2 TIMOCI 2
2
Sa vakarota ko koya vei Timoci na ka eso, 115. Sa tukuna eso nai vakavuvuli ca, 1618; a sa tukuna nai vavakoso lewe ni lotu, 1921. Sa vakavulici koya e nai valavala e kilikili kaya, 2226.
1O koya oqo, na luvequ, mo qai vakaukauwataki iko e na loloma sa tu vei Karisito Jisu. 2Ia na veika ko a rogoca maivei au e na kedra maliwa na lewe vuqa era dauvakadinadina, mo solia vei ira na tamata yalodina, era na rawata me vakavulici ira na tani. 3O koya oqo mo qai vosota na ca, me vaka na sotia vinaka i Jisu Karisito. 4Sa sega na tamata sa dauia nai valu me sa vakaogai koya talega e na cakacaka ni bula oqo; me vinaka kina vua sa digitaka me sotia. 5Ia ko koya sa gumatua e na veiqito, sa sega ni vakaisalataki vakaturaga, kevaka sa sega ni ia me vaka na kenai vakarau. 6Nai vakatau-ni-were sa cakacaka, me sa kania taumada na vuana. 7Vakananuma na ka kau sa kaya; ia me solia vei iko na Turaga na yalo e kila rawa na ka kecega.
8Vakananumi koya sa vu mai na kawa i Tevita, ko Jisu Karisito, o koya sa vakaturi cake mai na mate, me vaka na noqu i tukutuku-vinaka: 9o koya kau sa vosota kina na ca, me vaka na tamata caka ca, ia kau sa vesuki kina; ia na vosa ni Kalou sa sega ni vesuki. 10O koya oqo kau sa vosota kina na ka kecega e na vukudra na digitaki, me ra rawata talega na bula sa yaco e na vuku i Karisito Jisu, kei na veivakalougatataki sa sega ni mudu. 11Sa dina na vosa: Kevaka eda sa mate kaya, eda na bula vata talega: 12kevaka eda sa vosota na ca, eda na lewa vata kaya: kevaka eda sa cakitaki koya, ena cakitaki keda talega ko koya: 13kevaka eda sa sega ni vakadinata, sa yalodina tikoga ko koya: sa sega ni cakitaki koya rawa vakai koya.
14Mo vakananumi ira e na veika oqo, ia mo vakaroti ira matua e na mata ni Turaga me ra kakua ni veiletitaka na vosa, a ka sa sega ni yaga ka sa vakacalai ira era sa rogoca. 15Gumatua sara mo vakaraitaki iko mo vinaka e na mata ni Kalou, a tamata daucakacaka sa sega e dua na ka me madua kina, mo wasea vakadodonu nai vakavuvuli dina.
16Ia na dautalanoa vakasisila ka sega ni yaga, mo drotaka: ni na tubu cake kina nai valavala sa sega ni vakalotu: 17ia na nodra vosa ena kakana tiko me vaka na vidikoso ca: sa vakakina ko Imeneo kei Filito: 18erau sa sese mai nai vakavuvuli dina; ni rau sa kaya sa oti na tu cake tale mai na mate; a rau sa vukica sara kina na nodra vakabauta eso.
19Ia na yavu dei ni Kalou sa tu ga, ia sa vakaoqo na vosa sa volai kina, Sa kilai ira na nona tamata na Turaga: ka, Me ra lako tani mai nai valavala ca ko ira yadua era sa cavuta na yaca i Karisito.
20Ia e na vale levu sa sega walega ni tu na veibilo koula kei na veibilo siliva, eso talega na bilo kau kei na bilo qele; ia eso sa talei, eso sa sega ni talei.
21Ia kevaka e dua na tamata sa vakasavasavataki koya mai na veika oqo, ena yaco kina me bilo talei, sa vakasavasavataki, ka yaga sara vua na Turaga, ni sa vakarau tu ki na cakacaka vinaka kecega.
22Ia mo dro tani mai na gagadre ca vakacauravou; ia mo muria na yalododonu, na vakabauta, na loloma, na veivinakati kei ira era sa masuta na Turaga e na yalosavasava. 23Ia mo dro tani mai na veileti lialia eda sega ni vakatavulici kina, ni ko sa kila era sa vakavuna ga na veileti. 24Ia sa tabu ni veileti nai talatala ni Turaga; ia me yalomalumalumu vei ira kecega na tamata, me vakavuvuli vakavuku, me dauvosota, 25me vakatavulici ira e na yalomalumalumu era sa dauveivorati; de solia beka vei ira na Kalou na veivutuni me ra kila kina na ka dina, 26ka me ra bula tale mai nai cori ni tevoro, ni sa vakabobulataki ira ko koya me vaka na nona lewa.
Currently Selected:
2 TIMOCI 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific