1 Kr 5
5
Eb' li ralal xk'ajol laj Rubén
1Eb' li ralal xk'ajol laj Rubén, a' li xb'een ralal laj Israel, a'aneb' a'in: laj Janok, laj Palú, laj Jesrón ut laj Karmí. Laj Rubén a'an tz'aqal li xb'een alalb'ej, ab'anan kixtz'eq chaq li xk'ulub' raj xk'ulb'al jo' xb'een alalb'ej, xb'aan naq kixmux li rixaqil li xyuwa',#5,1-3 Gn 35,22; 49,3-4. ut a'eb' chik li ralal xk'ajol laj José, ralal ajwi' laj Israel, ke'k'uluk re li k'ulub'ej a'an. 2Chirix chik a'an laj Judá kinimank xwankil chiruheb' li riitz'in ut sa' xyanqeb' a'an ki'elk jun aj jolominel;#5,1-3 Gn 49,8-10. 3ab'an li k'ulub'ej re wank cho'q xb'een alalb'ej, kiq'axonk rik'in laj José.
4Eb' li ralal xk'ajol laj Joel a'aneb' a'in: laj Semaías, laj Gog, laj Simí, 5laj Miká, laj Rehaías, laj Bahal 6ut laj Beherá, aj jolominel reheb' laj Rubén, a' li kik'ame'k chi preexil xb'aan laj Tiklat-Piléser, awab'ej re Asiria.#5,4-6 2 R 15,29.
7Eb' li riitz'in laj Beherá, tusb'ileb' ru a' yaal chanru li xch'uutaleb', a'aneb' a'in: laj Jehiel, a' li xb'een iitz'inb'ej; laj Sakarías 8ut laj Belá, ralal laj Asás, ri xmam laj Sema, a' li ralal laj Joel. Laj Belá kiwank aran Aroher ut li xch'och' a'an nawulak toj Nebo ut Bahal-Mehón. 9Ke'wank ajwi' sa' xjayal releb'l saq'e toj sa' xmaril li chaqich'och' li natiklaak wan wi' li nima' Éwfrates, xb'aan naq k'ajo' ke'k'ihank li xketomq sa' li na'ajej Galahad.
10Naq laj Saúl kiwank cho'q awab'ej, eb' laj Rubén ke'yalok rik'ineb' laj Agarén ut ke'xq'ax ruheb'. Toja' naq ke'na'ajunk sa' xjayal releb'l saq'e re li na'ajej Galahad.
Eb' li ralal xk'ajol laj Gad
11Eb' li ralal xk'ajol laj Gad li ke'wank sa' xjayal eb' laj Rubén, sa' li na'ajej Basán, toj sa' li tenamit Salká, a'aneb' a'in li xk'ab'a'eb': 12xb'een laj Joel; li xkab' a'an laj Safán; chirix a'an laj Janay ut laj Safat. 13Eb' li rech'alal, chi tustu ru ut chi junqkab'al, a'aneb' a'in: laj Mikael, laj Mesulán, laj Sebá, laj Joray, laj Jakán, laj Zía ut laj Eber. Wuqub'eb' chixjunileb'. 14A'aneb' a'in li ralal xk'ajol laj Abijahil, ralal laj Jurí; laj Jurí a'an ralal laj Jaróhaj; laj Jaróhaj a'an ralal laj Galahad; laj Galahad a'an ralal laj Mikael; laj Mikael a'an ralal laj Yesisay; laj Yesisay a'an ralal laj Yajdó ut laj Yajdó a'an ralal laj Bus. 15Laj Ají, ralal laj Abdiel ut ri xmam laj Guní, a'an kijolomink re li xjunkab'aleb'. 16Chixjunileb' a'an ke'wank aran Galahad, Basán ut sa'eb' li xk'aleb'aalil, jo' ajwi' sa'atqeb' chixjunileb' li na'ajej re Sarón b'arwi' wank li chaab'il pach'aya', toj wan chaq chi xnub'ajlil. 17Chixjunileb' a'an tz'iib'anb'ileb' xk'ab'a' naq laj Jotán kiwank cho'q awab'ej re Judá ut laj Jerobohán cho'q awab'ej re Israel.
18Eb' li ralal xk'ajol laj Rubén, laj Gad ut li xyiijachil xteepaleb' laj Manasés yo'ooneb' chi yalok; wankeb' xkolb'aleb' rib', xjutz' che', xch'iich', xna' simaj ut tzolb'ileb' chi us re yalok. Wankeb' kaahib' roxk'aal mil rik'in waqxaqlajuk'aal xkab' o'q'ob' (44,760) chi winq li yo'ooneb' chi yalok. 19Ut ke'yalok rik'ineb' laj Agarén ut rik'ineb' laj Jetur, laj Nafís ut laj Nodab; 20ab'an ke'xyaab'a xk'ab'a' li Yos sa' li yalok, k'ojk'o xch'ooleb' rik'in li Qaawa', ut A'in kitenq'ank reheb'. Jo'kan naq eb' laj Agarén rochb'eeneb' li neke'okenk chirixeb' ke't'ane'k sa' ruq'eb'. 21Chirix chik a'an ke'xk'am li xketomq eb' li xik' neke'ilok reheb', wankeb' lajeeb' roxk'aal mil (50,000) chi kameey, lajeeb' roxlajuk'aal mil (250,000) chi karneer ut oob' o'q'ob' (2,000) chi b'uur. Ke'xk'e ajwi' sa' tz'alam o'k'aal mil (100,000) chi poyanam. 22Naab'aleb' li xik' neke'ilok reheb' ke'kamk xb'aan naq eb' laj Rubén, eb' laj Gad ut li xyiijachil xteepaleb' laj Manasés ke'yalok sa' xk'ab'a' li Yos. Ut ke'kanaak chi wank sa'eb' li na'ajej a'an toj ke'k'ame'k chi preexil.
Li xyiijachil xteepaleb' laj Manasés
23Eb' li ralal xk'ajol li xyiijachil xteepaleb' laj Manasés ke'wank sa' li na'ajej, chalen Basán toj Bahal-Hermón, Senir ut li tzuul Hermón, xb'aan naq jwal naab'aleb'. 24Eb' li ke'jolomink re junqkab'al a'aneb' a'in: laj Efer, laj Isí, laj Eliel, laj Asriel, laj Jeremías, laj Hodabías ut laj Yajdiel. Chixjunileb' a'an yo'ooneb' chi yalok ut nawnookeb' ru ut aj jolomineleb'. 25Ab'anan ke'xq'etq'eti rib' chiru li xYos li xxe'toonil yuwa'eb' ut ke'xloq'oni li xyoseb' li poyanam, li kixsacheb' ru li Qaawa' chiruheb' a'an. 26Jo'kan naq li xYos laj Israel kixtoch' xch'ool laj Pul,#5,26 2 R 15,19. awab'ej re Asiria, naraj naxye naq laj Tiklat-Piléser,#5,26 2 R 15,29. a' li kirisi sa' xna'ajeb' eb' laj Rubén ut aj Gad jo'wi' li xyiijachil xteepaleb' laj Manasés; ut kixk'ameb' aran Jalaj, Jabor, Jará, jo'wi' chire li nima' Gosán, b'arwi' wankeb' toj anaqwan.#5,26 2 R 17,6.
Currently Selected:
1 Kr 5: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.