Filibbi 1
1
1Jawaab minni ana Buulus wa Timuutaawus abiid Isa al-Masiih, leeku intu kulluku al-bigiitu saalihiin be Isa al-Masiih al-fi hillit Filibbi maʼa masaaʼiilku wa muʼaawiniinhum. 2Aleekum al-salaam wa l-rahma min Allah abuuna wa Rabbina Isa al-Masiih.
Duʼa al-rasuul wa chukrah
3Fi ayyi wakit kan fakkart leeku, nachkur Allah Rabbi. 4Wa ayyi wakit nisalli le Allah, nasʼalah leeku kulluku be farah. 5Ana farhaan minku achaan intu chaaraktu maʼaayi fi ballikhiin bichaarat al-Masiih min awwal wakit ana jiit leeku lahaddi l-yoom. 6Wa ana muʼakkid kadar Allah, al-bada khidimtah al-adiile foogku, hu yisawwiiha daayman lahaddi yitammimha fi yoom jayyit al-Masiih Isa.
7Wa waajib leyi nihiss beeku kulluku misil da achaan galbi daayman maʼaaku. Wa nihibbuku achaan intu kulluku muchaarikiin maʼaayi fi niʼmat Allah. Wa intu daayman muchaarikiin maʼaayi wakit ana gaaʼid mujanzar fi l-sijin wa wakit ana gaaʼid nidaafiʼ le bichaarat al-Masiih wa nisabbitha le l-naas. 8Wa Allah yachhad leyi, ana garmaan bilheen leeku kulluku be mahabbat al-Masiih Isa.
9Wa ana gaaʼid nasʼal Allah achaan hu yiziid mahabbitku wa yikattirha leeku be ziyaada. Wa khalli yantiiku maʼaaha ilim wa fihim tamaam 10achaan taʼarfu kikkeef timayyuzu daayman al-cheyy al-afdal. Wa khalaas tiʼiichu be niiye mukhlisa wa bala eeb wa tabgo jaahiziin le l-yoom al-yaji foogah al-Masiih. 11Wa tabgo saalihiin wa malaaniin be l-kheer al-jaayi min Isa al-Masiih. Wa khalaas, al-majd wa l-chukur le Allah.
Ballikhiin al-bichaara le l-naas
12Ya akhwaani, nidoor intu taʼarfu kadar al-taʼab al-lihigaani hini saaʼad bichaarat al-Masiih wa hi alwassaʼat ziyaada. 13Achaan bigi waadih le kulla askar hana gasir al-waali wa le kulla l-naas al-aakhariin kadar ana masjuun fi chaan ana abd al-Masiih. 14Wa fi l-sijin, ana bigiit masal le l-akhwaan al-fi l-hille di. Wa katiiriin minhum achamhum fi Rabbina bigi gawi ziyaada. Wa ligo chajaaʼa lahaddi gammo yihajju be kalaam Allah bala khoof.
15Sahiih, waahidiin minhum gaaʼidiin yibachchuru be l-Masiih wa da, achaan yahsuduuni wa yikhaasumuuni laakin aakhariin yibachchuru be niiye adiile. 16Al-akhwaan dool yibachchuru achaan yihibbuuni wa yaʼarfu Allah jaabaani hini achaan nidaafiʼ le l-bichaara. 17Wa laakin al-hasuudiin dool yiballukhu be l-Masiih be niiye ma mukhlisa. Yidooru yukhuttu nufuushum giddaam. Wa fi fikirhum, ballikhiinhum yabga leyi gaasi wakit ana mujanzar fi l-sijin. 18Wa kan leyi ana, da ma yisawwi leyi cheyy. Kan niiyithum fasle walla niiyithum adiile kula, be ayyi tariiga humman gaaʼidiin yiballukhu kalaam al-Masiih wa be da, ana farhaan. Aywa, battaan kula nafrah 19achaan naʼarif kadar Allah yinajjiini wa da be sabab intu gaaʼidiin tasʼalooh leyi wa Ruuh Isa al-Masiih yiʼaawinni.
Haalat al-rasuul al-gaasiye
20Wa nitmanna be niiye waahide wa be acham gawi kadar ma nafchul fi ayyi cheyy. Wa nidoor nikallim misil daayman kallamt be chajaaʼa wa bala khoof wa niʼazzim al-Masiih giddaam al-naas fi kulla hayaati, kan niʼiich walla numuut kula. 21Achaan leyi ana, al-haya illa maʼa l-Masiih. Wa l-moot indah leyi faayde be ziyaada. 22Wa kan Allah yidoor ma nifaarig al-dunya di, khalaas ana nakhdim khidme samhe le l-Masiih. Laakin been al-haya wa l-moot, ma naʼarif nichiil weenu. 23Indi chahwaat itneen al-gaaʼidiin yiddaawaso foogi. Nidoor nifaarig al-dunya wa nagood maʼa l-Masiih achaan da bas al-afdal. 24Wa laakin waajib be ziyaada nagood hayy fi l-dunya di achaan hayaati indaha faayde leeku.
25Wa da, bigi leyi waadih. Kan ma numuut yabga leeku akheer. Wa khalaas, naʼarif kadar nagood hayy maʼaaku sawa achaan intu tabgo gawiyiin wa farhaaniin fi l-iimaan be ziyaada. 26Wa be misil da wakit nigabbil leeku, intu tifaachuru ziyaada be Isa al-Masiih be sababi ana.
Al-haal al-waajbe fi l-taʼab
27Laakin khalli tiʼiichu be l-haal al-muwaafge le bichaarat al-Masiih. Wa misil da, kan naji nichiifku walla kan ana baʼiid minku kula, khalaas nasmaʼ kalaam fiiku al-yuguul intu saabtiin be fikir waahid wa hadaf waahid wa intu gaaʼidiin tihaarubu sawa fi chaan al-iimaan al-ligiituuh min bichaarat al-Masiih. 28Ma tikhallu al-khoof yisawwiiku be sabab ayyi khidme al-yisawwuuha al-naas al-yikhaalufuuku. Wa da yabga leehum alaama al-tiwassif kadar humman fi derib al-halaak wa intu fi derib al-naja. Wa l-yinajjiiku, hu Allah. 29Achaan Allah antaaku rahma wa be l-rahma di, intu ma tiʼaamunu be l-Masiih bas laakin tatʼabo fi chaanah kula. 30Wa khalaas, intu gaaʼidiin tichaaruku fi nafs al-harib al-ana gaaʼid nihaarib foogah. Wa l-harib da, intu chiftuuh awwal wakit ana lissaaʼ gaaʼid maʼaaku. Wa hassaʼ kula, simiʼtu kadar ana gaaʼid nihaarib misil da battaan.
Currently Selected:
Filibbi 1: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.