Zɔ̂ŋ Maa-ŋuŋ 3
3
Ɣâla ǹônii
1Ka ŋwɛli-kɛ-maa kɛ́tɛi káa Nàŋ-nuui a gɛ̀ a kûai, a gɛ́ɛ díkɛ kútoli a Ɣâla lônii, ǹyaŋ kúkaa la. Sâpoi ŋ̀éniɛi fé kúkɔlɔŋ lai, nya ƃa ŋ̀éniɛi fé gɔ̀lɔŋ. 2Ŋáwɛli-kɛ-maa-ƃelai kákaa nâa a Ɣâla ǹônii. Vé niî lɛ́ ní kûa berei kwa pâi kɛ̂i lai. Kɛ́lɛ, kú gɔlɔŋ tãi a pâi pâi lai, kwa pâi kɛ̂i yɛ̂ɛ ǹyaa, kpɛ́ni fêi, kwa pâi gaâi nɔ́ yɛ̂ɛ berei gáa lai. 3Ǹúui kélee gili-kɛ-zui ŋí káa ǹyêei, a gbîŋ maa waa yɛ̂ɛ berei ǹyaa Kôrai m̀aa waai lai.
4Ǹúui kélee a sɔnyɔ̂ŋ kɛ̀i, a dɔ̂ŋ kara. Sɔnyɔ̂ŋ káa a tɔ̂ŋ-karaa. 5Ká gɔ̀lɔŋ è pà a gɛɛ é sɔnyɔ̂ŋ siɣe, ǹyaŋ sɔnyɔ̂ŋ fé gbonôi. 6Ǹúui kélee a kɛ̂ gbonôi, va sɔnyɔ̂ŋ kɛ̀. Ǹúui kélee a sɔnyɔ̂ŋ kɛ̀i, vé niî gáa ni, kpaa máŋ, vé niî gɔlɔŋ ni. 7Nîa-pɛlɛɛ, káfe nɛ̀ɛ naa núu da é ká pɛ̀lɛ. Ǹúui a mɛni-sãa kɛ̀i, zã́âi yɛ̂ɛ berei ǹyaa Kôrai zã́âi lai. 8Ǹúui a sɔnyɔ̂ŋ kɛ̀i, gáa a Dɛ̂ƃele pɔ́ɔ, kpɛ́ni fêi, Dɛ̂ƃele è sɔnyɔ̂ŋ kɛ̀ é kúla gɔ́ɔ pîlanii. Sâpoi Ɣâla Ǹóŋ è pà lai, nya ƃa a gɛɛ é Dɛ̂ƃele ŋɔtíi su kara. 9Ǹúui kélee gáa a Ɣâla ǹóŋ, va sɔnyɔ̂ŋ kɛ̀, kpɛ́ni fêi, Ɣâla káa gbonôi. Va pɔ̂ri sɔnyɔ̂ŋ kɛ̀i, kpɛ́ni fêi, gáa a Ɣâla ǹóŋ. 10Nyíŋi su ƃe kwa pɔ̂ri Ɣâla ǹônii kɔ́lɔnîi naa da Dɛ̂ƃele ǹônii. Ǹúui kélee va mɛni-sãa kɛ̀i, vé a Ɣâla pɔ́ɔ, kpaa máŋ ǹúui vé m̀arâŋ-nuu wɛ́li níi.
Wɛli kɛ́-maa kúkîe-ni mɛni ma
11Kpɛ́ni fêi, ŋ̀orɛ̂-wooi ká ŋí nyíi ká mɛni é kúla gɔ́ɔ pîlanii a gɛɛ fɛ̂ɛ kú kúkîe-ni wɛ́li. 12Kúfe kɛ̀ yɛ̂ɛ Kîŋ nyíi kɛ̀ a ŋ̀wana-lɔ̂ɔ-nuui pɔ́ɔi. È ǹêɣe pàa. Le-mɛni ƃe è bàa lai? Kpɛ́ni fêi, gbîŋ-tua-perei è kɛ̀ a ŋwana-lɔ̂ɔ-tua. Ǹêɣe ŋɔi kɛ́ ƃo a tûa sãa. 13Kála fé kpâla kâa, ŋánûa, a gɛɛ ǹɔii a kákpɔara. 14Kú gɔlɔŋ a gɛɛ kwa pá fúlu-laa su. Kpɛ́ni fêi, kú ǹûai wɛ̂li ni. Ǹúui wɛli-kɛ-maa fé ǹyêei a lɛ̂ɛ saa su. 15Ǹúui a gɔlɛ-ma-nuui kpɔarâi gáa a nuu-paa-nuu. Ká gɔlɔŋ wɔlɔ-wɔlɔ fúlu-laa fé nuu-paa-nuu kponôi. 16Nyíŋi ƃe kwa wɛli-kɛ-maa kɔ̂lɔŋ ma a gɛɛ è ŋɔfúlu-laai lâa kúmɛni ma. Ǹyaŋ fɛ̂ɛ kú kúfulu-laai láa ǹûai mɛni ma. 17Kɛ́lɛ, à kɛ̀ ǹɔii-su-sãa da kɛ̀ núu yêei é gɔlɛ-ma-nuui káa da wɛ́li kɛ́ gɛ̀, kɛ́lɛ vé kpɔŋ-mâ tɛ̀ɛ ní gɔlɛ-ma-nuui pɔ́, a pɔ̂ri kɛ̂i leŋ ǹyɛɛ Ɣâla ŋɔwɛli-kɛ-maai káa gbonôi? 18Nîa-pɛlɛɛ, kúfe wɛli-kɛ-maa kɛ̀ nɔ́ a wóo-folo da kúlono-pere. Kɛ́lɛ, fɛ̂ɛ kú gɛ́ kútûa-pere su da tɔ̃yâ-laa.
Núu kili-kúlaa Ɣâla ŋ́ɛi-tuɛ
19Nyíŋi su ƃe kwa pâi gɔ́lɔnîi naa a gɛɛ kúkaa a dɔ̃yâi pɔ́ɔ. Lii-kpele a pâi kɛ̂i kúlii su ŋ̀ɛ́i, 20tãi kúlii a mɛni lɛ̂ɛ la kûai; kpɛ́ni fêi, Ɣâla kɛ́tɛ̂i é tɛ́ɛ kúlii ma, ǹyaŋ è mɛni kélee kɔ́lɔŋ. 21Ŋáwɛli-kɛ-maa-ƃelai, kúlii à wàla mɛni lɛɛ kûa, gɛ̀ ní kúlii kpelêɛi Ɣâla ma; 22ǹyaŋ zɛŋ kélee kwa vɛli mài, kwa zɔlɔ ƃô ǹyêei, kpɛ́ni fêi, kwa ŋɔtɔ̂ŋ-ŋai mɛi kâa, kúkɛ ǹíi-láa-mɛni kɛ̀. 23Ŋɔtɔ̂ŋ ká ŋí a gɛɛ fɛ̂ɛ kú láa a Ǹóŋ Zîsɛ Kôrai láai, kú kúkîe-ni wɛ́li yɛ̂ɛ berei è mò la kûai. 24Diai kélee da ŋɔtɔ̂ŋ-ŋai mɛi kâai, díkaa gbonôi, ǹyaŋ gɛ̀ ƃò díkponôi. Berei ŋí ƃe kwa gɔ̀lɔŋ la a gɛɛ gáa kúkponôi, kpɛ́ni fêi a M̀ɔlêŋ Maa Waai tɛ́ɛ a gɛɛ é kɛ́ kúkponôi.
Currently Selected:
Zɔ̂ŋ Maa-ŋuŋ 3: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia