Heb 3
3
Jesús inu'pe Moisés
1Tä mälhyejtso, ipuhfwas tä Dios pajche t'än amehen wet ayen t'amajchetesa, en atichunhayaja Jesús, lham tä Dios Chenek wet häpe Sacerdote tä Lhamya tä y'atiyej lhachayaj. 2Lham t'ifwtiyej Dios tä itshupyeneje lechumetna, hätet iwoye Moisés p'ante t'ifwtiyej Dios tä y'uhyene lew'et lheley.#Núm 12.7 3Mat Jesús t'uhawetej chik lewujyaj tä õ'tiyej inu'pe Moisés lewujyaj. Hätet iwoye hin'o tä yenlhi hup, lewujyaj tä õ'tiyej inu'pe tä õ'tiyej hup tä lhenek. 4Hup chik häpe tä õyenlhi, n'olhenek t'at, mat Elh tä yenlhi nilhokej m'ayhay häpe Dios. 5Wet häp tä mälhyej p'antetso Moisés, lham häpe Dios lakawo wet afwtintsaj tä tachumhoplhi Dios lew'et lheley, wet lechumet tä iwoye hin'älit p'ante m'ak tä Dios yämhiyela chik paj. 6Mat Cristo häpe Dios Lhäs, wet afwtintsaj tä Lewuk Dios lew'et lheley. Wet n'amel n'ahäpehen Dios lew'et lheley, chik kay'aleyayej tä lhat'otley t'unhen wet y'alhaikhajyenejen lhaniwhayaj tä kalelhäj.
“Yej t'unthen ahusey”
7Häp tä tamenej tä Espíritu tä Dios T'amajchet yäme tä ihi Lehi tä yok:
“Fwalana chik lelätaye Dios lechos,
8yej t'unthen ahusey,
mälhyej wichi p'ante tatayhlä Dios,
wet yelhte tä ihi ts'anis.
9Amel achätilis yelhat n'oye, yokwe Dios,
tej tä lhamel hiw'en at thayej
m'ak tä oyenlhi cuarenta nekchämes.
10Häp tä tamenej tä otiyejte owäk häp wichitso
wet oyok, Lhamel lehusey wetahenpej,
wet nitäfwnhiyejt'a m'ak tä ohuminche.
11Wet häp tä ot'untejche olhämet
tä owäk ihi wet oyok,
Tek nichäthihola honhat
tä yämthilek owo t'elakw'eta.”#Sal 95.7-11
12Ipuhfwas, u'amehen, häpkhilek newache elh amel chik lehusek ni'isa wet lhaistakyenej Dios tä n'ilataj, wet ileyej tä ichaye. 13Mat tä kamaj in'amejen Dios lhämettso tä yok “Fwalana”, nityenej aiyhäj fwalapej fwalapej, häpkhilek newache aelh chik häpe chik lesukyaj iwetahat wet hit'unhat lehusek. 14N'alhait'untejiche lhachayaj, tälhe täjte y'awo tesa pajla'tha y'afwit lepes, häpkhilek y'ap'akej Cristo.
15Wet häp tä n'olhämet yok:
“Fwalana chik lelätaye Dios lechos,
yej t'unthen ahusey,
mälhyej wichi p'ante tatayhlä Dios.”
16¿Wet atsi p'ante wichi tä iläte Dios lechos, mat tatayhlä? Häpehen nilhokej lhamel p'ante Moisés itonphä tä tälho honhat tä Egipto. 17¿Wet atsi p'ante wichi tä Dios itiyej lewäk cuarenta nekchämes? Häpehen lhamel tä iwo lesukyaja, wet y'inhen tä ihi ts'anis. 18¿Wet atsi p'ante wichi tä Dios hit'untejche lhämet tä yok, “Tek nichäthihola honhat tä yämthilek owo t'elakw'eta”? Häpe t'at lhamel tä ikachuye lham lhämet.#Núm 14.1-35
19Wet häp tä mälhyejtso, y'aw'en tä wichitso ihanhiyejt'a iwoyneje yämthilek nichätho honhattso, häp tä lakachuhanyaj ihi.
Currently Selected:
Heb 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.