2 TIMOCI 3
3
Sa tukuna vei Timoci ko koya na ka ca ena tubu mai e na gauna maimuri, 19. Sa kaya me nanuma na nonai valavala, ka muria tiko na ka ka rogoca maivei koya, 1017.
1Mo kila talega na ka oqo, ni na yaco eso na gauna ni veivakararawataki e na veisiga maimuri: 2ni ra na daulomani ira walega na tamata, era na dauvinakata nai lavo, era na daubole, era na viavialevu, era na dauvosavakacaca, era na talaidredre kivei ira na nodra qase, era na sega ni vakavinavinaka, era na sega ni yalosavasava, 3era na caca veiwekani, era na dauyalayala ka lasu tale, era na dauveibeitaki vakailasu, era na sega ni daurawa na yalodra, era na daucudrucudru, era na daucati ira na tamata vinaka, 4era na dauveisoliyaki me mate, era na qaqa sodrosodro, era na yalolevu, era na lomana vakalevu na marau a ra na lomani koya na Kalou vakalailai; 5sa nodra ga na lotu vakarairai, ka sega vei ira na kena dina: ia mo lako tani maivei ira era sa vakaoqo. 6Ni sa vakakina ko ira era sa curu vakailawaki ki na veivale eso, a ra sa daurawai ira na yalewa sesewa sa bini tu vei ira nai valavala ca, era sa kau vakatani e na gagadre ca e vuqa, 7era sa dauvakatavulici tiko, ka sega ni rawata me ra kila na ka dina. 8Ia sa vakataki Jani kei Jabri ko ira oqo ni rau sa qati Mosese, era sa qatia vakakina na ka dina: a tamata lomaqeleqelewa, a sa sega ni vinakati na nodra vakabauta. 9Ia era na sega ni tubu cake me levu: ena vakavotui vei ira kecega na tamata na nodra sesewa, me vaka na nodrau oqori.
10Ia ko iko, ko sa daumuria na noqu i vakavuvuli, na noqu i valavala, na noqu i naki, na noqu vakabauta, na noqu vosota vakadede, na noqu loloma, na noqu vosota na ca, 11na veivakacacani, na veivakararawataki; na ka sa yaco vei au mai Anitioki, mai Ikoniona, mai Lisitira; na kena levu ni veivakacacani kau a vosota; ia ka sa vakabulai au na Turaga mai na ka kecega oqo, 12Io, ko ira kecega era na via lotu dina vei Karisito Jisu, era na vakacacataki. 13Ia ko ira na tamata ca kei ira na dauveitemaki, era na tubu cake me ra ca sara, ni ra sa ia na dauveivakacalai, ka ra sa vakacalai talega ko ira.
14Ia ko iko, mo tu dei e na ka ko a vakatavulici kina, a ka sa vakadinadinataki vei iko, ni ko sa kila se ko cei sa vakatavulici iko; 15ni ko sa kila nai Vola tabu, ni ko a gone, oqori sa vakavukui iko rawa mo bula ni ko sa vakabauti Karisito Jisu. 16Sai koya na Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu: 17me yaco kina na tamata ni Kalou me vakarau tu, ni sa vakarautaki ki nai valavala vinaka kecega.
Currently Selected:
2 TIMOCI 3: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific