Isa 65
65
Re' i QaJaaw Dios xuyeew taqe panti' k'axik i ma' kinimanik taj
1Re' Dios je' wili i xuq'or: Re' taqe i ma' jank'al ta kinkisik' xinkireq wo' hoq.
Re' taqe i ma' jank'al ta inkiq'or i nub'ihnaal, je' wili i xnuq'or keh:
Ayu' wilkiin taq cha toob'jiik, kinki.
2Re' hin juneliik wo' naq xnuk'ul taqe wuuk' i tinamit
ma' kinimanik ta weh, ojik inki a'n chupaam i yiib' wach b'eeh.
Re' i kiyiib' wach kapeew i keh inki a'n
3Re' i tinamit re' re' inkijosaj chee nujosq'iil
ruum inkik'at i kimayiij chikiwach i tiyoox
nah taq yuuq',
eh inkik'at insensia chinaah i artaal tusuj xaan.
4Eh kitzunaa' kiib' i muqulkeeb' wii' i kamnaq,
eh ki-ik'ik aq'ab' chupaam i ye'aab' aha' ma' ki-ilarik ta wii'.
Eh inkik'ux i tiwik ahq,
inkuk'ej i riis i kitib'kaal i chikop ma' toob' ta chi k'uxarik.
5Eh je' wili inkiq'or: Maa jil chaawiib'
maa kinatz'a'j ruum wilik nuSantohiil,
inki taqe. Re' keh inkiyeew nujosq'iil xa ch'i'k inki a'n je' kikab' i sib',
xa je' kikab' i q'aaq' qoplik inik'ik q'iij.
6Chu'nchel inki a'n re' re' tz'ihb'amaj rehtalil chi nuwach i hin,
ma' jaruuj naa nukanaam chi je' re'
korehtaal i nuq'aj wach keh je' rukab' i ruk'ul chi keh.
7Re' hin naa taqe nuye'em chutojariik riij i kimahk, i ma' holohik taj xkian
chaloq i kimaam kati't.
Re' keh xkik'at i insensia chinaah taqe i yuuq', ruuk' i re' xkiyeew nujosq'iil.
Re' hin peet naa wajlaam riij i kimahk
kora'j naa nuq'ajam wach keh re', inki Dios.
8Re' i QaJaaw Dios je' wili i xuq'or:
Noq re' i uuva ma' k'isiin i riis ma' inkiq'eb' ta reje i tinamit.
Je' wo' re' i naa nub'anam i hin
k'axb'al keh i waj kamanoom,
ma' naa ta nusacham wach chu'nchel i tinamit.
9Re' hin naa nuk'ihaaxb'isam i riih rumaam i Jacob, i riih rumaam i Judá.
Re' taqe re' naakipatiniik chupaam
taqe i nuye'aab' naa nuye'em keh i nusik'im kiwach, ar
naakipatiniik taqe i waj kamanoom.
10Re' i nutinamiit kisik'wik weh
re' i kitentzuun naakinujisam i wach k'ixkaab' Sarón.
Eh re' i kiwakax ar naa kianam kiwa' wach k'ixkaab' Acor.
11Eh re' taq i hat i kinaq'eb' taq chi riij ak'ux
insahchik taq panak'ux i nuSantolaj ye'aab'.
Eh i nayeew taq i wi'k, i vino chuwach i Agad Imeni,
re' inaq'or taq i hat chi rut'iosil i b'ehomal.
12Xa re' la' xama' xta wo' taq i naa areqem,
naa la' nuye'em q'ab' chi naa taq akanteesjiik ruuk' i q'aslaj ch'ihch'.
Eh noq xnusik' naq taq awach xama' xawaaj ta wo' taq.
Eh noq xat nuq'oreej naq taq xama' xinab'iraj ta wo' taq,
re' la' chik taq i xa a'n i ma' inwaaj ta wach i hin,
re' taq chik xasik' inyojwik nuk'ux i hin, inki i Dios.
13Re' i QaJaaw Dios je' wili i xuq'or:
Re' taqe i waj kamanoom
juneliik naa ruwihiik kiwa' kihaa'
ma' naa ta rukahniik chi ntz'irik kiwach.
