Mat 6
6
Jesús ichufwenej wichi m'ak tä is chik iwoye tä iwo t'awayhata elh tä p'elitsaj
1“Uyayhlä, chik lewatayhläk wichi yäm amehen tä aisen, wet häp tä lewoyaye m'ak tä is alhoho.#Mat 23.5 Chik mälhyejtso m'ak tä lewoyaye, Ajchayay tä ipuleye tek hiw'enla amhohen awayhat chik häpe.
2“Tä mälhyejtso, chik lewo t'awayhata iyhäj tä p'elitses, yej t'ajthi wichi, yej ten hin'ol tä akantses. Tsi tä lhamel ihiche n'ohusew'etes wok tä inukwe hup kawayhil, t'uhläk wichi hiw'en lech'otyaj tä itiyej p'elitses wet yen häpeya hin'ol tä isen. Matche tä ofwen amhohen, Lhamel ikatej t'at t'awayhat tä häpe tä wichi iwujyenejpe m'ak tä iwoyetso. 3-4Mat chik lewo t'awayhata elh tä p'elitsaj, weskatej, yej hantej akwey tä hats'amkat m'ak tä akwey tä afwomkat iwoye. Wet Ajcha tä häpe elh tä hiw'en nilhokej m'ak tä õ'weskatej, hiw'enla amho awayhat.
Jesús ichufwenej wichi n'ot'alhyaj
(Luc 11.2-4)
5“Chik lewoyay alhyaja, yej tenay hin'ol tä akantses. Tsi lhamel ihumin tä takasthen tä iwo t'alhyaja tä ihiche n'ohusew'etes lhäy'e hup kawayhil letselhäs, tä t'uhläk wichi hiw'en.#Luc 18.10-14 Matche tä ofwen amhohen, Lhamel ikatej t'at t'awayhat tä häpe tä wichi iwujyenejpe m'ak tä iwoyetso. 6Mat am chik lewo alhyaja, hochufwi awukwech'o elh, p'ohi lepe wet ats'ilak t'at, lhäy'e Ajcha tä nin'äla tä i'amej. Wet alhe, wet lham tä hiw'en nilhokej m'ak tä õ'weskatej, hiw'enla amho awayhat.
7“Chik lewoyay alhyaja, yej tenay wichi tä nitäfwelayej Dios tä matche. Lhamel yachajlhaho lhämtes tä iwoye, wet pitaj wet lajit lahaya. Lhamel fwetaj chik yäm wuj lhämtes, häpkhilek õtch'ahuye. 8Yej tenay lhameltso, tsi Ajchayay tä kamaj ka'alhaye pajche ihanej t'at m'ayhay tä lewatlä. 9Mat amel chik lewoyay alhyaja, oyaykwe:
Dios tä olhamel Ojcha tä lhe puleye,
is chik õyen t'amajcheta ey.
10Is chik Aniyatyaj in'oyejen.
Is chik õ'woye ämet honhatena,
mälhyej tä õ'woye tä ipuleye.
11W'en n'ohomche olhäk fwalana.
12Täyhat n'oyejen otes,
mälhyej tä olhamel otäyhtejen letes
iyhäj tä iwoyej n'oyehen m'ak tä ni'isa.
13Yej ch'anlhaye chik ikalh n'ohiche n'olhelhtshayaj,
mat fwayhat n'oyejen häp ahättaj.#6.13 Häp iyhäj n'otkwey lesaynhay p'ante y'isej n'olhämtes tä yok: Tsi häp am tä Alewuk Aniyatyaj, lhäy'e akhajyhayaj, lhäy'e awujyaj, yämlek tiyäj'attsiy. Amén.
14“Chik amel letäyhtejen aiyhäj letes tä ihi ahilä, häte Ajchayay tä ipuleye itäyhthila amejen ates. 15Mat chik katäyhtayejen aiyhäj letes, häte Ajchayay tek itäyhthila amejen ates.
Jesús ichufwenej lakey elh chik lhaichuyhat
16“Chik alechuyhathen, yej tenay hin'ol tä akantses. Tsi lhamel lhaifwitajayenwethä, lhaitech'aynej iyhäj tä lelhakli ihi, tä t'uhläk wichi hiw'en tä lhaichuyhat. Matche tä ofwen amhohen, Lhamel ikatej t'at t'awayhat tä häpe tä wichi iwujyenejpe m'ak tä iwoyetso. 17Mat am chik alechuyhat, lej ate'pe wet a'enlhi t'at. 18Chik mälhyejtso, häpkhilek wichi nhanayej tä alechuyhat, mat Ajcha tä nin'äla tä i'amej, häp tä ihanej. Wet lham tä hiw'en nilhokej m'ak tä õ'weskatej, hiw'enla amho awayhat.
