Heb 4
4
1Tä mälhyejtso, uyayhlä. Tsi tej tä kamaj in'amejen Dios lhämet tä yäme tä t'uhläk y'anchätho honhattso tä yämthilek iwo t'elakw'eta, is chik lenowaye häpkhilek newache elh amel chik nichätaho. 2Tsi n'amel häte õ'wo siläta n'amejen Dios lhämet tä is, n'ahätet iwoye wichi p'ante õ'fwenhomche. Mat lhamel isiyejt'a p'ante tä iläte, tsi tek lhaip'ajtej iyhäj tä ichaye. 3Mat häp n'amel tä y'achaye, y'anchäthihola honhat tä yämthilek õ'wo t'elakw'eta, häp honhat p'ante Dios yäme tä yok:
“Wet häp tä ot'untejche olhämet
tä owäk ihi wet oyok,
Tek nichäthihola honhat
tä yämthilek owo t'elakw'eta.”#Sal 95.11
Häp lew'et tä õ'wo t'elakw'eta pajche iche t'at, tälhe täjp'ante Dios ihämet nilhokej lechumet tä honhat nech'e iche p'ante. 4Tsi iche lhip tä ihi N'olesaynhay tä N'ot'amajchetes tä yäme häp fwala siete, wet yok:
“Häp fwala siete Dios lhay'up'at
tä ihämet nilhokej lechumet.”#Gén 2.2
5Wet lhip elh yok:
“Lhamel tek nichäthihola honhat
tä yämthilek owo t'elakw'eta.”
6Häp wichi tä ichun p'ante tä iläte Dios lhämet tä is, lhamel ikachuye, wet häp tä tamenej tä tek nichätho honhat tä yämthilek õ'wo t'elakw'eta. Tä mälhyejtso, iche iyhäj tä Dios iwahnej chik tiyäjo. 7Wet häp tä paj p'ante, pitaj lewhäy tä tajyäme, tahuy n'amejen tä ihi David lelesaynek tä pajchene oyäme tä yok:
“Fwalana chik lelätaye Dios lechos,
yej t'unthen ahusey.”#Sal 95.7-8
Wet tä yok “Fwalana”, häpe t'at fwalana tä lham y'ithat, häp fwala tä nech'ayek. 8Tsi chik häpkhi Josué p'ante chik ichätyenho wichi häp honhat tä yämthilek õ'wo t'elakw'eta,#Deut 31.7 Dios tek yenhi lhämeta fwala elhna.
9Tä mälhyejtso, y'aw'en tä iche honhat elh yämthilek Dios leles iwo t'elakw'etahi, 10wet elh chik häpe chik nichätho honhattso, lhay'up'atej lechumet, mälhyej tä Dios lhay'up'atej p'ante lham lechumet. 11Tä mälhyejtso, n'alhaikhajyenhen häpkhilek y'anchätho honhattso, wet newache elh chik häpe chik ihän len'äyij wichi p'ante ikachuye wet lewit'äy ihi.
12Tsi Dios lhämet iläy wet takhajay wet wuj tä y'uy, inu'pe n'ofwajnhat tä lhayhil täkwfwas,#Isa 49.1-2; Ef 6.17 wet atojchä tä tiyäjo hin'o yäk nichätho lechowej hin'o lehusek, wet isaphi hin'o letichunhayajay lhäy'e m'ak tä hin'o lehusek t'uhläk iwoye. 13Ihichet'a Dios lhenek at chik häpe chik ihanej chik lhaiskatho häp lham. Nilhokej m'ayhay ihi t'at tä lham tatache wet lham hiw'en lhamel, wet itetshanhila m'ak tä y'awoye chik näm fwala tä lepes.
Jesús häpe Sacerdote tä Lhamya
14Jesús, Dios Lhäs, häpe n'amel lhaka Sacerdote tä Lhamya tä pajche tiyäjo pule. Häp tä tamenej tä iwohiyet'ak y'aleyej mat n'atujlhache lhachayaj tä y'awoyena. 15Wet lhaka Sacerdote tä Lhamyana häpkhit'a elh tä nhanayej iwoyneje che hip'altsen n'amehen tä lhak'efwhayaj ihi. Tsi häte n'olhelhtshayajay tä ipej n'amejen, iyej p'ante häp lham, mat tek iwo lech'isukyaja. 16Tä mälhyejtso, isit'ak y'atiyej lhafwawalhyaj häp Dios, mat n'ahoye t'at lep'altsenyajw'et, häpkhilek iti n'amejen lep'altsenyaj lhäy'e lech'otyaj che y'awatlä.
Currently Selected:
Heb 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.