Eh re' taq i hat i ma' tinimanik ta taq weh
naa taq akuyum awa' ahaa',
naa taq akahniik pank'ixb'ilaal.
14Re' taqe i waj kamanoom naa kianam kitz'uuy ruum i rusuqkiil kik'ux.
Eh re' taq i hat naa taq awoq'iim naa ak'erem aachii' ruum ruti'kiil taq ak'ux
ruum i ti' k'axik taq i naa ak'ulum.
15Re' taqe i nusik'k'im kiwach naa taq kiq'orom aab'ihnaal
chi pahqb'al reh i ti' k'axik i kimik chikinaah i tokoom.
Eh re' taqe i waj kamanoom
keh ak' laj b'ihnaal chik i naa nukojom keh.
16Xa awach pa' i
neerupahqaaj rutoob'jiik koruman chi weh i hin korik wach nuk'ux naa rupahqaam.
Eh awach iraaj ruq'orom i korik koruman chi panub'ihnaal i hin naa ruq'orom.
Re' taqe i ti' k'axik k'uluuj chaloq xik'ik chik,
xsahchik chik panuk'ux chi jumpech.
Re' ak' taxaaj, re' ak' wach ak'al
17Re' hin naa nuyejaam
jinaj i ak' taxaaj, jinaj i ak' wach ak'al.
Re' i k'uluuj chaloq xik'ik chik,
ma' jaruuj chik naa ruk'uliik panuk'ux.
18Suuqb'oq taq ak'ux chi juneliik ruuk' i naa nuyejaam,
ruum re' hin naa nuyejaam jinaj i ak' Jerusaleem naa nu nujisam chi rusuqkiil k'uxliis.
Eh chu'nchel i naa kik'achariik ar
naa ruwihiik rusuqkiil kik'ux.
19Eh re' hin naa rusuqb'iik nuk'ux
ruum i ak' Jerusaleem,
eh naa rusuqb'iik nuk'ux chikiij i nutinamiit.
Ruum ma' naa ta chik rib'irjiik i k'erej chi'is oq'ik.
20Ma' naa ta chik kikimiik i kore' xi-aasjik.
Eh re' taqe i mama' winaq ma' naa ta kikimiik chi komajaa' i kihab'ul,
awach i xkimik noq kore' wilik reh i jinaj siento haab' ko ak'un noq xkimik reje.
Eh awach i xkimik reje chi komajaa' imponik
i jinaj siento haab' re' re' q'e' i ru mahk.
21Re' taqe aatinamiit noq naa kiyejaam kipaat re' wo' keh naakipatiniik ar.
Eh re' chik i keh naa kib'aniik rusuqkiil i wach i ki uva.
22Eh ma' tokoom ta chik i naa rupatiniik pankipaat. Re' i kitik
ma' tokoom ta chik naa rub'aniik rusuqkiil.
Re' taqe i nutinamiit najt naa kik'achariik,
je' najtiil ink'acharik i nimlaj chee',
eh re' chik keh naa kib'aniik rusuqkiil i kikamaj.
23Eh ma' naa ta rojiik chi re' chi ma' re' i kikamaj,
ma' naa ta kikimiik i kak'uun kixq'uun chi komajaa' i kihab'ul.
Ruum re' taqe i tinamit re' re' nukuxisam taqe,
je' wo' hoq i kiih kimaam.
24Noq komajaa' inkipahqaaj weh chib'ih jariik inkaaj, re' hin naa nuye'em keh.
Eh noq komajaa' inkikohlaaj nuq'orob'jiik re' hin naa taqe b'iram.
25Re' taqe i xojb' jinaj naa kianam wii' kiwa' ruuk' taqe i tentzun.
Re' kaq b'ahlam k'im chik i naa ruk'uxum
re' ruuk' i ruk'ux i b'ooyax.
Re' aaq' ak'al naa ruk'uxum,
chupaam i santo laj ye'aab' Sión
ma' jino'q i chikop naa ruk'uxwiik keh, inki Dios.
Currently Selected:
Isa 65: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.