, Jaser, Nimrá, Jesbón, Elalé, Sibmá, Nebo ut Mehón, 4a' li ch'och' kireechani li Qaawa' sa' xwulajikeb' li xkomonil aj Israel, a'an jun li na'ajej re k'iiresink ketomq. Ut laa'o wank qaketomq, chankeb'.
5Ke'xye ajwi':
—Wi xqataw usilal chawe chawu, k'e qe li na'ajej a'an, ut moohaak'e chi nume'k junpak'al li nima' Jordán, chankeb'.
6Ab'an laj Moisés kixye reheb' li ralal xk'ajoleb' laj Gad ut li ralal xk'ajoleb' laj Rubén:
—Ma truuq texkanaaq laa'ex arin ut eb' leeras eeriitz'in te'xik chi yalok? 7K'a'ut naq ink'a' nekeraj te'ok eb' laj Israel sa' li ch'och' xk'ehom li Qaawa' reheb'? 8Jo'kan ajwi' ke'xb'aanu leexe'toonil yuwa' naq kintaqlaheb' chaq chi rilb'al li na'ajej chalen chaq toj Kadés-Barné: 9koheb' toj sa' xtaq'ahil Eskol, ke'ril chaq li ch'och' ut ink'a' ke'raj naq eb' laj Israel ke'ok sa' li ch'och' xk'ehom li Qaawa' reheb'.#32,8-9 Nm 13,17-33. 10Xb'aan a'an kijosq'o'k li Qaawa' sa' li kutan a'an ut kixye sa' jurament: 11Eb' li winq li ke'elk chaq Ejiipt, chalen aj junqmay chihab', maajoq'e te'ok sa' li na'ajej inyeechi'om chi anchal linch'ool re laj Abrahán, laj Isahak ut laj Jakob, xb'aan naq ink'a' k'ojk'ookeb' xch'ool chiwix. 12Ka'ajeb' wi' laj Kaleb, ralal laj Jefuné aj Kenís, ut laj Josué, ralal laj Nun, naru te'ok xb'aan naq ke'xpaab' li Qaawa' chi anchaleb' xch'ool. 13Q'axal kijosq'o'k li Qaawa' rik'ineb' laj Israel ut kixk'eheb' chi xb'eeninkil rib'eb' sa' li chaqich'och' chiru ka'k'aal chihab', toj reetal ke'oso'k chixjunileb' li ke'xb'aanu li ink'a' us chiru.#32,10-13 Nm 14,26-35. 14Ut anaqwan laa'ex chik xek'amchi'i xna'leb'eb' leena' leeyuwa' jo' ralal xk'ajoleb' laj maak: teeraj wi' chik xchiq'b'al xjosq'il li Qaawa' sa' xb'eeneb' laj Israel! 15Wi ink'a' nekepaab' li Qaawa', li Yos tooxkanab' wi' chik chi wank sa' li chaqich'och', ut laa'ex teek'am chaq nimla rahilal sa' xb'een chixjunil li tenamit, chan laj Moisés.
16Toja' naq ke'jilok rik'in laj Moisés ut ke'xye re:
—Arin tqayiib' xna'ajeb' li qaketomq ut tqawaklesiheb' tenamit cho'q reheb' li qalal qak'ajol. 17Chirix chik a'an tooxik chi yalok, k'amolb'ehaqo chiruheb' laj Israel, toj reetal toxe'okaq sa' li xna'ajeb'. Ab'an eb' li qalal qak'ajol te'kanaaq sa'eb' li tenamit re te'xkol rib' chiruheb' li wankeb' sa' li na'ajej a'in. 18Ink'a' toosutq'iiq chaq sa'eb' li qochoch wi eb' laj Israel toj maji' xe'reechani li xna'ajeb'. 19Laa'o ink'a' tootz'aqonq na'ajej sa' xyanqeb' laj Israel junpak'al li nima' Jordán, xb'aan naq li qana'aj ak xqataw arin sa' xjayal releb'l saq'e re li nima' Jordán”, chankeb'.
20Ut laj Moisés kixye reheb':
—Wi teeb'aanu li yookex chi xyeeb'al, wi texxik chi yalok jo' naxye li Qaawa' 21ut chixjunileb' laj puub' te'q'axonq junpak'al li nima' Jordán chiru li Qaawa' ut te'kanaaq aran toj reetal li Qaawa' tixsacheb' cheru chixjunileb' li xik' neke'ilok eere 22ut taareechani li na'ajej, toja' naq truuq texsutq'iiq chaq wi' chik, xb'aan naq ak xeb'aanu li k'aru xeyeechi'i xb'aanunkil re li Qaawa' ut reheb' laj Israel. Li ch'och' a'in eerehaq chik chiru li Qaawa'. 23Ab'anan wi ink'a' teeb'aanu chi jo'kan, chenawaq naq xexmaakob'k chiru li Qaawa' ut li maak a'an nakanaak sa' eeb'een chi junajwa. 24Kab'lanqex b'i' cho'q reheb' leeralal eek'ajol ut yiib'omaq xna'ajeb' leeketomq; ab'an b'aanuhomaq li k'aru xeyeechi'i xb'aanunkil, chan laj Moisés.
