Lm 3
3
Li rox xrahil xch'ooleb' laj Jerusalén
1Laa'in jun winq li xinkuy naab'al li rahilal,
xb'aan xnimal xjosq'il li Qaawa' sa' inb'een.
2A'an xk'amok we sa' li aak'ab'
ut xmin wu chi b'eek b'arwi' maak'a' li saqenk.#3,2 Job 19,8.
3Ka'ajwi' sa' inb'een naxk'ut li xnimal xwankil li ruq',#3,3 Job 7,16-19; Sal 88,8.16-17.
ut nikinxrahob'tesi chixjunil li kutan.
4X'oso'k lintib'el ut lintz'uumal;
li Yos xtoqi chixjunil linb'aqel.#3,4 Job 7,5; 30,30.
5Sutsuukin yalaq b'ar
xb'aan rahilal ut ch'a'ajkilal.#3,5 Job 19,12.
6Xinxk'e chi wank sa' li aak'ab',
jo'eb' li kamenaq li ke'kamk najter.#3,6 Sal 88,6-7; 143,3.
7Xinxtz'ap re naq ink'a' chik tin'elq;
xinxb'ak' rik'in ch'iich' li q'axal aal.#3,7, 9 Job 3,23; 19,8.
8Us ta ninjap we chi xpatz'b'al intenq'ankil,
ab'an A'an ink'a' naraj wab'inkil.#3,8 Job 30,20.
9Xtz'api linb'e rik'in ninqi pek
ut xjal linb'e re naq tinsachq.
10Li Yos chanchan jun tz'uqtz'un cho'q we,
kama' jun kaqkoj yo chi woyb'eninkil.#3,10-11 Job 10,16; 16,9.
11Sa' xsachb'esinkil linb'e kok' q'uy xinxkanab',
chi k'ajo' xsachik linch'ool.
12Xkawresi li xsimaj,
ut laa'in xinxjayali chiru li ral xsimaj.
13Xinxkut chi ral simaj,
ut q'axal cham xe'okje'k sa' lintib'el.#3,12-13 Job 16,12-13.
14Xinxk'e chi se'eek xb'aaneb' chixjunil li tenamit;
chixjunil li kutan yookeb' chi weetz'unkil.#3,14 Dt 28,37; Job 30,9; Sal 69,11-13; Jr 20,7.
15Li Qaawa' xinxnujob'resi chi rahil ch'oolej;
k'ajo' xk'ahil li ha' xk'e chi wuk'.#3,15 Job 9,18.
16Xtoqi li ruuch we chi pek
ut xinxtolk'osi sa' pojtz'.
17Maak'a' chik tuqtuukil usilal sa' li waanm
ut xsachk sa' inch'ool k'aru li sahil ch'oolej.
18Ut xinye: “Maak'a' chik inmetz'ew,
x'oso'k li woyb'enihom rik'in li Yos”.#3,16-18 Job 17,15-16; 19,9-10; 30,19.
19Najultiko'k we linneb'a'il ut linjunaatalil,
naq junes rahil ch'oolej ut xyot'ik li waanm nink'ul.
20Junelik najultiko'k we:
ka'aj chik maa na'elk li waanm wik'in.
21Ab'an wank jun li nak'ojlaak wi' inch'ool
ut xaqxo wi' li woyb'enihom:
22ninnaw naq li xrahom li Qaawa' maak'a' roso'jik,
ut li ruxtaan ink'a' nalajk.
23Rajlal eq'la na'ak'o'k li xrahom:
k'ajo' xnimal li xtiikilal xch'ool!#3,22-23 Ex 34,6-7; Sal 136.
24Ut ninye sa' li waanm:
“Li Qaawa' a'an linb'ihomal;
jo'kan naq xaqxo li woyb'enihom rik'in”.#3,24 Sal 16,6; 119,57.
25Chaab'il li Qaawa' rik'ineb' li neke'yo'onink rik'in;
A'an chaab'il rik'ineb' li neke'sik'ok re.#3,25 Is 30,18.
26Q'axal us royb'eninkil naq li Yos tooxtenq'a,
chi k'ojk'ooq li qach'ool rik'in.
27Jwal us cho'q re li winq xkub'sinkil rib'
chalen chaq sa' xsaajilal.
28Li winq tento tkanaaq xjunes ut ink'a' taawech'inq,
naq rajom li Qaawa' chi jo'kanan.
29Tento tixkub'si xwankil toj toxrutz' li ch'och':
mare anchal toj twanq royb'enihom.
30Chixk'ehaq li xko re li ani na'ajok sak'ok re,
ut tixkuy li k'iila hob'e'k.#3,30 Mt 5,39.
31Xb'aan naq li Qaawa' ink'a' nokooxtz'eqtaana chi junajwa.
