Gn 43
43
Max ilaytok Benjamín bay Egipto
1Caw wal ow yak'on wajil yul is conob eb nak. 2Max lajwi el ixim trigo max bet yi' eb nak tu' loon cham Jacob yetok yuninal, max yalon pax cham bay eb nak axca ti':
—Asek junelxa bay Egipto yet che man janic'okxa tzet chi co lo', ẍi cham.
3Max yalon pax nak Judá axca ti':
—Caw wal watx' max yut yalon cham chi txonwi trigo tu': Tatol c'am che yitek nak e yuẍtak tzunan unin tu', c'amxa chi wil e sat cayti', ẍi cham. 4Yuj wal tu xin, ta chi toj nak juẍtak ti' jetok, chon toj manoj trigo tu'. 5Ta c'am chi je' toj nak xin, c'amxa chon toj on, axca wal max yal cham txonom trigo tu': Tatol c'am che yitek nak e yuẍtak tzunan unin tu', c'am chex jayoc in satak, ẍi cham.
6Max yalon cham Israel axca ti':
—¿Tzet yuj xan max e yal bay jun cham tu' tatol ay junokxa e yuẍtak? Caw wal chin e yaoc yin bilc'ulal chi wabej, ẍi cham.
7Max tak'wi eb nak axca ti':
—Max k'anlej el cham tzet jayji oc on, c'al tzet inatilejal on. Max k'anlen c'apaxok ta ayto ec' co mam on, ta ayto c'apax juẍtak on. Yuj tu' xan max jal bay tol ayto ec' co mam cax ayto junxa juẍtak. ¿Tokwal jojtak on xin tatol chi yal cham tol chi jitok nak juẍtak on ti'? ẍi eb nak.
8Max yalon pax nak Judá bay is mam tu' axca ti':
—Ta c'am chi yochej a c'ul chon cam yuj wajil co masanil, chatok nak juẍtak ti' jetok. Ayin chin wabaj in ba in taynen nak, axca tu' ti wal chon toj yin aymanil. 9Ayin chin wabaj in ba yuj nak ta ay tzet chi oni; ta c'amxa chi jay nak wuj, caw wal yob chin can yul a sat. 10Ta maj ec' co tiempo cayti', mayal xam jak' cayelok tinani', ẍi nak.
11Max tak'wi cham mamej tu' axca ti':
—Ta c'amxa tzet watx' chi jutej, yunokab axca che yal tu', asek. Iektok janic'ok sabalej bay cham. A juntzan tzet yetal watx' chi ch'ib cayti', a' che yitok bay: bálsamo, no yalcab, perfume, mirra, nueces, c'al almendras. 12Iektok e tumin yet che manon ixim trigo, cax che yion meltzoj ch'en tumin max yak' meltzoj eb nak yulak is ti' e coẍtal tu', tekan toc'al max c'ay is c'ul eb nak, xan ayaytok ch'en. 13Iektok nak e yuẍtak ti', cax chi toj e yilon pax cham yajaw tu'. 14A Dios, Cham Chi Je' Yuj Masanil, a' ok oc yin is nabal cham tu' cax ok bekchaj el nak e yuẍtak Simeón, cax watx' chi yun meltzojtek nak Benjamín ti' e yetok. Axa ayin ti xin, ta chin can yin c'am c'ajolal, canok in ab yin c'am c'ajolal xin, ¿tzetto wal chi wutej? ẍi cham Israel.
15Max lajwi tu xin, cax max yaon aytok eb nak sabalej tu' yulak is coẍtal, c'al ch'en tumin. Max yiontok eb nak nak Benjamín. Max toj eb bay Egipto. Axa yet max apni eb satak cham José, 16max yilon cham tol ajun nak Benjamín; max yalon cham bay yilomal yatut axca ti':
—Itok juntzan eb nak ti' bay watut, cax chak'on mak'lay cam junok no wacax, cax chi watx'ji junok loj, tol ok low eb nak wetok yet chuman ti', ẍi cham José tu'.
17Lajwi tu' max ilaytok eb nak yuj yilomal yatut tu', max yiken tzet max yal José. 18Caw wal max xiwaj eb nak yujtol max ilaytok eb bay yatut cham, cax chi yal-len eb bay junjun axca ti':
—Trampa jun ti', tekan yuj ch'en tumin max yak' meltzoj eb nak ayon, yuj tu' chon ilaytek cayti', tekan ok on yaoc eb nak yin mosejal yetok no' co chej ti', ẍi eb nak.
19Yuj wal tu', a yet max apni oc eb nak bay puertail na tu', max oc tean eb yin cham yilomal yatut tu', 20cax max yalon eb nak axca ti':
—Mamin, ilabi, ayon ti' maxax on ulic' manoj trigo yet junel; 21axa yet max on meltzoj on, max on way yul be. A yet max co jakon co coẍtal, max jiloni tz'akan ayaytok ch'en tumin max jak'balnej co manon co trigo yulak ti' co coẍtal. Max jipaxtek ch'en tumin tu' junelxa tinani' cax chi jak'on ch'en yin tz'akan ayach.
22Tx'ok max jipaxtek is tojol ixim ok co man pax tinani'. Man jojtakok on, mac max aon aytok ch'en tu' yul is ti' co coẍtal tu', ẍi eb nak.
23Max yalon cham tu' axca ti':
—C'am tzet che na' yuj jun tu'; c'am chex xiwi. A Diosal e mam e yetok max aon aytok ch'en yul is ti' e coẍtal tu' junelxa. Ayin max in cha ch'en tumin max e yak' tojolok e trigo max e yi' tu', ẍi cham bay eb.
—Max lajwi tu', max yion eltek cham nak Simeón bay yul preso, cax max elol nak bay ayic' eb nak uẍtakejal tu'. 24Max ilaytok eb nak masanil yuj bay yatut José, max yak'on aej yet tx'ajil yakan eb, max ak'lay c'apax lobej is chej eb. 25Lajwi tu xin, max yionxac'al ajtek eb nak yulak is coẍtal sabalej ok yak' bay José yet ok apnok oc yet chuman; yujtol yojtakxa eb nak tol ok low eb yetok.
26Axa yet max apni oc José xin, max yak'on eb sabalej tu' bay, max ay nojan eb sat tx'otx' bay satak José. 27Max lajwi tu' cax max k'anlen cham bay eb nak, ta watx'c'ulalc'al ay eb, max yalon c'apaxok:
—¿Jantak yalon c'ul icham e mam max e yal ayin? ¿Iquis tom ec' cham? ẍi bay eb.
28Max ay nojan eb nak max yalon eb bay:
—A cham co mam tu' on, ayto ec'ok, watx'toc'al is c'ul cham, ẍi eb nak.
29Axa max yilon oc cham nak Benjamín is yuẍtak, nak junej is txutx yetok, max yaloni:
—¿A mi nak e yuẍtak tzunan unin max e yal ayin ti'? ẍi. A ton nak, ẍi eb. Yak'okab Dios watx'c'ulal eban, ẍi cham bay Benjamín.
30Max lajwi yalon axca tu', caw wal miman chi cam c'ul yin is yuẍtak tu', max oc pitz'naj yin is c'ul tol chi ok' yuj, axa toj lemnaj yul is cuarto yet chi ok' bay tu'. 31Yet max lajwi yec'tok is cusc'ulal tu', max tx'ajon el is sat, cax max eltek; max yaloni: Iekxa eltek co lobej tinani', ẍi cham.
32Jun is meẍa José tu' is tx'oklil. Tx'ok junxa meẍa bay max oc eb nak yuẍtak tu', cax tx'ok pax junxa meẍa bay chi low eb aj Egipto chi lowc'alta' yetok José tu'; yujtol a eb nak aj Egipto tu' ay yowalil ta junnej chi low eb nak yetok eb nak hebreo. 33A eb nak yuẍtak José tu' yin txolilal max yun yay chotjab eb nak yuj is chekbej José, atac'ala' is yabilal junjun eb, yujtol axca tu' max yut yalon José tu', nak babel, masantac'al nak tzunan unin. Toxac'al chi c'ayaj c'ul eb nak, cax chi yil-len oc ba eb. 34A loj ay bay meẍa José, a' max ak'lay bay eb. Axa pax bay nak Benjamín xin, oyebto bijan ec'ban yet nak max ak'lay yintak yet juntzanxa eb nak tu'; catatu' max low eb, c'al yuq'uena' eb yetok yin tzalojc'ulal.
Currently Selected:
Gn 43: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989