Romanos 4
4
Ri cubulibal uc'u'x ri Abraham ruc' ri Dios
1¿Sa' c'u ri' cakabi'ij puwi ri Abraham, ri nabe kamam ojertan ri oj aj Israel? ¿Su'anic x'ani' jusuc' che rire chwach ri Dios? 2We ta ri Abraham x'an jusuc' che chwach ri Dios ruma tak ri chac xu'an xa pa ri're, takal c'u ri' che cutac'aba' uk'ij; tob wa' na jinta que'elawi chwach ri Dios. 3Ma ¿sa' ri cubi'ij Ruch'a'tem ri Dios? Jewa' cubi'ij:
Ri Abraham xucojo ri Dios e cu'ana janipa ri xubi'tisij che
y ruma c'u ri' x'ani' jusuc' che Gn. 15:6
cacha'.
4Echiri' juna aj chac cachacunic, caya'i' ri takal che; yey wa' na e ta jun sipanic, ma uch'acom chic. 5No'j na je ta c'u la' echiri' ri Dios cu'an jusuc' che junok. Ma wa' e jun sipanic re ri Dios, na e ta tojbal re juna chac 'anatalic. Ma juna ticawex na cu'an ta jusuc' che rib ruma lic cachacunic; e ca'an jusuc' che xew ruma ri cubulibal uc'u'x ruc' ri Dios, ri ca'anaw jusuc' chique raj maquib. 6Yey ri David ubi'im canok nim quik'ij calaxic ri ticawex we ri Dios cu'an jusuc' chique y wa' na e ta ruma juna chac qui'anom, 7ma jewa' xubi'ij:
¡Nim quik'ij calaxic ri ticawex cuytajinak chi quimac
y sachom chi uwach ri na utz taj qui'anom!
8¡Nim c'u quik'ij calaxic ri ticawex
na jinta chi ri k'atbal tzij re ri Dios paquiwi'! Sal. 32:1-2
xcha'.
9Echiri' cubi'ij «nim quik'ij calaxic», ¿xew nawi cach'a't paquiwi ri quicojom ri retalil re circuncisión? ¡Na xew taj! Ma cach'a't paquiwi ri quicojom ri retalil re circuncisión y paquiwi ri na quicojom taj.#4:9 Ri quicojom ri retalil re circuncisión e ri e aj judi'ab, yey ri na quicojom taj; e ri na e ta aj judi'ab. Yey kabi'im puwi ri Abraham: X'ani' jusuc' che rire ruma ri cubulibal uc'u'x ruc' ri Dios.#Gn. 15:6 10¿Jampa nawi x'an jusuc' che ri Abraham? ¿C'a e nawi echiri' ucojom chi ri retalil re circuncisión? ¡Na e taj! Ma c'amaja' ne cucoj wa' echiri' ri Dios xu'an jusuc' che; tec'uchiri' xcoj ri retalil re circuncisión che. 11Wa retalil re circuncisión ucojom e c'utubal re ri cubulibal uc'u'x, ri xuc'utu echiri' c'amaja' cucoj wa'. Ruma c'u la', xe'elok e rire ri quikaw conoje ri cacubi' quic'u'x ruc' ri Dios, tob na xcoj tane wa' wa retalil re circuncisión chique. Jec'ula', ruma ri cubulibal quic'u'x ca'an jusuc' chique chwach ri Dios. 12Ri quicojom ri retalil re circuncisión e ralc'o'al can ri Abraham; pero xew takal chique caquibi'ij quikaw che rire we caquic'ut ri cubulibal quic'u'x ruc' ri Dios che ri quibinic quisilabic, pacha' ri xu'an ri kamam Abraham echiri' c'amaja' ne cucoj ri retalil re circuncisión.
