Romanos 5
5
Ri utzil chomal cakarik ruc' ri Cristo
1Ri Dios xu'an jusuc' chike ruma ri cubulibal kac'u'x ruc'; ec'u wo'ora oj c'o chi utzil chomal ruc' Rire ruma ri Kanimajawal Jesucristo. 2Yey ruma ri Cristo, xya' chike cojoc chwach ri Dios ruma ri cubulibal kac'u'x y jela' cakac'ul ri unimal rutzil uc'u'x pa oj tiquil wi chi utz. Yey lic cojqui'cotic ma koye'em que'kila na runimal uchomalil ri Dios. 3Y na xew ta wa', ma lic ne cojqui'cotic echiri' cape c'axc'obic pakawi'. Ma keta'am we xkach'ij uchuk'ab ri c'axc'obic, lic cac'oji' unimal kac'u'x. 4Ruma c'u runimal kac'u'x cojelic utz ka'anom chwach ri Dios, ma xkach'ij uchuk'ab ri c'ambal kapa. Yey we xojelic utz ka'anom chwach ri Dios, e lic cacubi' pan kac'u'x ruc' Rire. 5Lic c'u jiquil uwach cakac'ul na ri koye'em che ri Dios, ma Rire lic uc'utum ri rutzil uc'u'x chike ruma ri Santowilaj Ruxlabixel uya'om pa kanima'.
6Ma ri'oj na jinta c'ana kachuk'ab re cakacolobej kib; yey chupa c'u ruk'ijol ucha'om chi lo ri Dios, xc'un ri Cristo y xuya rib pa camic cha' cojucolobej ri oj aj maquib. 7Lic c'ayew carikitaj junok cuya rib pa camic puc'axel jun chic lic jusuc' rubinic usilabic; tob ne laj c'o junok cuya ranima' cacam puc'axel junok lic utz uc'u'x. 8No'j ri Dios uk'alajisam chi ri rutzil uc'u'x chikawach ri'oj, ma ri Cristo xcam pakac'axel echiri' c'a oj c'o ne pa mac. 9We x'ani' c'u jusuc' chike ruma ruquiq'uel, mac'uwari' ruma Rire cojcolobetaj na chwach ri k'atbal tzij cu'an ri Dios chupa ri q'uisbal k'ij. 10E rojertan ri'oj oj aj retzelal c'u'x chirij ri Dios; na ruc' ta c'u ri', ri Dios xojuya chi utzil chomal chwach ruma rucamic Ruc'ajol. Mac'uwari' we oj c'o chi pa utzil chomal chwach, caya'taj na c'u ri' ri kacolobetajic ruma ri Cristo, ma Rire xc'astaj lo chiquixo'l ri ecaminak yey wo'ora c'aslic. 11Y na xew ta wa', ma lic cojqui'cot ruc' ri Dios ruma ri Kanimajawal Jesucristo, ma ruma Rire karikom utzil chomal chwach ri Dios.
Ri xuc'am lo ri Adán e camic y ri xuc'am lo ri Cristo e c'aslemal
12Ri mac xoc lo che ruwachulew ruma ri Adán, ri nabe achi; yey ri mac e xuc'am lo ri camic. Jec'ula' xpe ri camic paquiwi conoje ri ticawex, ma conoje xemacunic. 13Echiri' ri Dios c'amaja' ne cuya Rutzij Upixab che ri Moisés, ri mac oquinak chi che ruwachulew. Katzij, we na jinta takanic, na utz taj cabi'xic c'o junok xupalajij tzij. 14Na ruc' ta c'u ri', chwi lo ri Adán c'a chwa ri Moisés, tak ri winak xecam ruma ri quimac, tob ri quimac na junam ta ruc' ri xu'an ri Adán echiri' xupalajij ri takanic re ri Dios. Yey ri Adán e pacha' ri Jun cac'unic, wa' e ri Jesucristo.#5:14 Ri Adán y ri Jesús c'o xquic'am lo che ruwachulew; ri Adán xuc'am lo camic, no'j ri Jesús xuc'am lo c'aslemal. 15Pero ri xuc'am lo ri palajibal tzij re ri Adán lic junwi chwa ri sipanic xuc'am lo ri Kanimajawal Jesucristo. Ma ruma rupalajibal tzij jun chi achi, xecam conoje ri winak; yey ruma c'u ri unimal rutzil uc'u'x jun chi Achi, ri sipanic re ri unimal rutzil uc'u'x ri Dios más ne xnimar paquiwi uq'uiyal ticawex. 16Ec'u ri xuc'am lo ri mac re ri jun achi, lic junwi chwa ri xuc'am lo ri sipanic cuya ri Dios chike. Ma ruma jun chi mac re jun chi achi, xc'un ri k'atbal tzij paquiwi conoje ri ticawex. No'j ruma ri sipanic re ri Dios, casachisax uwach ri uq'uiyal mac que ri ticawex cha' jela' utz quec'oji' jusuc' chwach ri Dios. 17Xa c'u ruma rupalajibal tzij jun chi achi, conoje ri winak xecanaj can chuxe' ruchuk'ab ri camic. Yey ruma c'u jun chi Achi, wa' e ri Kanimajawal Jesucristo, janipa ri quic'ulum ri unimal rutzil uc'u'x ri Dios y ri sipanic re quebu'an jusuc' chwach, quejeki' chupa jun chomilaj c'aslemal.
18Ec'u ri palajibal tzij re jun chi achi xuc'am lo k'atbal tzij paquiwi conoje ri ticawex, jec'uri'la' ruma ri jusuc' binic re jun chi Achi, caya'taj chique conoje ri ticawex jun chomilaj c'aslemal ruma ri ebu'anom jusuc' chwach ri Dios. 19Yey xa ruma c'u jun chi achi xupalajij rutzij ri Dios, lic e q'ui ri xebu'an aj maquib; jec'uri'la', ruma jun chi Achi xucoj utzij ri Dios, lic e q'ui ri quebu'an jusuc' chwach.
20Ec'u ri Dios xuya Rutzij Upixab che ri Moisés cha' jela' cak'alajin ruq'uiyal uwach ri mac. Y e xu'ano, ma ruc' wa Tzij xk'alajin ruq'uiyal quimac ri winak chwach ri Dios. Yey ec'uchiri' más xemacun ri winak, e ne más xnimar ri unimal rutzil uc'u'x ri Dios paquiwi'. 21E jela' pacha' ri mac c'o uchuk'ab cha' cuc'am lo camic paquiwi conoje ri winak; jec'ula' ri' ri unimal rutzil uc'u'x ri Dios c'o uchuk'ab cha' cu'an jusuc' chique ri winak chwach ri Dios, y jela' c'o quic'aslemal na jinta utakexic ruma Jesucristo, ri Kanimajawal.
Currently Selected:
Romanos 5: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.