Jujé 4
4
Kɔr mbalje gə́ dɔg-giree-joo
1Loo gə́ ginkoji Israɛlje lai gaŋg baa gə́ Jurdɛ̰ mba̰ ndá Njesigənea̰ ula Juje pana: 2Ɔr diŋgamje dɔg-gir-dee-joo mee ginkoji’g lə Israɛlje, diŋgam kára-kára kwɔji ne dɔ ginkoji gə́ kára-kára tɔ. 3Un ndui togə́bè ar dee pana: Odoje kɔr mbalje dɔg-giree-joo dan mán baa’d gə́ Jurdɛ̰ ndá, lé gə́ njékinjanéməsje d’aar kɔgərɔ dɔ gɔl dee’g keneŋ lé ndá awje ne aw ɔmje loo gə́ a toje keneŋ loondul’g lé.
4Juje ɓar dəwje dɔg-gir-dee-joo, to deḛ gə́ yeḛ ɔr dee kédé mbuna Israɛlje’g lé, dəw kára-kára wɔji ne dɔ ginkoji gə́ kára-kára tɔ. 5Yeḛ ula dee pana: Dəsje no̰ sa̰duk-manrɔ’g lə Njesigənea̰, Ala lə sí gə́ kédé dan mán baa’d gə́ Jurdɛ̰ gə mba kar nana kara dan sí’g un kɔr mbal kára kára dɔ tamee’g tamee’g gə goo bula lə ginkoji Israɛlje lai 6gə mba karee to gə́ nétɔji mbuna sí’g. Bèe ɓa ndɔ gə́ raŋg loo gə́ ŋgan síje d’a dəji sí pana: Kɔr mbalje gə́ tɔs dee dɔ na̰’d lé see ginee to gə́ ɗi wa ndá, 7seḭ a kula deeje pajena: Man baa gə́ Jurdɛ̰ lé kai rəa dana no̰ sa̰duk-manrɔ’g lə Njesigənea̰, loo gə́ d’unee gaŋg ne mán baa gə́ Jurdɛ̰ ndá mán baa gə́ Jurdɛ̰ kai rəa dana, yee ɓa kɔr mbalje neelé d’a to gə́ nékolé-mee lə Israɛlje gə́ a to gə no̰ lé tɔ.
8Israɛlje ra né gə́ Juje un ne ndia ar dee lé. Ndá deḛ d’odo kɔr mbalje dɔg-giree-joo dan baa’d gə́ Jurdɛ̰ to gə́ Njesigənea̰ un ne ndia ar Juje lé gə goo bula lə ginkoji Israɛlje ndá d’aw d’unda dee loo gə́ deḛ to keneŋ loondul’g lé ya tɔ. 9Juje tɔs kɔr mbalje dɔg-giree-joo gə́ raŋg dɔ na̰’d dan baa’d gə́ Jurdɛ̰ tɔ, loo gə́ njékinjanéməsje gə́ to njékun sa̰duk manrɔje d’aar naŋg keneŋ lé ndá kɔr mbalje neelé to keneŋ, un kudee mee ndəa gən saar teḛ ɓogənè tɔ.
10Njékinjanéməsje gə́ njékun sa̰duk manrɔje lé d’aar dan baa’d gə́ Jurdɛ̰ saar mba kar ndukun gə́ Njesigənea̰ un ar Juje mba karee ula dəwje gə goo néje lai gə́ Moyis un ndia dɔ’g ar Juje lé aw ne lée’g béréré ɓa koso-dəwje d’ɔs rɔ dee ɓad dəs d’aw ɓəi. 11Loo gə́ koso-dəwje dəs tar d’aw mba̰ ndá njékinjanéməsje d’un sa̰duk-manrɔ lə Njesigənea̰ lé d’aw d’aar ne no̰ koso-dəwje’g kédé tɔ. 12Ginkoji Rubḛje, gə ginkoji Gadje, gə ges ginkoji Manasə lé d’wa nérɔje ji dee’g d’ɔr ne no̰ Israɛlje to gə́ Moyis ula dee ne kédé lé tɔ. 13Diŋgamje d’as tɔl-dɔg loo rɔ-sɔ (40.000) jén bèe d’wa nérɔje ji dee’g ləm, d’aar pèrèrè mba rɔ ləm tɔ lé ndá deḛ dəs no̰ Njesigənea̰’g d’aw tar mee ndag-loo’d gə́ Jeriko tɔ. 14Mee ndəa’g neelé Njesigənea̰ ar Juje tel to dəw gə́ boo kəm koso-dəwje gə́ Israɛl lai ya ndá deḛ ɓəlee loo kaw kəmba’g ləa to gə́ deḛ ɓəl ne Moyis bèe lé ya tɔ.
15Njesigənea̰ ula Juje pana: 16Un ndui ar njékinjanéməsje gə́ d’un sa̰duk-manrɔ mba kar dee d’unda ne loo dan baa gə́ Jurdɛ̰ teḛ raga.
17Togə́bè ɓa Juje un ndia ar njékinjanéməsje pana: Undaje loo dan baa gə́ Jurdɛ̰’g teḛje raga tɔ. 18Loo gə́ njékinjanéməsje gə́ to njékun sa̰duk manrɔje lə Njesigənea̰ lé d’unda loo dan baa gə́ Jurdɛ̰ teḛ raga d’ila dabla gɔl dee dɔ naŋg gə́ tudu kurum-kurum’g ndá mán baa gə́ Jurdɛ̰ lé tel ree taa loo toree’g gogo ləm, ruba pɔ-pɔ to gə́ kédé lé ya ləm tɔ. 19Ndɔ dɔg lə naḭ gə́ dɔtar lé ɓa koso-dəwje d’unda loo dan baa gə́ Jurdɛ̰ teḛ ndá d’isi Gilgal gə́ to rəw-nim ɓee-boo gə́ Jeriko par gə́ bər lé.
20Kɔr mbalje gə́ dɔg-giree-joo gə́ deḛ tɔr dee dan baa gə́ Jurdɛ̰ lé Juje tɔs dee dɔ na̰’d mee ɓee gə́ Gilgal ya. 21Yeḛ ula Israɛlje pana: Loo gə́ ŋgan síje d’a dəji sí ndɔ gə́ raŋg pana: Kɔr mbalje gə́ tɔs dee dɔ na̰’d neelé see ginee to ɗi wa. 22Ndá seḭ a kulaje ŋgan síje taree pajena: Israɛlje njaa loo gə́ tudu kurum-kurum’g dan baa gə́ Jurdɛ̰ gə́ nee ya. 23Mbata Njesigənea̰, Ala lə sí ar baa gə́ Jurdɛ̰ kai rəa dana no̰ sí’g ar sí dəsje loo gə́ tudu kurum-kurum’g awje, to gə́ Njesigənea̰, Ala lə sí ar baa-boo-kad gə́ ria lə Baa-Kas kai ne rəa no̰ síjeḛ’g, ar síjeḛ n’dəsje ne loo gə́ tudu kurum-kurum’g j’awje ne bèe tɔ, 24mba kar dəwje lai dɔ naŋg nee d’a gər ne to gə́ ji Njesigənea̰ lé ŋgəŋ ŋgəŋ-ŋgəŋ ləm, gə mba kar sí ɓəlje ne Njesigənea̰, Ala lə sí saar gə no̰ ləm tɔ.
Currently Selected:
Jujé 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.