13Ri Dios xubi'tisij che ri Abraham y chique conoje ri e ralc'o'al canok, cu'an na que rique ronoje ruwachulew. Pero wa bi'tisinic na x'an ta che ri Abraham ruma xutakej ri takanic re ri Tzij Pixab,#4:13 Wa Tzij Pixab tz'ibital can ruma ri Moisés c'amaja' caya'tajic echiri' c'a c'as ri Abraham. Gn. 22:17-18; Gl. 3:17 ma e ruma lic xcubi' uc'u'x ruc' ri Dios. Ruma c'u ri', ri Dios xu'an jusuc' che. 14We ta e la' c'o paquik'ab tak ri winak caquic'ul rubi'tisim ri Dios ruma caqui'an ronoje ri takanic re ri Tzij Pixab, na jinta c'u cutikoj ri' ri cubulibal quic'u'x ruc' ri Dios, yey na jinta ne uchac ri' rubi'tisim ri Dios, ma na jinta junok curik u'anic ronoje ri takanic. 15Ma ri Tzij Pixab e cuc'am lo ri k'atbal tzij paquiwi ri e aj palajiy tzij. Pero we ta e la' na jinta takanic, na jinta aj palajiy tzij ri'.
16Ruma tak wa', ri ticawex caquic'ul rubi'tisim ri Dios xew ruma ri cubulibal quic'u'x ruc' Rire. K'alaj c'u ri', wa sipanic xa e ruma ri unimal rutzil uc'u'x Rire, cha' jela' c'o paquik'ab conoje ri ralc'o'al ri Abraham caquic'ul na ri bi'tisim chique ruma ri Dios. Yey e ralc'o'al ri Abraham na xew ta ri c'o ri Tzij Pixab re ri Moisés paquik'ab, ma e ralc'o'al conoje ri cubul quic'u'x ruc' ri Dios jela' pacha' ri xu'an ri Abraham. Ec'u rire e kakaw konoje ri'oj 17chwach ri Dios, jela' pacha' ri tz'ibital can pa Ruch'a'tem ri Dios: «Nu'anom chawe at quikaw ticawex che uq'uiyal tinamit»#Gn. 17:5 xcha'. Ri Dios xubi'ij wa' che ri Abraham, yey rire xucojo; ma lic xcubi' uc'u'x ruc' ri Dios, ri cuya c'aslemal chique ri ecaminak y cach'a't chwi ri c'amaja' cu'ano pacha' chi ya u'anom chic.#4:17 Ri Dios xch'a't paquiwi tak ri e ralc'o'al ri Abraham echiri' c'amaja' quebalaxic.
18Ec'u ri Abraham xucojo cu'ana quikaw ticawex che uq'uiyal tinamit jela' pacha' ri bi'tisinic 'anom che ruma ri Dios echiri' xubi'ij che: «Lic e q'ui quebu'ana rawalc'o'al.»#Gn. 15:5 Yey tob chwach ri Abraham wa' lic c'ayew, na ruc' ta c'u ri', lic xroye'ej ruc' cubulibal c'u'xaj jela' cu'ana'. 19Y na xk'ob ta ri cubulibal uc'u'x tob reta'am rucuerpo e pacha' caminak chic ma ya copon pa jun ciento rujunab y reta'am ri rixokil Sara na calan taj. 20Na ruc' ta c'u ri', na queb ta ne upa xucoj ri xubi'tisij ri Dios che, ma e lic xuchuk'ubej rib che ri cubulibal uc'u'x ruc' ri Dios. Lic c'u xuyac uk'ij ri Dios, 21ma lic ujiquibam uc'u'x e ri Dios c'o uchuk'ab re cu'an ronoje rubi'tisim. 22Y ruma c'u ri cubulibal uc'u'x, x'ani' jusuc' che.
23Ec'uchiri' Ruch'a'tem ri Dios cubi'ij: «X'ani' jusuc' che ruma ri cubulibal uc'u'x,» wa' na xew ta puwi ri Abraham xtz'ibax wi; 24ma e pakawi' ne ri'oj. Ma ri Dios cu'an jusuc' chike ri'oj ri cacubi' kac'u'x ruc' ri Jun xuc'astajisaj lo ri Jesús, ri Kanimajawal. 25Ec'u ri Jesús xya' pa camic ruma ri kamac ri'oj y xc'astaj bi churox k'ij cha' jela' coju'ana jusuc' chwach ri Dios.
Currently Selected:
Romanos 4: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.