N'okäywet tä ipuleye
(Luc 12.33-34)
19“Yej hut amejen akäywet honhatena, tsi lewos iwasthiche m'ayhay wet noj t'at, lhäy'e tä etantses tiyäjo wet t'etane. 20Mat hutwek akäywet puleye, tä newache lewos chik iwasthiche m'ayhay wet ninofwa, wet newache etantses chik tiyäjo. 21Tsi lhip tä akäywet ihi, häpkhilek lhen at atichunhayaja.
N'ot'isan lechäkw
(Luc 11.34-36)
22“N'ottelhoy häpe t'at n'ot'isan lechäkw. Tä mälhyejtso, chik isen atelhoy, häte imälhewek asan ihi isi, 23mat chik ni'isahen atelhoy, imälhewek asan ihi honatsi. ¡Wet chik isi tä i'amhi nem isi, wujla honatsi tä i'amhi!
Yej täkwyen awuhuy
(Luc 16.13)
24“Nehit katsik ihanej iwoyneje yämthilek itäkwyen lewuhuy, tsi ihumnhila elh wet tek lhay'amkathiyeja elh, wok t'ifwtihiyeja elh wet ilehiyeja elh. Lehanhiyejt'a lewoyneje chik lhenay Awuka Dios tä lehuminay akäywet.
Dios t'uye leles
(Luc 12.22-31)
25“Wet häp tä ofwen amhohen tä oyok, Yej lhenay alhakliya wet lhok, ¿Atsihila m'ak chik oisej? Yej lhak'alejlhi m'ak chik letufwla, wok m'ak chik leyähiyeja, wok m'ak chik letaw'uyhihla. ¿Hä haw'atshancheyaj laha ninuya'pe m'ak tä letufw, wet asan laha ninuya'pe haw'uy? 26Lhek yahinya afwenchey, tek tutcheyhen wet tek ilanhi lakäs lhay wet iwohit'a lakapuchehisa. Mat Ajchayay tä ipuleye häp tä hiw'enhomche lhäk. Wet lhek tetshan, ¡amel ahayay inu'pe afwencheytso! 27Wok ¿atsi elh amel chik letichunhayaj tä ilän lhamej ihanej iwoyneje tä y'ayhattshi lhimphaj lew'atshancheyaj?
28“¿Wet chipte tä lhen alhakliya haw'uy? Lhek tetshan hal'ä lhawol tä ihi tayhi, tej tä nitchumawethä wet nityhinahen, mat lhaichihelthen t'at. 29Niyat Salomón p'ante, tej tä yäm isis lew'uyes tä taw'uyhi, mat ofwen amhohen tä w'awulhihit'a elh chik häpe hal'ä lhawo. 30Tä mälhyejtso, tä Dios iwoynejetso lesilatyaj häp hal'ä lhawol tä ihi tayhi fwalana wet chik fwala õ'thatho n'onhonthi wet õhp'ohen, oyok, amel lhäy'ehila lhip chik t'u amehen wet iwo haw'uya. ¿Chipte tä lhimphaj tä let'ekhayaye?
31“Tä mälhyejtso, yej lhenay alhakliya wet lhok, ¿Atsihila m'ak chik y'atufw?, wok ¿Atsihila m'ak chik y'ayäyej?, wok ¿Atsihila m'ak chik y'atw'uyhi? 32Tsi wichi tä nitäfwelayej Dios tä matche, häp tä yenpej lhakliya m'ayhayna. Mat amel Ajchayay tä ipuleye pajche ihanej t'at tä lewataypejlä nilhokej. 33Mat chunkat mälhetwek tä lhenay atichunhayaja Dios Niyatyaj, lhäy'e m'ak tä lham ihuminche, wet häte ihla amejen nilhokej m'ayhay tä oyämetso.
34“Tä mälhyejtso, yej lhenay alhakliya tä lhopejkwe, ¿Atsihila m'ak chik in'oyej chik fwala? ¡Taye t'at chik fwala, wet nech'e lhen atichunhayaja m'ayhay tä iche! ¡Tsi naya t'at m'ayhay tä ithahyen han'äyij fwalana!#Sal 55.22; 1~Ped 5.7
Currently Selected:
Mat 6: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.