Ex 6
6
1Max tak'wi Jehová bay cham Moisés:
—Okto wal ela' tzet ok wut cham reyal Egipto ti'. Yetok wipalil cax ok ex bekon elok. Ayin ok wak' pural, cax ok ex yukten el yul is nación ti', ẍi Jehová.
Max iptzelay cham Moisés yuj Jehová
2Max k'anjab pax Jehová yetok Moisés:
—Ayin ton Jehová in. 3Max in tx'ox in ba bay Abraham c'al bay Isaac c'al bay Jacob yetok in bi, Dios Chi Je' Yuj Masanil; asan xin maj wak' yojtaknej el eb in bi tol Jehová in. 4Max in watx'nej in trato yetok eb, max wak' in ti' wak'on tx'otx' Canaán bay eb, a ton tx'otx' bay max ec'lej cajan eb yettax yalantok. 5A tinani' xin, mayal wabej tol caw wal ok'bal c'ul chi utlay eb in conob bay Egipto ti', caw wal chi etax eb yin mulnajil. Yuj wal tu xin, max tit yul in c'ul tol ay in trato yetok e yichmam. 6A tinani' xin chi toj al bay eb et israelal tu', tol tix wal max yut yalon Jehová ti': Ayin Jehová in, ok ex in colilok bay ayex oc yin mosejal ti', bay ok'bal ex c'ul yin mulnajil bay Egipto ti'; tol ok in tx'ox wal wipalil, cax ok waon oc mimek uchlejbail yiban jun conob ti'. Axca wal tu' ok yun ex in colon el yul is k'ab eb, 7cax chex waon oc in conobok; axa ex ayex ti' e Diosal in. Axca tu' ok yun e yojtaknen elok, tol ayin Jehová in, e Diosal in, chex in colcan el yul k'ab eb nak aj Egipto ti' bay ayex oc yin yailal yuj mulnajil. 8Cax chex wiontok bay sat tx'otx' tx'otx' bay max wak' in ti' wak'on bay Abraham, bay Isaac c'al bay Jacob; cax ayin Jehová in ti' chi wak' c'apax ayex, tol e yet ok yunej, ẍi Jehová, cachi.
9A masanil tzet max yal Cham, a' max yal cham Moisés bay eb conob Israel, palta c'am chi cha yab eb, yujtol caw wal ayoc eb yin somc'ulal yuj yail mulnajil. 10Lajwi tu xin, max yal pax Jehová bay Moisés:
11—Asi', al bay jun reyal Egipto tu' tol chi beklay el in conob yuj bay sat is tx'otx' ti', ẍi Jehová.
12Cax max tak'wi cham Moisés bay Jehová:
—Toltax wal c'am chi cha yab eb conob israel tzet chi wala', akxamwal cham rey, tom ok cha yabej, ilab tol c'am pax wal chi je' in k'anjabi, ẍi Moisés.
13Xan max yatok Jehová cham Moisés c'al cham Aarón k'anjab bay eb israel c'al bay cham rey, tzetbil tol ay chekbanilej bay eb tol chi yieltek eb eb conob Israel bay Egipto.
Is txolilal yichmam Moisés yetok Aarón
14Tix yoc is bi eb yajaw yin junjun conobal eb yinatil Israel: A eb is c'ajol Rubén is babel c'ajol cham Israel, a ton Hanoc, Falú, Esrom, c'al Carmi; a ton eb ti' yajaw xol is makquiltakil yinatil Rubén.
15A ton eb ti' is c'ajol Simeón, a ton Jemuel, Jamín, Ohad, Jaquín, Zohar, c'al Saúl is yune' jun ix aj Canaán; a ton eb ti' yajaw xol is makquiltakil yinatil Simeón.
16A pax Leví 137 abil max eq'ui. A is bi eb is c'ajol, chi el yich yin nak is babel, cax chi apni yin nak is lajubal, a ton Gersón, Coat, c'al Merari. 17A eb is c'ajol Gersón, a ton Libni, c'al Simei, atac'ala' is makquiltakil. 18133 abil max ec' Coat; axa is bi eb is c'ajol, a ton Amram, Izhar, Hebrón, c'al Uziel. 19Axa is c'ajol Merari, a ton Mahli, c'al Musi. A ton juntzan eb ti' is yajawil is makquiltakil yinatil Leví, yetokc'al is yuninal eb.
20A Amram max yi' yanab is mam chi yik Jocabed, a ton eb ay is yuninal Aarón yetok Moisés; 137 abil max ec' Amram tu'.
21A eb is c'ajol Izhar, a ton Coré, Nefeg, c'al Sicri.
22A eb is c'ajol Uziel, a ton Misael, Elsafán, c'al Sitri.
23Axa Aarón xin, max yi' Elizabet, is cutz'in Aminadab, yanab Naasón. Axa is yuninal eb ti': a ton Nadab, Abiú, Eleazar c'al Itamar.
24A eb is c'ajol Coré, a ton Asir, Elcana, c'al Abiasaf; a ton is makquiltakil yinatil Coré ti'.
25A Eleazar is c'ajol cham Aarón, max yi' is cutz'in Futiel a ton is txutx Finees. A ton eb ti' yajawil yayji yin makquiltakil yinatil Leví.
26Axa Aarón yetok Moisés chi binaj bay jun lista ti', a ton bay eb ti' max yal Jehová, tol a eb chi ion eltek eb israel yul yet Egipto yin txolilal. 27A ton eb max betic' k'anjab yetok cham reyal Egipto yet chi beklay eltek eb conob israel yuj.
Max cheklay Moisés c'al Aarón yuj Dios
28Max k'anjab Jehová bay Moisés bay Egipto, max yaloni:
29—Ayin ton Jehová in. Al bay cham reyal Egipto masanil tzet chi wal ayach ti', ẍi Cham.
30Max tak'wi Moisés axca ti':
—Mamin, caw c'am wal chi je' in k'anjabi, ¿tzet wal chi yun yaben cham rey tzet ok wala'? ẍi cham.
Currently Selected:
Ex 6: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989