25Ke'chaq'ok eb' li ralal xk'ajoleb' laj Gad ut eb' li ralal xk'ajoleb' laj Rubén, ut ke'xye re laj Moisés:
—Laa'o aj k'anjel chawu. Laa'o tqab'aanu li k'aru xaye qe. 26Eb' li qalal qak'ajol, eb' li qixqilal ut chixjunileb' li qaketomq, jo' kok' jo' ninq, te'kanaaq arin sa' xteepal Galahad. 27Ab'an laa'o aj k'anjel chawu, jo'k'ihal li yo'oon wanko chi yalok, tqapaab' raatin li Qaawa' ut tooxik chi yalok, jo' xaye qe”, chankeb'.
28Toja' naq laj Moisés ki'aatinak rik'in laj Elehasar laj tij, laj Josué, ralal laj Nun, ut rik'ineb' chixjunil li xjolomileb' xteepal laj Israel; 29ut kixye reheb': “Wi eb' li ralal xk'ajoleb' laj Gad ut eb' laj Rubén, chixjunileb' li yo'ooneb' chi yalok, te'q'axonq junpak'al li nima' Jordán eerochb'een, re yalok jo' chanru xtaqlankileb' xb'aan li Qaawa', toj reetal toxeereechani li na'ajej, toja' naq teek'e chi reechanileb' li na'ajej Galahad. 30Ab'an wi eb' li yo'oon wankeb' chi yalok ink'a' te'q'axonq eerochb'een, te'eechaninq na'ajej eerochb'een sa' li tenamit Kanahán”, chan laj Moisés.
31Eb' li ralal xk'ajoleb' laj Gad ut eb' laj Rubén ke'chaq'ok ut ke'xye: “Li k'aru yeeb'il xb'aan li Qaawa' reheb' laj k'anjel chawu, a'an li tqab'aanu. 32Laa'o tooxik chi yalok junpak'al li nima' Jordán, aran Kanahán, jo' naxye qe li Qaawa'; ab'an k'e chiqeechani li ch'och' wan chaq arin, sa' xjayal releb'l saq'e re li nima'”,#32,28-32 Jos 1,12-15. chankeb'.
33Ut laj Moisés kixk'e li x'awab'ejihom laj Sijón, awab'ej re Amor, ut li x'awab'ejihom laj Og, awab'ej re Basán, reheb' li ralal xk'ajoleb' laj Gad, eb' li ralal xk'ajoleb' laj Rubén ut xyiijacheb' laj Manasés, li ralal laj José. Kixk'e ajwi' eb' li tenamit li wankeb' chi xnub'ajlil ut eb' li k'aleb'aal wankeb' chi xjunsutam. 34Eb' li ralal xk'ajoleb' laj Gad ke'xkab'la xtenamiteb' aran Dibón, Atarot ut Aroher, 35Atrot-Sofán, Jaser, Yokbohá, 36Bet-Nimrá, Bet-Arán. Ke'xyiib' ajwi' xna'ajeb' li xketomqeb'. 37Eb' li ralal xk'ajoleb' laj Rubén ke'kab'lak aran Jesbón, Elalé, Kiriatáhin, 38Nebo, Bahal-Mehón (a'in yal jalb'ileb' xk'ab'a') ut Sibmá. Ut ke'xk'e xk'ab'a'eb' li tenamit ke'xwaklesi.
39Eb' li ralal xk'ajoleb' laj Makir, ralal laj Manasés, koheb' Galahad, ke'xchap li na'ajej ut ke'raanilasiheb' laj Amor li wankeb' aran. 40Toja' naq laj Moisés kixq'axtesi Galahad cho'q re laj Makir, ralal laj Manasés, li kikanaak chi wank sa' li na'ajej a'an. 41Laj Yaír, ralal laj Manasés, koho chi reechaninkil chixjunileb' li xk'aleb'aalileb' laj Amor, ut Jabot-Yaír kixk'e cho'q xk'ab'a' li na'ajej a'an. 42Laj Nóbaj koho chi reechaninkil li tenamit Kenat jo'wi' eb' li xk'aleb'aalil, ut kixk'e Nóbaj cho'q xk'ab'a', jo' chanru li xk'ab'a'.
Currently Selected:
Nm 32: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.