2 R 23
23
1Toja' naq li awab'ej Josías kixtaqla xb'oqb'al chixjunileb' li xcheekelaleb' laj Judá ut laj Jerusalén, re naq te'xch'utub' rib' rik'in. 2Ut rochb'een chixjunileb' laj Judá ut eb' laj Jerusalén, eb' laj tij, eb' li propeet ut chixjunileb' li poyanam jo' saajeb' ut cheekeb', kitaqe'k sa' rochoch li Yos. Chiruheb' li tenamit li awab'ej kixte li hu li kitawmank sa' li loq'laj ochoch ut kixyaab'asi xsa' chixjunil li xhuhil li Sumwank.#23,2 Dt 31,11-13; Neh 8,1-8. 3Chirix chik a'an kixxaqab' rib' chi xk'atq roqechal li loq'laj ochoch ut kixk'ojob' li sumwank a'in rik'in li Qaawa': kixye li raatin naq eb' laj Judá te'xpaab' li Qaawa' ut te'xyu'ami li xchaq'rab', li raatin ut chixjunil li xtaqlahom chi anchaleb' xch'ool chi anchaleb' raanm, ut te'xk'anjela ru li Sumwank jo' tz'iib'anb'il sa' li Hu. Ut chixjunileb' li tenamit ke'xsume xb'aanunkil li naxye li sumwank.
Kixaqab'aak xwankil li tz'aqal paab'aal xb'aan laj Josías
(2 Kr 34,3-7)
4Toja' naq li awab'ej kixtaqla laj Jilkías, li xb'eenil aj tij, jo'wi' li xkab'il ut eb' laj k'aak'alehom re rokeb'aal li rochoch li Qaawa' re naq te'risi aran chixjunil li k'a'aq re ru yiib'anb'il sa' xk'ab'a' laj Bahal, lix Aserá ut chixjunileb' li xsaqenkil li choxa. Ut laj Josías kixk'at chixjunil chirix li tenamit Jerusalén, sa' li k'aleb'aal Sedrón, ut li xchahileb' koxpaji aran Betel. 5Chirix chik a'an kirisiheb' sa' xk'anjel eb' li ke'xaqab'aak xb'aaneb' li awab'ej re Judá chi k'atok pom sa'eb' li tijob'aal sa' xjolomeb' li tzuul, sa'eb' li tenamit sa' xteepal Judá, chi xsutam Jerusalén, jo' ajwi' eb' li ke'mayejak pom chiru laj Bahal, chiru li saq'e, li po ut chixjunileb' xsaqenkil li choxa. 6Kirisi ajwi' li xjalam u lix Aserá sa' rochoch li Qaawa', kixk'am chirix li tenamit Jerusalén toj chire li nima' Sedrón, ut aran kixk'at, ut li xchahil koxpaji sa' xb'een li xmuqleb'aaleb' li poyanam.#23,4-6 2 R 21,3; 2 Kr 33,3. 7Kixjuk'eb' li na'ajej re ko'b'eetak yumb'eetak li wankeb' sa' rochoch li Qaawa', b'arwi' eb' li ixq neke'xkem raq' lix Aserá.
8Moqon chik kixch'utub'eb' chixjunileb' laj tij sa' xteepal Judá ut kixmux ru eb' li tijob'aal kik'atmank wi' pom xb'aaneb' laj tij, chalen chaq Geba toj Berseba. Kixjuk'eb' li artal wankeb' sa' Rokeb'aal laj Josué, laj jolominel re li tenamit, li nakanaak sa' tz'e uq' naq na'uxk ok sa' li tenamit. 9Ab'anan eb' laj tij li wankeb' chaq sa'eb' li tijob'aal chi tzuul ink'a' neke'ruhank chi mayejak sa' x'artal li Qaawa' aran Jerusalén, neke'xwa' b'an li wa ink'a' yuub'il rochb'eeneb' li rech aj tijul.
10Kixmux ru li na'ajej na'uxk wi' mayejak sa' xtaq'ahil Ben-Hinón,#23,10a Jr 7,31; 19,1-6; 32,35. re naq maajun chik tixq'axtesi chi k'ate'k li ralal xk'ajol sa' xk'ab'a' laj Molok.#23,10b Lv 18,21. 11Kixjuk'i li xjalam uheb' li kawaay ke'xyiib' li awab'ej re Judá sa' xk'ab'a' li Saq'e, li ke'wank sa' rokeb'aal li rochoch li Qaawa', nach' rik'in rochoch laj ilol re, aj Natán-Mélek xk'ab'a', sa' li Parbarim. Kixk'at li xb'eleb'aal ch'iich' li Saq'e 12ut kixjuk'eb' li artal xyiib'ahomeb' li awab'ej re Judá, a'eb' li wankeb' sa' xb'een li rochoch laj Ajás, ut eb' li artal li ke'yiib'aak xb'aan laj Manasés sa' li wiib' xneb'aalil li rochoch li Yos.#23,12 2 R 21,5; 2 Kr 33,5. Kirisiheb', kixputz'iheb' aran ut koxpaji li xpojtz'ileb' sa' li nima' Sedrón.
