Hebreos 7
7
Ri Jesús y ri Melquisedec
1Wa' wa Melquisedec e rey re ri tinamit Salem y aj chacunel chwach ri Dios Kajawxel echiri' ri Abraham tzelejinak lo pa ri ch'a'oj pa xuch'ij wi quichuk'ab jujun reyes. Ec'u ri Melquisedec xu'c'ulu pan ri Abraham y xutz'onoj ri rutzil uc'u'x ri Dios puwi'. 2Tec'uchiri' ri Abraham xresaj rudiezmo che ri xu'ch'aca lo pa ch'a'oj y xuya che ri Melquisedec. Ri bi'aj Melquisedec que'elawi: “Rey Jusuc'” yey ri jun chic ubi' e “Rey re Salem”, wa' que'elawi: “Rey re Utzil Chomal”.#Gn. 14:17-20 3Na jinta xeta'max paquiwi ruchu-ukaw o paquiwi ri ratz-uchak' ri Melquisedec; y na jinta ne xeta'max puwi ri jekebal re o ri q'uisbal re ruc'aslem. Na jinta c'u utakexic rire e aj chacunel chwach ri Dios jela' pacha' Ruc'ajol ri Dios.
4Ch'obo pe alak puwi runimal uwach ri Melquisedec, ma ri kamam Abraham xresaj ne rudiezmo che ri xu'ch'aca lo pa ch'a'oj y xuya che. 5Pakatzij wi, ri e aj chacunel pa Rocho Dios quebel lo chiquixo'l ri e ralc'o'al can ri Leví. Ec'u ri takanic utz'ibam can ri Moisés cubi'ij xew rique c'o paquik'ab caquic'ul chique ri tinamit ri diezmo che ronoje ri c'o cuc', tob ri quekasanic e ralc'o'al can ri Abraham jela' pacha' ri quec'uluw re wa'. 6No'j ri Melquisedec tob na e ta cuq'uil ri ralc'o'al can ri Leví, xuc'am rudiezmo ri Abraham, y xutz'onoj ri rutzil uc'u'x ri Dios puwi ri Abraham, ri jun x'an ri bi'tisinic che ruma ri Dios. 7C'o c'u más uwach ri Melquisedec chwa ri Abraham ma konoje keta'am we c'o junok cutz'onoj ri rutzil uc'u'x ri Dios puwi jun chic, ri' más c'o uwach chwa ri cac'uluw re wa'. 8Ri ralc'o'al ri Leví, ri quec'uluw re ri diezmo pa ri Rocho Dios, rique e ticawex xa quecamic; no'j ri Melquisedec cabi'x che pacha' e jun c'a c'aslic. 9Pa ri takanic re ri Moisés, e ri ralc'o'al can ri Leví ri takal chique quec'uluw re ri diezmo. Na ruc' ta c'u ri', echiri' ri Abraham xuya rudiezmo che ri Melquisedec, e pacha' e ri Leví xuya rudiezmo che; 10ma tob ri Leví c'amaja' ne calaxic, e junam ruc' c'o chi ruc' rumam Abraham echiri' xe'c'ul pan ruma ri Melquisedec. 11Chique ri e ralc'o'al ri Leví xya' wi ri quebu'an e aj chacunel pa Rocho Dios.#7:11 Ri quichac raj chacunel pa Rocho Dios e caquic'ut ri Tzij Pixab re ri Dios chiquiwach ri tinamit, quech'aw chwach ri Dios paquiwi ri tinamit, quequicamisaj rawaj chwi raltar y caquic'ul tak ri kasa'n. We ta e la' casuc'upitaj ri ticawex cuma rique, ¿sa' c'u cutikoj ri' cayactaj jun chic aj chacunel chwach ri Dios pacha' ri Melquisedec, yey na e ta pacha' ri Aarón,#7:11 Ri Aarón e nabe cajawal raj chacunel pa Rocho Dios echiri' ri Dios xuya Rutzij Upixab che ri Moisés. ri jun ralc'o'al can ri Leví? 12Ma we ta c'o junok cac'oji' aj chacunel pa Rocho Dios yey na e ta cuq'uil ri e ralc'o'al can ri Leví, ri' lic chirajawaxic wi cajalc'atix ri takanic tz'ibital can ruma ri Moisés puwi china ri takal che cu'an aj chacunel pa Rocho Dios. 13Ec'u ri Kanimajawal, ri Jun cach'a't Ruch'a'tem ri Dios puwi',#Heb. 7:17 Rire na e ta cuq'uil ri e ralc'o'al can ri Leví pa quipetebem wi ri queniman chwach ri altar re ri Dios. Ma Rire e cuq'uil ri ralc'o'al can ri Judá, yey na jinta junok chique rique xu'an aj chacunel pa Rocho Dios. 14Ma lic k'alaj ri Kanimajawal e jun chique ri e ralc'o'al can ri Judá y paquiwi rique na jinta ne xuch'a'tibej can ri Moisés puwi ri chac pa Rocho Dios. 15Y wa' más cak'alajinic we cakamaj usuc', ri Jun xcojic re cach'aw paquiwi ri ticawex, e pacha' ri Melquisedec. 16Ma ri Jesús na xu'an ta aj chacunel pa Rocho Dios jela' pacha' ri cubi'ij ri takanic re ri Tzij Pixab; ma chupa wa' cak'alajin wi xew ri e ralc'o'al can ri Leví quecojic e aj chacunel pa Rocho Dios, no'j Rire xcojic ruma ruchuk'ab ruc'aslemal na jinta casachaw uwach. 17Ma jewa' cubi'ij ri Dios chwi Rire:
Ri'at na jinta utakexic catc'oji'ic at waj chac,
ri catch'aw paquiwi ri ticawex chinuwach Ri'in
jela' pacha' ri Melquisedec#Gn. 14:17-20 Sal. 110:4
cacha'.
18Ec'u ri takanic paquiwi raj chacunel pa Rocho Dios na jinta chi cutikoj, ma wa' na jinta ucowil y na jinta uchuk'ab re quebucolobej ri ticawex. 19Ma na jinta junok cu'ana jusuc' ruma ri takanic. Yey wo'ora c'o ri más cubul pan kac'u'x che, y ruma c'u ri' wa', utz cojkib ruc' ri Dios.
20Echiri' ri Dios xuya che ri Jesús cach'aw paquiwi ri ticawex chwach Rire, e lic xujiquiba' uwach ri xu'ano. 21Ma ri jujun chic aj chacunel pa Rocho Dios xa e cojotalic y na jinta c'o xjiquibax uwach chique. No'j chwi ri Jesús lic c'o jiquibam uwach, ma chupa Ruch'a'tem ri Dios, jewa' cubi'ij:
Ri Dios lic xujiquiba' uwach ri xubi'ij,
y na cujec' ta c'ana rib che wa' wa xubi'ij:
“Ri'at na jinta utakexic catc'oji'ic at waj chac,
ri catch'aw paquiwi ri ticawex chinuwach Ri'in
jela' pacha' ri Melquisedec.”#Gn. 14:17-20 Sal. 110:4
22E uwari'che, ri Kanimajawal Jesucristo e xjiquiban uwach jun Tzij más c'o uwach chwa ri nabe.
23E tak ri jujun chic e aj chacunel pa Rocho Dios na quecowin taj, ma xa quecamic yey paquic'axel rique quecanaj can jujun chic. Ruma la' lic xebu'ana e q'ui. 24No'j ri Jesús ruma na jinta utakexic ruc'aslemal, na jinta c'u utakexic ri chac cu'ano re cach'aw pakawi' chwach ri Dios. 25Ruma c'u wa' na jinta utakexic ri colobetajic cuya ri Jesús chique ri quekib ruc' ri Dios ruma Rire. Yey ruma na jinta utakexic ruc'aslemal, c'o puk'ab xaki cach'aw lo paquiwi' chwach ri Dios.
26E Rire ri Kajawal lic cajawax chike cach'aw pakawi' chwach ri Dios, ma xuc'ut jun binic lic jusuc', na jinta c'ana rak'ubal xu'ano, na jinta c'ana umac, na xu'an tane re cuc' raj maquib y wo'ora yactal uk'ij chila' chicaj chwi ronoje tak ri u'anom ri Dios. 27Na cajawax ta c'u che Rire cu'an pacha' ri xqui'an ri jujun chic cajawal raj chacunel pa Rocho Dios. Ma rique ri jujun k'ij, nabe na caquiya puwi raltar ri awaj ecamisam ruma ri quimac rique, y c'a tec'uchiri', caquiya ri awaj ecamisam ruma ri quimac ri tinamit. No'j ri Jesús xa julaj xuya rib pa c'axc'obic cuma conoje ri winak. 28Ec'u ri takanic re ojertan catakan che cacoj cajawal raj chacunel pa Rocho Dios. Yey tak wa cajawal xa e achijab y ruma ri' na caquich'ij ta u'anic ronoje Rutzij Upixab ri Dios. No'j wo'ora ri Dios xujiquiba' uwach, Ruc'ajol e Kajawal cach'aw lo pakawi' yey na jinta c'u utakexic xew Rire cu'an chi jusuc' y tz'akat janipa ri uya'om ri Dios puk'ab.
Currently Selected:
Hebreos 7: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.