Romanos 8
8
Ri Ruxlabixel ri Dios e cojuto' che ri kabinic kasilabic
1Ec'u wo'ora na jinta chi k'atbal tzij re camic paquiwi janipa ri e c'o puk'ab ri Kanimajawal Jesucristo; wa' e ri na quitakem ta chi ri rayibal re ri na utz taj, ma e quitakem sa' ri caraj ri Ruxlabixel ri Dios chique. 2Ma ri Ruxlabixel ri Dios cuya chomilaj c'aslemal ruma ri Kanimajawal Jesucristo, y e rutakanic ri Ruxlabixel ri Dios pa kanima' ri xojesan lo chupa ruchuk'ab ri mac y ri camic. 3Yey rutakanic ri Tzij Pixab na jinta uchuk'ab re cojresaj lo puk'ab ri mac, ma ri'oj oj ticawex na jinta kacowil chwa ri mac. Ec'u ri na xuch'ij ta u'anic ri Tzij Pixab, ri Dios xu'ano echiri' xutak lo Ruc'ajol che ruwachulew tojbal re ri kamac, y xu'an ticawex che jela' pacha' ri'oj, no'j Rire na xmacun taj. Jec'ula', ruma rucamic jun ticawex, wa' e ri Jesús, ri Dios xuk'at tzij puwi ri kamac. 4Xu'an c'u wa' cha' utz cojbin jusuc' chwach ri Dios jela' pacha' ri cubi'ij ri Tzij Pixab; ma ri'oj na e ta chi katakem ri rayibal re ri na utz taj, e katakem sa' ri caraj ri Ruxlabixel ri Dios chike. 5Ma e tak ri quiya'om quib che tak ri rayibal re ri quiti'jil, e caquiya quina'oj puwi ri rayibal na chom taj. No'j janipa ri quiya'om quib puk'ab ri Ruxlabixel ri Dios, ri' e quiya'om quina'oj puwi janipa ri caraj ri Ruxlabixel ri Dios. 6Ma we e lic cakaya kana'oj puwi tak ri rayibal re ri kati'jil, ri' camic ri cuc'am lo chike. No'j we e lic cakaya kana'oj puwi janipa ri caraj ri Ruxlabixel ri Dios chike, ri' cuc'am lo c'aslemal y utzil chomal chike. 7E janipa ri quiya'om quina'oj xew puwi tak ri rayibal re ri quiti'jil, ri' e aj retzelal c'u'x chirij ri Dios. Ma rique na cacaj taj caquiya quib che u'anic ri Tzij Pixab re ri Dios, yey na caquich'ij tane u'anic wa'. 8Ec'u ri Dios lic na cuc'ul ta uc'u'x ri quibinic quisilabic janipa ri quiya'om quib chupa ri rayibal re ri na utz taj.
9No'j ralak na ya'om ta chi ib alak chupa wa' wa rayibal, ma e ya'om ib alak puk'ab ri Ruxlabixel ri Dios, we pakatzij wi c'o Rire pa anima' alak. Yey we c'o c'u junok na jinta ri Ruxlabixel ri Cristo pa ranima', wa' wa ticawex na re ta ri Cristo. 10No'j we c'o ri Cristo pa anima' alak, ri' c'o chomilaj c'aslemal alak ruma ri u'anom alak jusuc' chwach ri Dios, tob ri cuerpo alak cacam na ruma ri mac. 11We c'o c'u pa anima' alak ri Ruxlabixel ri Jun xuc'astajisaj lo ri Kanimajawal Jesucristo chiquixo'l ri ecaminak, ri' c'o jun k'ij Rire cuya jun c'ac' c'aslemal che ri cuerpo alak yey cu'an wa' ruma ri Ruxlabixel c'o pa anima' alak.