13Li awab'ej kixmux ajwi' eb' li tijob'aal li wankeb' chi tzuul chiru Jerusalén, sa' xjayal rokeb'l iq' re li tzuul Oliiw, li ke'yiib'aak xb'aan laj Salomón, awab'ej re Israel, sa' xk'ab'a' lix Astarté, xyoseb' laj Sidón, sa' xk'ab'a' laj Kemós, xyoseb' laj Mohab, ut sa' xk'ab'a' laj Milkón, xyoseb' laj Amón.#23,13 1 R 11,7. 14Kixpuk'iheb' li pek ut kixputz'iheb' li che' loq' chiruheb', ut kixnujob'resiheb' li na'ajej rik'in xb'aqeleb' li kamenaq. 15Kixjuk' ajwi' li artal wank Betel ut li tijob'aal li wank chi tzuul, xyiib'ahom laj Jerobohán, ralal laj Nebat,#23,15 1 R 12,33. naq kixk'ameb' xb'eheb' laj Israel chi maakob'k. Kixk'at li tijob'aal, kixpuk'iheb' li pek toj reetal kixkanab' jo' pojtz', ut kixk'at li xjalam u lix Aserá.
16Naq laj Josías ki'ilok chi xsutam ut kirileb' li xmuqleb'aaleb' li kamenaq wankeb' sa' li tzuul, kixye naq che'isiiq li xb'aqel eb' li kamenaq ut che'k'ate'q sa' xb'een li artal. Chi jo'kan kixsach xwankil li na'ajej, jo' kixye li Qaawa' chi xtz'uumal re li xtaql li Yos naq kiyehok resil li k'aru taak'ulmanq.#23,16 1 R 13,2.
17Chirix chik a'an kixpatz': “Ani aj muqleb'aal li yookin chi rilb'al?”, chan. “A'an xmuqleb'aal li xtaql li Yos, li kichalk chaq Judá ut kixye resil li xab'aanu laa'at re li artal re Betel”, chankeb' li wankeb' sa' li tenamit.#23,17 1 R 13,30-32. 18Toja' naq kixye li awab'ej: “Kanab'omaq aran. Maajun chi'eek'asinq re sa' xna'aj”. Chi jo'kan ke'roxloq'i li xmuqleb'aal li xtaql li Yos rochb'een li xb'aqel li propeet chalenaq chaq Samaria.
19Laj Josías kixjuk'eb' ajwi' eb' li tijob'aal li wankatqeb' chi tzuul sa' xteepal Samaria, xyiib'ahomeb' li awab'ej re Israel, naq ke'xyoob' xjosq'il li Qaawa'. Kixjuk'eb' jo' tz'aqal kixb'aanu reheb' li wankeb' Betel. 20Moqon chik kixkamsiheb' chixjunileb' laj tij li ke'k'anjelak sa'eb' li tijob'aal chi tzuul, a'eb' li wankeb' aran, kixmayejaheb' sa' xb'eeneb' li artal ut kixk'at xb'aqeleb' kamenaq sa' xb'eeneb'. Chirix chik a'an kisutq'iik wi' chik Jerusalén.
Naq laj Josías kixninq'ehi li Paswa
(2 Kr 35,1-19)
21Toja' naq li awab'ej kixye reheb' chixjunil li tenamit: “Ninq'ehimaq li Paswa#23,21 Ex 12,1-13.21-27; Lv 23,5-8; Nm 28,16; Dt 16,1-8. sa' xk'ab'a' li Qaawa' leeYos, jo' tz'iib'anb'il sa' xhuhil li Sumwank”. 22Maajun wa ke'xninq'ehi li Paswa chi jo'kan, chalen naq ke'wank chaq laj raqoleb' aatin cho'q xjolomileb' laj Israel, chi moko naq ke'wank eb' li awab'ej aran Israel ut Judá. 23Ak yo chik xwaqxaqlaju chihab' rokik laj Josías chi awab'ejink, naq kininq'ehimank li Paswa a'an, sa' xk'ab'a' li Qaawa', aran Jerusalén.