32Us ta naxk'e xrahil qach'ool,
ab'an naruxtaana wi' chik qu sa' xk'ab'a' li xnimal xrahom.#3,31-33 Sal 30,6; Is 54,7-8; 60,10.
33Xb'aan naq ink'a' nasaho'k xch'ool chi rahob'tesink,
chi moko chi xk'eeb'al eb' li ralal xk'ajol sa' raaxiik'.
34Li Qaawa' ink'a' nawulak chiru
naq neke'rahob'tesiik li b'ak'b'ookeb' sa' tz'alam,
35chi moko naq namaq'e'k li xk'ulub' junaq poyanam,
ut na'uxk a'an chiru li Nimajwal Yos.
36Wi ink'a' naraqmank aatin sa' tiikilal,
ma ink'a' tab'i' ra sa' xch'ool li Qaawa'?
37Maa'ani naru tixb'aanu li k'aru ak xyehom,
wi li Qaawa' ink'a' xyehok re.
38Naqak'ul li us ut li ink'a' us,
xb'aan naq jo'kan naraj li Qaawa'.#3,38 Job 2,10; Is 45,7.
39Ut wi laa'o tz'aqal aj maak,
k'a'ut naq naraho'k qach'ool xb'aan li rahilal naqak'ul?
40Qak'ehaq reetal chi us li qayu'am,
ut sutq'iiqo wi' chik rik'in li Yos.
41Qawaklesiiq qach'ool ut tz'aamanqo
chiru li xYos li choxa.
42Xoomaakob'k ut xqaq'et laawaatin, at Qaawa';
ut laa'at ink'a' xakuy qamaak.#3,40-42 Is 55,7.
43K'ajo' laajosq'il!
Xoohaarahob'tesi ut xasach li qayu'am
chi ink'a' xawil xtoq'ob'aal qu.
44Xalan aawib' sa' choql
re naq ink'a' taawab'i li qatij.
45Xoohaak'e sa' xutaan chiruheb' chixjunil li poyanam:
chanchano li mul li maak'a' nokoo'ok wi'.
46Chixjunileb' li xik' neke'ilok qe
nokoohe'xhob'.
47X'ok qaxiw, nokoosiksotk,
xjuk'e'k li qawankil ut xoosache'k:
a'an a'in li k'aru xootz'aqk.
48Chanchan roqha' li xya'al wu naq ninyaab'ak,
xb'aan xsachik linraarookil tenamit.#3,48-51 Jr 9,1; Lm 2,11.
49Ink'a' ninch'anaak chi yaab'ak,
xb'aan naq maak'a' nak'ojob'ank inch'ool,
50toj reetal li Qaawa' taaril chaq
xtoq'ob'aal qu sa' choxa.
51Jwal ra xsa'eb' li wu
xb'aan li rahilal xe'xk'ul li rixqilal lintenamit.
52Eb' li xik' neke'ilok we xine'xchap chi maak'a' xyaalal,
jo' nachape'k junaq xik'anel xul.
53Xine'xkut chi yo'yo sa' jun li jul
ut xe'xtuub' li pek sa' inb'een.
54Li ha' xwulak toj sa' linjolom,
ut laa'in xink'oxla: “Xin'oso'k”.#3,54 Jon 2,3-6.
55Toj sa' xchamal li jul
xinyaab'a chaq laak'ab'a', at Qaawa',#3,55-56 Sal 130,1-2.
56ut laa'at xawab'i xyaab' linkux:
“Maatz'ap laaxik chi rab'inkil lintij,
naq ninpatz' intenq'ankil chawu”, chankin.
57Xinyaab'a laak'ab'a', ut xatjilok chink'atq:
“Matxiwak!”, chankat we.
58At Qaawa', xinaatenq'a
ut xakol linyu'am.
59Xak'e reetal li rahilal xe'xb'aanu we chi maak'a' inmaak;
raqon aatin chiwix sa' tiikilal.
60Laa'at xawil naq xik' nikine'ril;
xak'e reetal chixjunil li neke'xk'uub' re inrahob'tesinkil.
61Xawab'i chanru nikine'xhob', at Qaawa',
ut li k'aru neke'xk'uub' chiwix.
62Laa'at nakanaw li neke'xye eb' li xik' neke'ilok we,
naq chixjunil li kutan neke'xk'uub' rahilal chiwix.
63Chak'e reetal li k'aru neke'xb'aanu:
junelik yookeb' chinhob'b'al.
64At Qaawa', eeqajun sa' xb'eeneb'
jo' chanru xk'ulub'eb'.
65Cha'aalob'resi li xch'ooleb'
ut chamajewaheb'.
66Xb'aan xnimal laajosq'il charahob'tesiheb'
ut sach ruheb' sa' xb'een li ruuchich'och' a'in.
Currently Selected:
Lm 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.