Heb 2
2
Amajej afwayhyaj
1Wet häp tä mälhyejtso, iwohiyet'ak niwuja che y'atch'ahuye wet y'atetshan m'ayhay tä pajche y'aläte, häpkhilek tek y'anistakej lhan'äyij. 2Tsi lhek tichunache häp Ley p'ante tälhe Moisés. Häpe t'at ángeles p'ante tä iwo silätayej Moisés, wet häpe m'ak tä kalelhäj. Wet elh che häpe che ikachuye wet niwoyaye, ikatej t'at n'otasnhayaj tä w'awulhi. 3-4Tä mälhyejtso, ¿chiwoye n'amel, tä in'amejen lhafwayhyaj tä wuj tä Lhawuk lham t'at tä ichun naji tä yen silätyaja, wet iyhäj tä iläte äp ikalelhät n'amhohen tä matche, wet Dios äp yäm kalelhäj, häp tä y'isej letetnhay, lhäy'e m'ayhay tä iselkat n'amejen lhäy'e tä hin'älit lewujyaj, lhäy'e n'otw'ayhtes tä häpe n'okhajyhayajay tä tälhe Espíritu tä T'amajchet, tä Dios hiw'enho elhpej mälhyej m'ak tä lham lenech'ethayaj? Oyok, ¿chiwoye n'amel tä mälhyejtso? ¿Chip iwoyek y'alhaifwayhthiyeja lhawit'äyhyaj, che kay'at'amajayej lhafwayhyaj tä wujna?
Jesucristo lhaitech'aynej lepuhfwas
5Tsi häpkhit'a ángeles tä Dios yen niyateyayej honhat tä nech'ayek tä ihichela tä oyämetso. 6Tsi iche lhip tä ihi N'olesaynhay tä N'ot'amajchetes tä elh yop'antekwe:
“Dios, ¿chipte tä lhen atichunhayaja hin'o?
¿Atsi m'ak tä häpe? Tsi hin'o t'at,
¿wet chipte tä lhen alhakliya?
7Lhen häpeya elh tä ángeles inu'pe ayej lhimphaj.
Leti'pe lewujyaj lhäy'e len'ohyaj,
8wet lhen niyatayej nilhokej m'ayhay.”#Sal 8.4-6
Tä mälhyejtso tä N'olesaynek p'ante yäme tä Dios yen niyatayej nilhokej m'ayhay, yäme tä niwohit m'ak che Dios nena lewuka. Mat tej tä mälhyej'attso, kamaj y'aw'enhit'a che nilhokej m'ayhay yen lewuka häp hin'o. 9Mat y'aw'en Jesús, häp lham tä Dios yen ayej häpeya lhimphaj elh tä ángeles inu'pe, yämlek y'ilpe nilhokej wichi. Häpe t'at Dios lep'altsenyaj tä iti n'amejen tä tamenej tä Jesús y'il, wet tä leteläythayaj mälhyejtso, häp tä Dios iti'pe lewujyaj lhäy'e len'ohyaj.#Fil 2.6-11; Heb 12.2
10Tsi nilhokej m'ayhay tä iche, Dios tä lhenek wet äp Lewuk t'at, wet iwatläk ichätyenho lewujyaj nilhokej leles. Häp tä tamenej Jesucristo tä Dios yen häpeya elh tä le'isyaj wak'alh wet wichi Lefwayhthi, häp tä isej leteläythayaj tä iwoye. Wet is m'ak tä Dios iwoyena. 11Tsi lhamel tä Dios t'amajchetes, lhäy'e lham Jesús tä yen t'amajchetesa, weihalha Lajcha. Häp tä tamenej tä Jesús tek n'äfwelhpe lhamel, mat yok, “Opuhfwas.” 12Wet lhämet p'ante tä ihi N'olesaynhay tä N'ot'amajchetes yok:
“Dios, oayenla silätyajayej opuhfwas,
wet oaiwunthila che oiyej ales che lhaihutwek.”#Sal 22.22
13Häte äp yok:
“Ochayaj ihiyejila häp Dios.”
Wet äp yok:
“Lhek yahinya olham lhäy'e oles tä Dios hiw'en n'oho.”#Isa 8.17-18
14Tä mälhyejtso tä n'ahäpehen Jesús leles, wet lham lhaitech'ayen at n'amejen tä n'ahäpe wichi. Lhayen hin'oya yämlek y'il, wet t'ilek ikalhi häp elh tä n'ot'ilek kaniyat, tä häpe ahättaj. 15Wet häp tä mälhyej'attso, ilanche lhamel tä lenowayhyaj tä itiyej t'ilek yen kwenkaya nilhokej ifwalas tä ihonhatena.
16Wet matche t'at, tä näm tach'ot n'amehen tä n'ahäpehen Abraham leles,#Rom 4.16; Gál 3.7 häpkhit'a ángeles che tach'ote. 17Wet lelhakli che häpe tä iyej lepuhfwas, iwohiyet'ak lhaknitech'aynayej lhamel, yämlek häpe Sacerdote tä Lhamya, wet afwtintsaj wet hap'altsentsaj tä tach'oteje wichi m'ak tä Dios ihuminche, wet itäyhtejen lhamel lech'isukyajay häp tä isej lham t'ilek, wet noj Dios lewäk. 18Wet tä leteläythayaj iyej p'ante, lhäy'e n'olhelhtshayaj, athana ihanej iwoyneje che tach'ote elhpej che häpe che n'olhelhtshayaj nichäte.
Currently Selected:
Heb 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.