Romanos 7
7
Ri catakan pakawi' na e ta chi ri mac, e ri Ruxlabixel ri Dios pa kanima'
1Quinch'a't uc' alak hermanos, ri c'o na'oj alak puwi takanic. Eta'am c'u alak wa': Ri takanic xew c'o uchuk'ab puwi juna ticawex echiri' wa ticawex c'a c'aslic. 2E pacha' juna ixok c'ulanic. Rire c'o chuxe' ri tzij re ri c'ulaniquil. Ruma c'u wa' c'o puk'ab ri rachijil xalok' c'a c'as ri rachijil. No'j we xcam rachi, rixok na jinta chi puk'ab ri rachijil. 3Jec'ula' ri', we rixok cuyoj rib ruc' jun chic achi yey c'a c'as ri rachijil, ri' cabi'x che e jun ixok na jusuc' ta rubinic ma camacun chirij ri tzij re ri c'ulaniquil. No'j we xcam ri rachijil, rixok quel chuxe' rutakanic wa tzij; na camacun ta c'u ri' chirij ri c'ulaniquil we cac'uli' ruc' jun chic achi.
4Jec'ula' ralak alak nu hermanos, caminak chi alak chwach tak ri Tzij Pixab ruma rucamic ri Cristo. Wa' que'elawi na e ta chi ri Tzij Pixab ri catakan pawi' alak. Ruma c'u ri', utz cu'an alak re jun chic, wa' e ri Cristo, ri xc'astaj lo chiquixo'l ri ecaminak. Jec'ula' ri kabinic lic c'o cutikoj chwach ri Dios ruma oj c'o puk'ab ri Cristo. 5Ma ojertan echiri' c'a oj c'o pa mac, ri rayinic na utz ta uwach xc'oji' uchuk'ab puwi ri kacuerpo. Ma echiri' ri Tzij Pixab xuk'alajisaj chike sa' ri na utz taj, e más xkarayij caka'an ri na utz taj. Yey ri xutikoj wa' chike e xojuc'am bi pa camic. 6No'j wo'ora na oj jinta chi chuxe' ri k'atbal tzij re wa tzij, ma pacha' oj chi caminak che ri c'o pakawi' ojertan. Ec'u wo'ora ri'oj cakalok'nimaj ri Dios ruc' jun c'ac' kabinic ruma ruchuk'ab ri Ruxlabixel pa kanima', yey wa' na e ta chi pacha' ri kabinic ojertan echiri' xkaj caka'an jusuc' che kib chwach ri Dios ruma ri cakatakej takanic.
Rutzij Upixab ri Dios cuk'alajisaj sa' tak ri kamac
7¿Sa' c'u ri' ri cakabi'ij? ¿E neba que'elok ri Tzij Pixab na utz taj ma cuc'am lo ri mac? ¡Na e ta c'ana ri'! Ma ri'in xinweta'maj sa' ri mac ruma ri Tzij Pixab; yey we tamaji ri Tzij Pixab, na canweta'maj ta c'u ri' sa' ri mac. Ma ri'in na weta'am taj we mac ri rayinic we tamaji ri Tzij Pixab cubi'ij: «Marayij uwach ri na awe taj.»#Éx. 20:17 8Ruma c'u ri' ri takanic, ri mac cuc'osoj ronoje itzel rayinic chupa ri wanima'. We tamaji c'u ri takanic, ri mac na jinta uchuk'ab panuwi'. 9E ri petinak lok echiri' ri'in c'amaja' canmaj usuc' ri Tzij Pixab, na jinta c'o cubisoj nuc'u'x che. Pero xopon jun k'ij echiri' xinweta'maj sa' ri takanic re ri Tzij Pixab panuwi'. C'a chiri' c'u ri' xumaj uchuk'ab ri mac panuwi'; y xinmaj c'u usuc' in caminak chwach ri Dios ruma ri numac. 10E chinuwach ri'in, ri takanic re ri Tzij Pixab e caya'w c'aslemal; no'j ri xuya chwe ri'in, e ri camic. 11Ma ri mac e xuchapabej ri takanic y ruc' c'u wa', xinusoco y jela' xuc'am lo ri camic panuwi'. 12Cak'alajin c'u ri' ri Tzij Pixab re ri Dios lic santo yey tak ri takanic re ri Tzij Pixab lic santo, lic jusuc' y lic utz.
13Pero ¿e nawi que'elok e ri utz xuc'am lo camic panuwi'? ¡Na e ta ri'! Ma ri mac e xuchapabej ri utz y ruc' wa' xuc'am lo camic panuwi'. Ruma c'u ri' ri takanic re ri Tzij Pixab, xa jumul cak'alajinic lic itzel uwach ri mac.
Katuquel ri'oj na cakach'ij ta uchuk'ab ri mac
14Keta'am chi c'ut, ri Tzij Pixab petinak ruc' ri Dios. No'j ri'in xa wekam wulewal nupoklajil, yey in ya'tal c'u puk'ab ri mac. 15Na can'an ta c'u ri' ri cuaj ri'in can'ano; ma e ri tzel canwilo, e can'an ri'. Lic na canmaj ta c'u usuc' su'be can'an wa'. 16Yey echiri' e can'an ri na cuaj taj, canna' c'u ri' chinuc'u'x na utz ta ri quintajin che u'anic. Ruc' c'u ri' wa' canjiquiba' uwach lic utz ri takanic re ri Tzij Pixab. 17Jela' c'u ri' e pacha' na in ta ri quin'anaw re ri na utz taj, ma e catakan ri mac pa wanima'. 18Ri'in lic weta'am, wa in ticawex na jinta c'ana utz chwe we na jinta ri Dios wuc'. Ma tob cuaj can'an ri utz, pero nutuquel na canrik ta u'anic wa'. 19Ma na can'an ta ri utz, ri lic cuaj can'ano; e lic can'an ri na utz taj, ri na cuaj taj can'ano. 20Jec'ula' ri', we e can'an ri na cuaj taj, ri' na in ta ri quin'anaw re, ma e ri mac catakan pa wanima' ri ca'anaw re. 21Jec'ula' tob lic cuaj can'an ri utz, e ri na utz taj ri catakan panuwi'. 22Na ruc' ta c'u ri', cuna' ri wanima' e lic chom rutakanic Rutzij Upixab ri Dios y lic quinqui'cot che wa'. 23Pero canna'o c'o jun chic tzij catakan chwi ri nucuerpo; wa' e ruchuk'ab ri mac. Ec'u wa' cach'o'jinic cha' na cancoj ta utzij ri cubi'ij ri nuna'oj y jec'ula' inyututal pa mac. 24¡Lic tok'o' nuwach ri'in! ¿China quesan we ri'in puk'ab ri na utz taj c'o chwe, ri quinc'amaw bi pa camic? 25Lic cantioxij che ri Dios, ma xew Rire cato'w we'in, yey cu'an wa' ruma ri Jesucristo, ri Kanimajawal. Jec'ula' canmaj usuc' lic chirajawaxic canya wib puk'ab rutakanic Rutzij Upixab ri Dios; no'j echiri' canya wib puk'ab ri rayinic re ri nucuerpo, ri' e catakan ruchuk'ab ri mac panuwi'.
Currently Selected:
Romanos 7: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.