2 R 24
24
1Sa'eb' li kutan naq laj Johakín wank chi awab'ejil, laj Nabukodonosor, awab'ej re Babilonia,#24,1 Jr 25,1-38; Dn 1,1-2. koho chi yalok rik'in, ut laj Johakín kiwank oxib' chihab' rub'el xwankil laj Nabukodonosor. Chirix chik a'an kixq'etq'eti rib' chiru. 2Ab'anan li Qaawa' kixtaqlaheb' aj Kaldeha, aj Aram, aj Mohab ut aj Amón; kixtaqlaheb' chi yalok rik'in laj Johakín, rik'ineb' laj Judá re xsachb'al ruheb', jo' yeeb'il xb'aan li Qaawa' chi xtz'uumal reheb' li xpropeet. 3Jo'ka'in kixk'ul laj Judá sa' ruq' li Qaawa', xb'aan li maa'usilal kixb'aanu laj Manasés 4ut xb'aan ajwi' naq kixkamsi naab'aleb' li maak'a'eb' xmaak, toj reetal kixnujob'resi Jerusalén chi kamenaq. Ut li Qaawa' ink'a' chik kixkuy a'an.
5Chixjunil li xyehom xb'aanuhom laj Johakín, tz'iib'anb'il sa' xHuhil xyehom ut xb'aanuhomeb' li awab'ej re Judá. 6Naq laj Johakín kiq'ajk kisutq'iik rik'ineb' li xxe'toonil yuwa', a' chik laj Johakín li ralal ki'ok chi awab'ejink sa' xna'aj.
7Chalen sa' li kutan a'an li awab'ej re Ejiipt ink'a' chik ki'elk chi yalok, xb'aan naq li awab'ej re Babilonia ak reechanihom chixjunil li na'ajej chalen wan wi' li nima' re Ejiipt toj chire li nima' Éwfrates.
Laj Johakín ut li xjunkab'al ke'k'ame'k toj Babilonia
(2 Kr 36,9-10)
8Waqxaqlaju chihab' wank re laj Johakín naq ki'ok cho'q awab'ej, ut oxib' po ajwi' ki'awab'ejink aran Jerusalén. xNejustá xk'ab'a' li xna', xrab'in laj Elnatán, Jerusalén xtenamit. 9Ab'an laj Johakín kixb'aanu li ink'a' nawulak chiru li Qaawa', jo' tz'aqal kixb'aanu li xyuwa'.
10Sa'eb' li kutan a'an eb' laj puub' re laj Nabukodonosor, awab'ej re Babilonia, koheb' chi yalok rik'ineb' laj Jerusalén ut ke'xsut li tenamit. 11Kiwulak ajwi' laj Nabukodonosor sa' li tenamit naq eb' laj puub' yookeb' chi xsutb'al Jerusalén. 12Toja' naq laj Jekonías, awab'ej re Judá, rochb'een li xna', eb' laj k'anjel chiru, eb' laj jolominel k'anjel ut eb' ilol ochoch, ke'xk'e rib' rub'el xwankil li awab'ej re Babilonia; ut a'in kixk'am laj Johakín sa' tz'alam naq ak waqxaqib' chihab' chik rokik chi awab'ejink.#24,12 Jr 22,24-30; 24,1-10; 29,1-2.
13Chirix chik a'an laj Nabukodonosor kixxok chixjunil li k'a'aq re ru q'axal terto xtz'aq sa' rochoch li Qaawa'; kixk'am ajwi' li terto xtz'aq li wank sa' rochoch li awab'ej ut kixjuk' chixjunil li oor xyiib'ahom laj Salomón, awab'ej re Israel, re xsahob'resinkil ru li rochoch li Qaawa', jo' kiyehe'k chi junxilaj xb'aan li Yos. 14Kixk'ameb' chixjunileb' laj Jerusalén, chixjunileb' laj jolominel ut eb' laj puub', lajeeb' mileb' li ke'k'ame'k; kixk'am ajwi' chixjunileb' laj tenol ch'iich'. Ka'aj chik eb' li q'axal neb'a' ke'kanaak sa' li tenamit.
15Kixk'am laj Johakín toj Babilonia; kirisiheb' ajwi' aran Jerusalén li xna' li awab'ej ut eb' li rixaqil, eb' laj ilol re li rochoch ut eb' li ninqeb' xwankil sa' li tenamit, ut kixk'ameb' Babilonia.#24,15 Ez 17,12. 16Li awab'ej re Babilonia kixk'ameb' chixjunileb' li b'ihom, wankeb' wuqub' mil chixjunil, rochb'eeneb' jun mil xkomoneb' laj tenol ch'iich'; kixk'ameb' ajwi' chixjunileb' li winq yo'oon wankeb' chi yalok. 17Chirix chik a'an li awab'ej re Babilonia kixxaqab' cho'q awab'ej laj Matanías, rikan laj Johakín, ut kixjal li xk'ab'a': aj Sedesías chik kixk'e cho'q xk'ab'a'.#24,17 Jr 37,1; Ez 17,13.
Laj Sedesías, awab'ej re Judá
(2 Kr 36,11-16; Jr 52,1-3)
18Jun xka'k'aal chihab' wank re laj Sedesías naq kixaqab'aak cho'q awab'ej,#24,18 Jr 27,1-22; 28,1-17. ut junlaju chihab' ki'awab'ejink Jerusalén. xJamital xk'ab'a' li xna', xrab'in laj Jeremías, Libná xtenamit. 19Ab'an laj Sedesías kixb'aanu li ink'a' nawulak chiru li Qaawa', jo' tz'aqal kixb'aanu laj Johakín. 20A'in kik'ulmank xb'aan naq li Qaawa' kijosq'o'k rik'ineb' laj Jerusalén ut eb' laj Judá, toj reetal kirisiheb' sa' xnaq' ru chi junajwa. Chirix chik a'an laj Sedesías kixq'etq'eti rib' chiru li awab'ej re Babilonia.#24,20 Ez 17,15.
Currently Selected:
2 R 24: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.