Hebreos 6
6
1E uwari'che chojq'uiy chwach ri Dios, na xew ta que'ec kana'oj chwi lo ri nabe c'utunic puwi ri Cristo; wa' e c'utunic puwi ri rok'otaxic tak can ri na jinta cutikoj ma xew cuc'am lo camic, c'utunic puwi ri cubulibal c'u'xaj chwach ri Dios, 2c'utunic puwi ri bautismo, c'utunic puwi tak ri cac'ul che ri Dios echiri' raj wach re riglesia caquiya ri quik'ab puwi junok,#Hch. 8:17; 19:6 c'utunic puwi ri c'astajibal que ri ecaminak y c'utunic puwi ri k'atbal tzij cu'an ri Dios paquiwi ri ticawex pa ri q'uisbal k'ij yey ri cubi'ij Rire na jinta utakexic e cu'ano.#6:2 Copon ri k'ij echiri' ri Dios cubi'ij china chique caya'i' wi ri c'aslemal na jinta utakexic y china tak ri queya' pa ri camic na jinta utakexic. Ap. 20:11-15 3Cojq'uiy c'u ri' xew we ri Dios cuya kaq'uiyibal.
4Ma we e c'o ri xquicoj ri K'ijsak julajok, lic xequi'cot ruc' ri sipanic re chila' chicaj, e jun cuc' ri xquic'ul ri Santowilaj Ruxlabixel ri Dios, 5lic xuc'ul quic'u'x ri Utzilaj Tzij re ri Dios y xquina' ne ruchuk'ab ri Dios ri lic cak'alajisax pa sakil wi chikawach apanok; 6yey we rique caquesaj quib chirij ri Cristo, ri' na caya'taj ta chi chique caquitzelej quitzij y quetzelej tanchi pa ri K'ijsak. Ma e pacha' quetajin tanchi che ucamisaxic Ruc'ajol ri Dios chwa ri cruz y caquiq'uixbesaj Rire chiwachil ruma ri caqui'ano.
7Ma ri c'o quiq'uiyibal chwach ri Dios e jela' pacha' rulew echiri' cutz'ubaj chi utz ri jab catzakic. We xel c'u lo ri' ri tico'n, ri rutzil uc'u'x ri Dios cac'oji' puwi wu'lew, ma xuya ri cajawax chique ri xeticow re. 8No'j we chwa rulew xew quel lo q'uix y tzacam, ri' na jinta c'ana uchac chwach ri Dios. Ruma c'u ri', cak'at tzij puwi' y chikawach apanok caporox uwach.
Lic jiquil uwach rubi'tisim ri Dios chike
9Hermanos ri lic c'ax canna' alak, tob c'u jewa' ubi'xiquil can'an che alak, nujiquibam nuc'u'x na esam ta ib alak chirij ri Cristo y c'o alak pa ri be re colobetajic. 10Ri Dios lic jusuc' ma na cumesc'utaj ta ri chomilaj chac 'anom alak pa rubi' y ri rutzil c'u'xaj c'utum alak chique ri quicojom rubi', ma lic xenimaj alak y c'a catajin ne alak che u'anic wa' wo'ora. 11Yey ri cakaj ri'oj e chijujunal alak chuk'ubej ib alak che u'anic ri utz wo'ora y c'a echiri' copon na ruk'ijol cac'ul alak janipa ri oye'em alak che ri Dios. 12Mu'an ne alak xepu, e 'ana alak ri utz jela' pacha' ri caqui'an janipa ri lic cubul quic'u'x ruc' ri Dios y na capax ta quic'u'x che ri c'axc'obic yey ruma c'u wa' caquic'ul ri ubi'tisim lo ri Dios chique.
13Ma echiri' ri Dios xu'an rubi'tisinic che ri Abraham, xujiquiba' uwach wa' chupa rubi' Rire ma na jinta chi junok más c'o uwach chwa Rire. 14Jewa' xubi'ij che:
Pakatzij wi lic catin'an bendecir
y canq'uiyarisaj quiwach rawalc'o'al Gn. 22:16-17
xcha'.
15Ri Abraham lic naj xroye'ej wa' ruc' unimal uc'u'x y jec'ula' xuc'ul rubi'tisim ri Dios che.
16Pakatzij wi ri ticawex echiri' c'o caquijiquiba' uwach, caqui'an pubi' junok más c'o uwach chiquiwa rique; y jec'ula' ri' caq'uis ronoje ch'a'oj puwi ri xquijiquiba' uwach. 17Jec'ula', ri Dios lic xraj xuk'alajisaj pa sakil wi na cujalc'atij ta ri xubi'ij can chique ri caquic'ul rubi'tisim; e uwari'che lic xujiquiba' uwach Ruch'a'tem. 18Ruc' c'u wa bi'tisinic xujiquiba' uwach, lic k'alaj na cajalc'atix ta rubi'tisim ri Dios, ma Rire na cu'an ta rak'ubal. E uwari'che ri'oj ri karikom ruto'bal ri Dios, lic nimarinak kac'u'x caka'an ke che ri bi'tisim can chike. 19Ruma c'u cubul pan kac'u'x che wa bi'tisim canok, oj tiquil chi utz y jiquil uwach ri kanima',#6:19 Pa ri ch'a'tem griego cubi'ij e ri cubul pan kac'u'x che e jun “ancla”. Wa' e jun nimalaj ch'ich' pacha' ansuelo tzayal che ri barco. Echiri' catz'ir chupa ri ya', camukutaj pa ri sanyeb re cutac'aba' ri barco. ma lic cubul kac'u'x ruc' ri Jun oquinak c'a chila' chicaj chirij ri telón chupa ri Luwar lic Santo.#Heb. 9:3-12 20Wa' e ri Jesús, ri xoc chila' kuma ri'oj; y jec'ula' xujak pan ri kabe cha' cojopon ruc' ri Dios. Jec'ula', ri Jesús xu'ana Kajawal na jinta utakexic cach'aw pakawi' chwach ri Dios; xu'ana c'u ri' pacha' ri Melquisedec.#Sal. 110:4
Currently Selected:
Hebreos 6: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.