Isa 64
64
1Yu'naak nee ta naq inateh chee taxaaj nee ta tiqajik cho wach ak'al,
nee ta kik'uyu'jik i yuuq' chawach.
2Eh je' ta naq rukab' i q'aaq' noq i ruk'at, i kaq k'iix,
noq i rutz'aab'isaj i ha'.
Chi je' re', nee naq inkiyeew runimaal awach i ki-ixowanik awach.
Eh re' taqe i nimaq tinamit nee naq kiyo'jiik chawach.
3Eh noq re' hoj ma' k'achi' ta naq quy-eem
xa a'n chaloq taqe i sahchb'al k'uxliis, xat qajik cho pan taxaaj,
re' taqe i yuuq' xik'uyu'jik pan kiye'aab' chawach.
4Eh ma' jank'al ta nib'irjik,
nilarik, chi wilik ta chik jino'q Dios
chi je' rukab' i hat chi nee ta rub'an i sahchb'al k'uxliis
kuuk' i kiye'em kik'ux ruuk'.
5Eh re' hat imponik taqe chawach i kib'anik
reh i holohik laj na'ojb'al chi suq kik'ux.
Inki a'n aha' wilik inawaaj i hat.
Xa re' la' quuk' i hoj k'achi' aajosq'iil,
ruum k'ahchi'kooj chi mahk,
xa najtir wo' cho q'iij titohq'ik qaq'etwachem.
¿Mi konee rub'an re' chi nee qoh ko'ljik?
6Chi qunchelaal i hoj xoj qa ch'uwa'risaj qiib'
re' korik inqa a'n noq inqaq'or
je' rukab' i ch'uwa' wach itz'ihy.
Eh re' i yiib' wach inqa a'n inq'eb'wik qeh,
je' rukab' noq inq'ehb'ik i chiqiij laj xaq chee' ruum i teew,
je' re' noq insahchik qawach i hoj.
7Je' re' i k'achi' qak'ulum ruum ma' awach ta chik jino'q qeh inq'orik aab'ihnaal
ni xata nqayeew qak'ux awuuk'.
Ruum aj re' ma' qoh atoob'eej ta chik chaloq,
eh xoj aq'eb' chi riij ak'ux ruum i qayiib' wach na'ojb'al.
8Atoob' ta je' re' xa hat la' wo' QaJaaw yu'naak, eh xa hat wo' ehchan qeh.
Re' hoj xa je' hoj ak'al xun chawach
re' hat xatyej-anik reh re' wo' hat xatyej-anik qeh i hoj chi qunchelaal.
9QaJaaw Dios, maa yeew tii chu'nchel aajosq'iil chi qanaah,
ma' ta naq neenk'ulik cho panak'ux chi juneliik i qamahk.
Neeta la' tiinaketelaaj qamahk ruum hoj aatinamiit.
10Re' asantolaj tinamiit xsacharik wach,
re' i aatinamiit Sión xkahnik chi xa je' chik rukab' i chiq yuuq'.
Re' i Jerusaleem xkahnik chi xan tz'irik chik paam.
11Re' i santo laj ye'aab'
xatkiloq'ej cho wii' i qamaam qati't
xsacharik wach ruum ruuk' q'aaq'.
Eh chu'nchel i q'e' naq holohaq wilkeeb' ar
xsacharik chik kiwach kuum i aj ixowaal.
12QaJaaw Dios ¿Mi ma' nee chik i qoh ako'leej re'?
¿Mi ma' nee chik i naaketelaaj qawach re'?
¿Mi konaa qak'ulum nik'-oq najtiil i ti' k'axik re'?
Currently Selected:
Isa 64: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.