Romanos 6
6
C'o kac'aslemal ruma ri Cristo
1¿Sa' c'u ri' ri cakabi'ij ri'oj? ¿C'a cojc'oji' cami ri' pa mac cha' ri Dios e lic cunimarisaj ri unimal rutzil uc'u'x pakawi' echiri' cucuy ri kamac? 2¡Na e ta c'ana ri'! Ma e janipa ri na oj jinta chi puk'ab ri mac, na ube ta q'uenok we c'a cojc'oji' chupa wa'. 3¿Na eta'am ta neba ralak e janipa ri xkac'ul ri bautismo, xoju'an xa jun ruc' ri Kanimajawal Jesucristo? Yey ruma wa', xoju'an xa jun ruc' pa rucamic. 4Ruma c'u ri bautismo xkac'ulu, e pacha' junam ruc' ri Cristo xojcamic y xojmukic, cha' jela' cojc'astaj lo che jun c'ac' kabinic jela' pacha' ri Cristo xc'astaj lo chiquixo'l ri ecaminak ruma runimal uchuk'ab ri Kakaw Dios. 5Ma we x'an xa jun chike ruc' ri Cristo chupa rucamic, jec'ula' ri' xa jun ka'anom ruc' chupa ruc'astajibal. 6Lic c'ut keta'am e ri ojer kabinic kasilabic xcam ruc' ri Cristo chwa ri cruz cha' jela' casach uwach ruchuk'ab ri mac pakawi' y jec'ula' ri mac na catakan ta chi pakawi' ri'oj. 7Ma e junok caminak chi che ri mac, ri' na jinta chi uchuk'ab ri mac puwi'. 8Ma we xojcam junam ruc' ri Cristo,#6:8 E pacha' xojcam junam ruc' ri Cristo ma Rire xcam pakac'axel ri'oj. jec'ula' ri' lic cakacojo c'o kac'aslem ruc' Rire wo'ora y chikawach apanok. 9Lic keta'am c'ut, ri Cristo ruma xc'astaj lo chiquixo'l ri ecaminak, na cacam ta chic, ma ri camic na jinta chi uchuk'ab puwi Rire. 10Ma ruc' rucamic xa jumul xusachisaj uwach ruchuk'ab ri mac; yey ruma c'u xc'astajic, e culok'nimaj ri Dios ruc' ruc'aslemal. 11Jec'uri'la' c'ola chic'u'x ralak e pacha' alak caminak chi chwach ri mac yey alak c'aslic re calok'nimaj alak ri Dios, ma alak re ri Cristo Jesús, ri Kanimajawal. 12E uwari'che lic maya alak luwar catakan ri mac puwi ri cuerpo alak, ma wa' xa ic'owel. Maya ne ib alak chupa tak ri rayibal na utz ta uwach. 13Maya ne ri cuerpo alak puk'ab ri mac che u'anic ri na jusuc' taj. E ya'a ib alak puk'ab ri Dios, ma alak caminak chi chwa ri mac y alak c'as che jun c'ac' binic silabic. Ya'a c'u alak ri' ri cuerpo alak puk'ab ri Dios cha' ruc' wa' ca'an alak ri lic jusuc' chwach. 14Ma ri mac na jinta chi uchuk'ab re catakan pawi' alak y na jinta chi ne alak chuxe' ri k'atbal tzij re rutakanic ri Dios tz'ibital can ruma ri Moisés, ma wo'ora c'o alak puk'ab ri Dios ruma ri unimal rutzil uc'u'x Rire.
Kaya'a kib che u'anic ri lic jusuc' chwach ri Dios
15¿Sa' c'u ri' ri caka'ano? ¿Cojmacun cami ri' ma ri k'atbal tzij re rutakanic ri Dios na jinta chi pakawi' yey e oj c'o puk'ab ri Dios ruma ri unimal rutzil uc'u'x Rire? ¡Na e ta c'ana ri'! 16¿Na eta'am ta neba alak we caya ib alak puk'ab junok che u'anic janipa ri caraj rire, ri' e cu'ana patrón alak y chirajawaxic c'u ri' cacoj alak utzij? Jec'uri'la' we caya ib alak puk'ab ri mac che u'anic ri na utz taj, ri' cuc'am bi alak pa camic. No'j echiri' caya ib alak puk'ab ri Dios re cacoj alak utzij, wa' cuc'am bi alak che jun jusuc' binic silabic.
17Lic maltiox c'u che ri Dios, ma tob ojertan xya' ib alak puk'ab ri mac che u'anic tak ri rayibal alak; no'j wo'ora ruc' ronoje c'u'x alak ya'om ib alak che u'anic tak ri sakil c'utunic xya' che alak. 18Ruma c'u ri xel lo alak puk'ab ri mac, wo'ora e xya' ib alak che u'anic ri lic jusuc' chwach ri Dios.
19Xinya wa c'ambal na'oj puwi ri patrón y ri aj chaquib cha' cak'alajin ri cambi'ij y na c'ayew taj camaj alak usuc'. Cambi'ij c'u che alak: Jela' pacha' rojertan xya alak ronoje ri uchapom wi rib ri cuerpo alak che u'anic ri lic ch'ul y ri lic itzel uwach, jec'uri'la' wo'ora ya'a alak ronoje ri uchapom wi rib ri cuerpo alak che u'anic janipa ri lic chom y lic jusuc' chwach ri Dios. 20Ma rojertan echiri' c'a c'o alak puk'ab ri mac, na ya'om ta ib alak che u'anic ri lic jusuc' chwach ri Dios. 21¿Sa' ri xutikoj che alak janipa ri na utz taj x'an alak ojertan? Ma wo'ora caq'uix ne alak che tak wa' wa cuc'am bi jun pa camic. 22Ec'u wo'ora ruma alak esam chi lo puk'ab ri mac, xu'ana c'u alak aj chaquib re ri Dios. Ri xutikoj wa' che alak e ri santowilaj binic silabic alak; yey q'uisbal c'u re, e ri c'aslemal na jinta utakexic. 23Ma ri tojbal re ri mac e ri camic, no'j ri sipanic cuya ri Dios e ri c'aslemal na jinta utakexic ruma ri Kanimajawal Jesucristo.
Currently Selected:
Romanos 6: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.