12Ruma c'u la', hermanos, chirajawaxic e caka'an ri utz y maka'an ri na utz taj, ma ri'oj na oj jinta chi puk'ab tak ri rayibal re ri kati'jil. 13Ma we ya'om ib alak chupa wa', ri' e cuc'am lo ri camic pawi' alak. No'j we ruc' ruto'bal ri Ruxlabixel ri Dios cacamisaj alak tak ri rayibal re ri ti'jil alak, ri' c'o c'aslemal alak chwach ri Dios. 14Ma conoje ri cac'am quiwach ruma ri Ruxlabixel ri Dios, ri' e ralc'o'al ri Dios. 15Yey ri Ruxlabixel ri Dios xc'ul alak, na e ta cuya tanchi alak chi xi'in ib; ma e cu'an ralc'o'al ri Dios che alak, y jela' utz cakabi'ij che ri Dios: «¡Tat, Lal Nukaw!» 16Ec'u ri Ruxlabixel ri Dios ri cajiquiban uwach pa kanima': Ri'oj oj chi ralc'o'al ri Dios. 17Yey ruma c'u oj ralc'o'al ri Dios, cakac'ul ri bi'tisinic u'anom ri Dios chique ri ralc'o'al, yey cakac'ul c'u wa' junam ruc' ri Cristo. Pero lic chirajawaxic wi cakatij na c'ax wo'ora pacha' ri xic'ow wi Rire, cha' jela' chikawach apanok, oj jun pa ri yacbal uk'ij Rire.
18Yey chinuwach ri'in ri c'axc'obic cakatij ri'oj wo'ora na cu'maja ta q'uenok ruc' runimal uchomalil ri Dios, ri cak'alajin kuc' chikawach apanok. 19Ma e janipa tak ri 'anatal ruma ri Dios lic roye'em chic jampala' cak'alajin quiwach ri e ralc'o'al ri Dios. 20Ma ri k'atbal tzij xu'an ri Dios paquiwi ri ticawex, xtzak ne puwi tak ri 'anatal ruma ri Dios. Y ruma c'u ri', na e ta chi u'anom pacha' ri uch'obom lo ri Dios che ri jekebal lok. E tak c'u ri 'anatal ruma ri Dios na xraj taj caya'i' chuxe' wa k'atbal tzij; na ruc' ta c'u ri', e ri Dios xuya chuxe' wa'. Pero e janipa tak ri 'anatal ruma ri Dios, c'a roye'em ri k'ij echiri' ri Dios cuyijba' na ronoje wa'. 21Ma copon na jun k'ij e janipa tak ri 'anatal ruma ri Dios, e la' junam cuc' ri e ralc'o'al ri Dios, quebesax na lo chupa ri c'axc'obic y puk'ab ri camic yey caya'i' c'u unimal chomalil chique.
22Keta'am c'ut, e janipa ri 'anatal ruma ri Dios, e pacha' cajilow pa c'axc'obic, jela' pacha' cu'an juna ixok echiri' cutzir uwach ruc' uch'uti'n.#Jn. 16:21 23Y na xew ta c'o pa c'ax janipa ri 'anatal ruma ri Dios, ma jela' coj-jilow pa c'ax konoje ri'oj, ri ya'tal chi chike ri nabe sipanic ubi'tisim ri Dios, wa' e ri Ruxlabixel ri Dios pa kanima'. Yey lic c'a c'o ne ri koye'em. E lic cakarayij copon ri k'ij echiri' ri Dios cuk'alajisaj kawach oj ralc'o'al Rire y caresaj c'u ri kacuerpo puk'ab ri c'ax y ri camic. 24Ma echiri' xojcolobetajic, xujek cacubi' pana kac'u'x che cakac'ul na ri bi'tisim lo chike ruma ri Dios y c'a koye'em wa'. Yey we cakabi'ij c'o koye'em, e que'elawi ri' c'amaja' cakac'ul ri koye'em. Ma we jun uc'ulum chi ri roye'em, ¿su'chac c'u ri' c'a caroy'ej? 25No'j we ri'oj cakoy'ej na ri c'amaja' cakilo, lic chirajawaxic c'u ri' cakachuk'ubej kib che roy'exic wa' ruc' cubulibal kac'u'x.