24Laj Josías kirisiheb' ajwi' eb' laj q'e, eb' laj tuul, eb' li xjalam u li yoseb' wankeb' sa' li junqkab'al ut chixjunileb' li jalanil yos, jo'wi' chixjunil li tz'i'b'eetalil na'ilmank sa' xteepal Judá ut Jerusalén. Chi jo'kan kib'aanumank jo' tz'aqal naxye li Chaq'rab' tz'iib'anb'il sa' li hu kitawmank sa' rochoch li Qaawa' xb'aan laj Jilkías laj tij. 25Maajun awab'ej kiwank junxil jo' laj Josías, ut maa'ani chik kixq'axtesi rib' moqon chiru li Qaawa' chi anchal xch'ool, chi anchal li raanm ut chi anchal xmetz'ew chi xpaab'ankil li xChaq'rab' laj Moisés, jo' li awab'ej a'an.
26Ab'anan li Qaawa' ink'a' kikotzk li xnimal xjosq'il sa' xb'een li tenamit Judá xmaak chixjunil li kilajxb'aanu laj Manasés re xchiq'b'al xjosq'il li Yos. 27Xyehom ajwi' li Qaawa': “Twisi eb' laj Judá sa' xnaq' wu, jo' naq kiwisi chiwu eb' laj Israel, ut tintz'eqtaana ajwi' Jerusalén, li tenamit insik'om ru, jo'wi' li loq'laj ochoch kinye wi' naq aran taahilanq link'ab'a'”.
Xkamik laj Josías
(2 Kr 35,20-27)
28Chixjunil li xyehom xb'aanuhom laj Josías, tz'iib'anb'il sa' xHuhil xyehom ut xb'aanuhomeb' li awab'ej re Judá. 29Sa'eb' li kutan a'an laj Parahón Nekó, awab'ej re Ejiipt, koho sa' xjayal li nima' Éwfrates re xtenq'ankil li awab'ej re Asiria. Toja' naq li awab'ej Josías koho chi yalok rik'in, ab'anan naq laj Nekó kiril a'an, tikto kixkamsi sa' li na'ajej Mejido. 30Eb' li xjolomileb' laj puub' ke'xk'am li kamenaq sa' b'eleb'aal ch'iich' chalen Mejido toj Jerusalén ut ke'xmuq sa' li xmuqleb'aal. Toja' naq eb' li tenamit ke'xk'am laj Johakás, ralal laj Josías, ke'xxaqab' ut ke'xyul cho'q awab'ej, sa' xna'aj li xyuwa'.
Laj Johakás, awab'ej re Judá
(2 Kr 36,1-4)
31Oxib' xka'k'aal chihab' wank re laj Johakás naq ki'ok cho'q awab'ej, ut oxib' po ajwi' ki'awab'ejink aran Jerusalén. xJamital xk'ab'a' li xna', xrab'in laj Jeremías, Libná xtenamit. 32Ab'an laj Johakás kixb'aanu li ink'a' nawulak chiru li Qaawa', jo' tz'aqal ke'xb'aanu eb' li xxe'toonil yuwa'. 33Laj Johakás kichape'k xb'aan laj Nekó, awab'ej re Ejiipt, sa' li na'ajej Riblá, sa' xteepal Jamat, yal re naq ink'a' taa'awab'ejinq aran Jerusalén. Li Parahón kixteneb' sa' xb'een li tenamit xtojb'al oxlaju xka'k'aal kintal li plaat ut oxib' aroow li oor. 34Toja' naq laj Parahón Nekó kixxaqab' cho'q awab'ej laj Eliakín, ralal laj Josías, cho'q reeqaj li xyuwa', ut aj Johakín chik kixk'e cho'q xk'ab'a'. Ut laj Johakás kik'ame'k toj Ejiipt, b'arwi' kikamk.#23,34 Jr 22,11-12.
35Laj Johakín kixq'axtesi re laj Parahón chixjunil li plaat ut li oor kixpatz'. Jo'kan naq kixteneb' xtojb'al a'in sa' xb'eeneb' li tenamit re xq'axtesinkil li tumin naxtitz' laj Parahón Nekó. Kixpatz' reheb' li poyanam jo'ch'inal jo'nimal wank chiru li junjunq, re xq'axtesinkil li plaat ut li oor re laj Nekó.
Laj Johakín, awab'ej re Judá
(2 Kr 36,5-8)
36Oob' xka'k'aal chihab' wank re laj Johakín#23,36 Jr 22,18-19; 26,1-6; 35,1-19. naq ki'ok cho'q awab'ej, ut junlaju chihab' ki'awab'ejink aran Jerusalén. xSebidá xk'ab'a' li xna', xrab'in laj Pedaías, Rumá xtenamit. 37Ab'anan kixb'aanu li ink'a' nawulak chiru li Qaawa', jo' tz'aqal ke'xb'aanu eb' li xxe'toonil yuwa'.
Currently Selected:
2 R 23: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.