Gn 44
44
Is copa cham José
1Max lajwi tu' max yalon cham José bay yilomal yatut:
—Ak' noj is coẍtal eb nak ti' yetok ixim trigo, yalc'al jantak chi je' yiontok eb nak, cax chaon pax aytok ch'en tumin chi yak' junjun eb nak manon is trigo tu' yul ti' is coẍtal junjun eb. 2Cax chaon aytok in copa plata yetok ch'en tumin yul ti' is coẍtal nak tzunan unin, ch'en max yak'balnej nak manon is trigo, ẍi cham. Cax max yiken tzet max yal José. 3A yet wal max jay julnaj yakan c'u yet k'inibalil, max chalay meltzoj eb yetokc'al no chej bay is conob eb. 4Cawilto chi toj eb, cax max yalon cham José bay yilomal yatut axca ti':
—Tzaklojan yintak eb nak tu'. A yet chi michchaj eb nak oj, cax chaloni: ¿Tzet yuj xan a is watx'c'ulalil in patrón, yobxa che yut e paktzen canok? ¿tzet yuj xan max e yelk'anejtek is copa naba plata, 5jun is copa bay chi yuc' is vino c'al k'anbalnen yet chi naon el junok k'anej? Caw wal yob tzet che yun ayex ti', cachi bay eb, ẍi cham José.
6Cax max toj nak, axa yet max michchaj eb nak yuj xin, max yalon bay eb axca max yut yalon cham José tu'. 7Max tak'wi eb nak bay:
—¿Tzet yuj xan caytu' chot k'anjab a ba ayon mamin? ¿Tom c'am co nabal, xan tol ok on elk'anok? 8Ilab tol atac'al bay Canaán cajan on. Axa yet max on meltzojtek junelxa, max jion paxtek ch'en tumin ayaytok yul is ti' co coẍtal on. ¿Tom ato wal junok is tzet yetal oro ma plata yet cham a patrón tu' chi jelk'anejtek bay is yatut? 9A junok on bay chi ilchaj ajtek jun copa tu' yul is coẍtal, watx' tol mak'layokab camok, axa on co masanil, chon occan a chekbejok, ẍi eb nak.
10Max tak'wi cham axca ti':
—Yunokab axca e yalon tu', palta asan nak bay ok ilchaj ajtek jun copa tu' wuj, a nak chi occan in chekbejok; axa ayex ti' e masanil bekan ex, ẍi cham.
11Max yaon ay eb nak is coẍtal masanil yin aymanil, max jakon eb nak ti' is coẍtal tu'. 12Max sayon yil cham masanil yulak coẍtal tu'; max sayon yil yet nak babel winak yin babelal, yin c'al txolilal max yunej, masantac'al max apni oc sayon yil yet nak tzunan unin. Axa max yun xin, a tu' max ajtek ch'en copa tu' yul yet nak tzunan unin tu', a ton nak Benjamín. 13Max c'oli tzilontok eb nak is pichil yet chi tx'oxon el ba is cusc'ulal eb. Max lajwi tu', max yaon pax oc eb yikatz is burro tu' junelxa, axa meltzoj pax eb nak bay conob tu'. 14Ayto wal ec' José tu' bay yatut, max apni oc nak Judá yetok eb yuẍtak tu', cax max ay nojnaj eb nak satak cham, bay sat tx'otx'. 15Max yalon cham bay eb nak axca ti':
—¿Tzet xan caytu' che yut e ba? ¿Tom man e yojtakok tol a junok winak ay yikbej axca in ti', tol chi je' nachaj el junok tzet yetal yuj? ẍi cham. 16Max tak'wi nak Judá axca ti':
—¿Tzetto wal chi yun co tak'wi ayach mamin? ¿Tzetto wal chi yun ojtaknen elok ta watx' on jaloni? Ay co mul on yul sat co mam Dios, tix on ti' a satak xin. Chi je' chon oc a chekbejok yetok nak bay max ilchaj ajtek a copa tu', ẍi nak.
17Max yalon pax José axca ti':
—C'amak, asan nak bay max ilchaj ajtek in copa tu', asan nak chi can in chekbejok. Axa ayex ti', meltzojanek yin junc'ulal bay e conob bay ayic' e mam, ẍi José.
Max tewi Judá yuj Benjamín
18Max jitzwaltok ba Judá bay José, max yaloni:
—Mamin, elok yin a c'ul chi wal tzet chi yochej in c'ul ayach, yuj wal dios ayach c'amokab chi tit owal win ach ti', caxc'al wal tol axca cham rey ach. 19Ach wal max a k'anlej el ayon ta ayto ec' co mam on, cax ta ayto junokxa juẍtak on. 20Yuj tu xin, max jalon ayach tol ayto ec' co mam on, asan xin caw icham winakxa cham; yetok junxa nak juẍtak tzunan unin, yinxa yicham winakil co mam tu' max alji nak juẍtak tu'. Axa junxa nak junnej is txutx nak yetok, camnakxa nak, xan caw wal xajan nak yuj cham, yujtol asanxanej nak. 21Ach max ala' tol chi jitek nak, yet chojtaknej elok. 22Max jalon ayach tol c'am chi yal c'ul co mam on tu' chi el nak is c'atan, yujtol ta chi el nak is c'atan, ijanxa chi cam cham yaloni. 23Palta max al c'apax ayon tatol c'am chi jitek nak, c'amxa chon jay a satak aloni.
24A yet max on apni oc bay co na tu', max jalon bay cham co mam on tu' tzet max al ayon. 25Axa co mam on tu', max alon pax ayon tol chon tit pax manoj trigo junelxa. 26Max on tak'wi on bay cham axca ti': C'am chon toji, tatol c'am chi jitok nak juẍtak tzunan unin ti', yujtol ta c'am chi toj nak jetok, c'am chi je' japni oc satak jun cham yajaw tu', con chi on bay. 27Max yalon co mam on tu' ayon xin: E yojtak tol cawan ch'an in c'ajol max wil yetok xal camom wetbi. 28Jun nak junelnej max tojcanok, c'amxa bay max wil sat nak, ay mi wal junok no chiwajwom no' max chiontok nak, quin chi. 29Ta che yi' paxtok junxa nak ti', ta ay pax tzet chi on nak, e yuj wal bian, chin cam yuj cusc'ulal, ẍi cham ayon.
30Yuj tu', axca wal tol is cawil in mam tu' yayji oc nak ach'ej ti'; ta c'amxa chi meltzoj nak jetok tinani' 31cax chi cam co mam on tu' yuj cusc'ulal, ayon wal chi oc co mul on. 32Ayin wal max in wabaj in ba yin nak bay in mam tu', max walon bay: Ta c'amxa chi jay nak wuj, caw wal yob chin can yul a sat junelnej, quin chi bay cham. 33Yuj wal tu' chin tewi oc ayach, ta chi je' xin, ayin chin can is q'uexelok nak wuẍtak ti' a chekbejok. Yuj tu' cha bekil nak, cax chi toj nak yetok eb nak wuẍtak ti'. 34Ta c'amak, ¿tzetto wal chi yun toj wilon in mam, tatol man aok jun nak wetok? Caw wal c'am chi je' in c'ul waon oc in mam yin cusc'ulal, ẍi nak Judá.
Currently Selected:
Gn 44: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989