26Jec'ula', ri Ruxlabixel ri Dios cojuto'o echiri' na jinta kacowil, ma ri'oj na cakarik ta utz'onoxic sa' ri cajawax che ri kac'aslem; pero Rire lic cach'aw pakawi' chwach ri Dios ruc' jilowem na carikitaj ta c'ana ubi'xiquil. 27Ec'u ri Dios, ri caril ronoje ri c'o pa kanima', Rire lic cumaj usuc' sa' ri caraj ri Ruxlabixel, ma ri Ruxlabixel cach'aw pakawi' e chirij ri caraj ri Dios chike ri'oj ri oj re ri Dios.
Ruma ri Cristo cakach'ij uchuk'ab ronoje
28Keta'am c'ut, janipa ri c'ax quena'w re ri Dios, e tak ronoje ri quebic'ow chupa cato'bic cha' c'o cutikoj chique, wa' e chique janipa ri esiq'uim ruma ri Dios re caqui'an ri caraj Rire. 29Ma ri Dios ojertan lo ri' xuch'obo e c'o ri quebucha'o re quebu'ana pacha' Ruc'ajol, cha' e Rire ri nabe chiquixo'l ruq'uiyal e ralc'o'al ri Dios. 30Yey tak wa' wa c'o uch'obom lo paquiwi', xebusiq'uij c'u ri'. Ec'u wa xebusiq'uij, xu'an jusuc' chique. Yey ri xu'an jusuc' chique, e xutac'aba' uwa quik'ij.
31¿Sa' c'u ri' ri cakabi'ij che wa'? We ri Dios c'o kuc', ¿china ri c'o puk'ab cuyac rib chikij? ¡Na jinta junok! 32Yey ri Dios na xuxu'yaj tane Ruc'ajol chike, ma xuya lok cha' co'lcam che ruwachulew kuma konoje ri oj aj mac. ¿Na cuya ta cami ri' chike junam ruc' Ruc'ajol, ronoje ri cajawax chike? ¡Cuya'o! 33¿China ri c'o puk'ab cucoj quimac ri ebucha'om ri Dios? ¡Na jinta junok! Ma ri Dios e ca'anaw jusuc' chique. 34¿China ri c'o puk'ab cuk'at tzij pakawi'? ¡Na jinta junok! Ma ri Cristo cach'aw pakawi' chwach ri Dios, yey e Rire ri xcam kuma ri'oj. Y na xew ta wa', ma xc'astaj lo chiquixo'l ri ecaminak y wo'ora tz'ul puwiquik'ab ri Dios.
35¿C'o neba quesan ke'oj chupa ri rutzil uc'u'x ri Cristo? ¡Na jintaj! Ma tob cape c'axc'obic o paxibal c'u'x pakawi', tob cojternabex ruc' c'ax, tob na jinta kawa y na jinta kak'u', tob catewun c'ax pakawi' o cojcamisax ruc' espada, ¡na jinta c'o cojesan chupa! 36Ma jewa' ri tz'ibital can pa Ruch'a'tem ri Dios:
Uma Rilal 'anom chike xaki catewun ri camic pakawi';
'Anom chike pacha' ri ca'an che ri bexex
echiri' cac'am bi pa camic Sal. 44:22
cacha'. 37Na ruc' ta c'u ri', lic cakach'ij uchuk'ab ronoje ruma ri Jun lic c'ax xojuna'o.
38Ruma c'u la', ri'in lic nujiquibam uwach na jinta c'ana cojesan chirij ri rutzil uc'u'x ri Dios. Na cojresaj taj tob ne e ri camic o ri c'aslemal, tob ne e ri ángeles, ri c'o quiwach y ri c'o quichuk'ab. Na cojresaj taj tob ne e ri cojtajin che uc'ulumaxic wo'ora o ri cakac'ulumaj chikawach apanok, 39tob ne e ri e c'o lo c'a che ruwa caj o ri e c'o lo c'a chuxe' rulew. Na jinta c'u c'o 'anatal ruma ri Dios cojesan chirij ri rutzil uc'u'x, ri xkac'ul ruma ri Cristo Jesús, ri Kanimajawal.
Currently Selected:
Romanos 8: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.