Mat 7
7
Yej wo akalelhthayajayej aiyhäj
(Luc 6.37-38,41-42)
1“Yej wo akalelhthayajayej aiyhäj, häpkhilek Dios nitiya amejen lakalelhthayaj. 2Tsi mälhyej tä amel lewo akalelhthayajayej aiyhäj, häp tä Dios itihla amejen lakalelhthayaj, yämla w'awulhi m'ak tä lewoyeje aiyhäj chik lham iwoyej amehen. 3¿Chipte tä lhen atichunhayaja huphaj tä ihi aelh tatelho, wet lhenhit'a atichunhayaja amej hal'ä lhota tä wujtaj tä ihi am atelho? 4¿Wok letahuyej aelh wet lhok, Ch'anlha n'oye chik olanhi huphaj tä ihi atelho? Wet lhenhit'a atichunhayaja amej hal'ä lhota tä wuj tä ihi am atelho. 5¡Ahäp hin'o tä akantsaj! Chunkat hal'ä lhota tä wuj tä ihi am atelho, häpkhilek lew'enche honhat wet lelanhi huphaj tä ihi aelh tatelho.
6“Yej w'enho asinhäs häp m'ak tä n'ot'amajchet, tsi tamenhiyeja chik inu amehen wet iwo ipeya. Wet yej thate kutsi lhayis m'ak tä isilataj, tsi t'äsichela.
Alheje Dios m'ak tä lewatlä
(Luc 11.9-13)
7“Alheje Dios m'ak tä lewatlä wet hiw'enla amhohen. Ukwe wet lew'enla. Änch'oye Dios wet ifwoynhila ahilähen. 8Tsi elh chik t'alhch'oye ikatej t'at, wet elh chik t'ukwe hiw'en t'at, wet elh chik t'änch'oye Dios, Dios ifwoynhilahlä.
9“¿Wok iche p'iya elh amel chik lhäs t'alheje pan wet hiw'enho tunte, 10wok t'alheje w'ahat wet hiw'enho amlhäj? 11Lhek yahinya amel tä akni'isahen, mat lehanej tä lew'enho ales m'ak tä isen. ¿Wet chiwoye Ajchayay tä ipuleye? ¡Nemla koyhyaj tä lham hiw'enho m'ak tä isen häp lhamel tä t'alheje!#Juan 14.13-14; 15.7,16; 16.23-24; 1~Juan 3.21-22; 5.14-15
Dios lhämet tä lhamya
(Luc 6.31)
12“Häp m'ak tä let'uhläk aiyhäj iwoyej amehen, häte woyeje aiyhäj. Tsi täjtso häp tä nilhok Ley p'ante tälhe Moisés lhäy'e profetas lechufwenyajay.
Lepe tä nitsajaho
(Luc 13.24)
13“Nukwe lepe tä nitsajaho. Tsi tsajo lepe wet tsajche n'äyij tä tiyäje n'otäyhyaj, wet wujpey wichi tä inukwe. 14Mat tsajihot'a lepe wet tsajichet'a n'äyij tä tiyäje n'ow'atshancheyaj, wet wuj tä atha, wet wujit'a'pe wichi tä nilhoke.
Häpet hal'ä chik häpe, lhay t'at tä ikalelhät
(Luc 6.43-46; 13.25-27)
15“Amaj amejenlä häp profetas tä kamatachehen. Lhaitech'aynej tson'atas tä naj lakeyesa, mat häpehen t'owalhas tä fwitses. 16Letäfwnhiyeja lhamel chik lew'en lechumyaj, tsi lhek yahinya, uvas tälhihot'a ch'uthanil wet higos tälhihot'a istak. 17Häp tä hätet iwoye, hal'ä tä is iwoye lhay tä is, mat hal'ä tä ni'isa iwoye lhay tä ni'isa. 18Hal'ä tä is ihanhiyejt'a lhaiwoyneje yämthilek iwoye lhay tä ni'isa, wet häp hal'ä tä ni'isa ihanhiyejt'a lhaiwoyneje yämthilek iwoye lhay tä is. 19Elhpej hal'ä tä ni'isa lhay tä iwoye, õyiset wet õ'thatho itäj. 20Wet mälhyej tä oyämetso, hin'oltso lechumyajay tä iwoye häpkhilek tamenej chik letäfwelayej.
21“Tek nilhokhiyeja lhamel tä yäm n'oye tä yok, Iwuk, Iwuk, chik nichäthihola Dios Niyatyaj. Ts'ilakhila lhamel tä iwoye Ojcha tä ipuleye lenech'ethayaj. 22Chik nichäte Ifwala tä N'okalelhthayaj, wujla'pe wichi tä yohlak, Iwuk, Iwuk, olhamel owonaj eya tä oyen lhämeta m'ak tä Dios ifwel n'ohohen. Owonaj eya tä onuhatchephä ahät lhayis. Wet owonaj eya tä oyenlhi wujpe m'ayhay tä wichi iseltejen.
23“Mat onchulhihola wet oyohlak, Ontäfwenhit'a amejen. ¡Mäyay och'oye, amel tä lewoyaye m'ak tä ni'isa!
Hup tä lefwetes i'pe chenaj tä tunte, lhäy'e elh tä i'pe holo
(Luc 6.47-49)
24“Tä mälhyejtso, elh chik iläte olhämtes wet iwoye, hätet iwoye hin'o tä yenlhi lewukwe tä iti'pe chenaj tä tunte. 25Wet näm pelhay, näm tewok tä t'ulhpe honhat, näm ihwok tä äytaji wet inuye hup, mat tek nichät katsi tsi lefwetes i'pe tunte. 26Mat häp elh chik iläte olhämtes wet niwoyaye, hätet iwoye hin'o tä ch'isuk tä yenlhi lewukwe tä iti'pe holo. 27Wet näm pelhay, näm tewok tä t'ulhpe honhat, näm ihwok tä äytaji, wet huptso nichät katsi, wet tatäy wet noj.”
28-29Tä Jesús ileyej lhämtestso, wichi wuj tä iseltejen, tsi tä ichufwen lhamel, mälhyet iwoye hin'o tä len'ohyaj ihi, tek häte iwoye hin'ol tä lhayen lewosayej Ley p'ante tälhe Moisés.
Currently Selected:
Mat 7: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.