Lm 4
4
Li xka xrahil xch'ooleb' laj Jerusalén
1K'ajo' naq xq'eqo'k ru li oor,
ink'a' chik nalemtz'unk li chaab'il oor!
Cha'chookeb' yalaq b'ar sa' b'e
li xloq'laj pekil li rochoch li Yos.
2Eb' li ralal xk'ajol Sión,
li k'ajo' xloq'aleb' junxil jo' li chaab'il oor,
chanchaneb' aj chik ch'och' sek' anaqwan,
li yal xb'aanuhomeb' li winq.
3A'atqeb' li ixqi xojb' neke'xk'e xtu' eb' li ral;
ab'an lintenamit jalan chik li xk'a'uxl:
neke'xkanab' sa' b'e eb' li k'uula'al,
jo' naxb'aanu laj tak' ra' sa' chaqich'och'.
4Li ru'uj raq' li k'uula'al toj natu'uk
naxletz rib' sa' re xb'aan li chaqi'eel.
Eb' li kok'al neke'xpatz' xwaheb',
ab'an maa'ani nak'ehok reheb'.
5Eb' li neke'tzekank chi chaab'il junxil,
anaqwan kamkeb' re xb'aan tz'okaak sa'atqeb' li b'e;#4,4-5 2 R 25,3; Jr 52,6.
ut eb' li xe'k'iik chi tiqtookeb' rik'in chaab'il t'ikr,
anaqwan sa' mul chik t'ant'ookeb'.
6Li xmaak lintenamit naxq'ax ru
li xmaa'usilal li tenamit Sodoom,
li kisache'k ru chi junpaat
chi maajun junaq kitenq'ank re.#4,6 Gn 19,24.
7Junxil eb' laj Jerusalén li sik'b'ileb' ru,
saqsaqeb' jo' li ratz'amke,
q'axal saqeb' wi' chik chiru li xya'al tu';
li xtib'eleb' jwal kaq jo' li kaqi q'ol,
q'axal kaweb' rib' ut xchaq'al ruheb'.
8Ab'an anaqwan chanchaneb' chik li ab'aq:
ink'a' chik neke'nawmank ruheb' sa'eb' li b'e;
li xtz'uumaleb' xletz rib' chiru li xb'aqeleb',
chanchaneb' aj chik li chaqi si'.
9Q'axal us xaq reheb' li xe'kamsiik chi q'esnal ch'iich'
chiruheb' li xe'kamk xb'aan we'ej,
xb'aan naq eb' a'in timil timil xe'kamk
xb'aan xmajelal li xtzekemqeb'.
10A'atqeb' ajwi' li chaab'il na'b'ej
xe'xchiq li xkok'al cho'q xtzekemqeb':
rahil tzekemq xkanaak wi' cho'q reheb'
sa' li kutan ki'oso'k wi' lintenamit Jerusalén.#4,10 Dt 28,56-57; Lm 2,20; Ez 5,10.
11Xnumtaak xjosq'il li Qaawa'
sa' xb'een li ruuchich'och';
ut xtaqla chaq jun li xam sa' xb'een Sión
toj reetal x'oso'k li rub'elankil li tenamit.
12Eb' li awab'ej ut li tenamit sa' ruuchich'och'
maajun sut xe'xk'oxla
naq laj rahob'tesinel ut eb' li xik' neke'ilok
te'ok ta sa' li tenamit Jerusalén.
13Xmaakeb' li propeet ut li xmaa'usilaleb' laj tij,
sa' li tenamit Jerusalén xhoye'k xkik'el li maak'a'eb' xmaak.
14Eb' li propeet ut eb' laj tij
chanchaneb' li mutz'
naq neke'b'eek sa' li tenamit;
tz'ajn ruheb' xb'aan li kik',
ut maajun naraj xch'e'b'al li raq'eb'.#4,14-15 Nm 19,11-16.
15“Elenqex, ayuqex -chu'uxk reheb'-;
muxb'il ruheb', meech'e'eb'!”.
“Aj b'eeneleb' ut yookeb' chi elelik.
Maajoq'e naru te'wanq arin”,
chankeb' li maak'a'eb' xpaab'aal.
16Li Qaawa' xcha'cha'ink reheb',
re naq ink'a' chik trileb' ru.
Ink'a' xe'k'ehe'k xloq'al eb' laj tij,
chi moko xe'toq'ob'aak ruheb' li cheekel winq.
17Xqayo'oni qatenq'ankil
toj reetal ink'a' chik xqakuy.
Xqoyb'eni jun tenamit chi qakolb'al,
ab'an ink'a' xk'ulunk.#4,17 Jr 37,5-10.
18K'aak'alenb'ilo chi us,
ink'a' naru nokoo'elk sa' b'e.
Xtz'aqlok ru li qakutan,
xwulak xq'ehil li qakamik. Oso'k qe.
19Eb' li xe'raj qachapb'al
q'axal kaw xe'aanilak chiruheb' li t'iw.
Xoohe'xsik'i sa' k'iche'
ut xe'xk'e qara'lenkil sa' li chaqich'och'.
20Xe'xchap li na'awab'ejink qe,
li k'ojk'o wi' qach'ool, li sik'b'il ru xb'aan li Yos.#4,20 2 R 25,4-6; Jr 39,4-6.
Sa' qach'ool laa'o
naq rub'el xwankil toomuhenq sa' xyanqeb' li tenamit.
21Saho'qat ut se'en, at tenamit Edom,
laa'at li wankat sa' xteepal Us!
Laa'at ajwi' taawuk' xsa' li xsek' li raqb'a aatin:
tatkalaaq ut tatkanaaq chi t'ust'u.
22At tenamit Sión,#4,22 Is 40,2. ak xatoj rix laamaak;
li Qaawa' ink'a' chik tatxk'am sa' najtil tenamit.
A'ut laa'at, Edom,
li Yos taak'ajtesinq aawu,
ut tixk'e chi kutankil chixjunil laamaa'usilal!#4,21-22 Abd 1-12.
Currently Selected:
Lm 4: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.