Ex 5
5
Max k'anjab cham Moisés yetok cham Aarón bay cham rey
1A yet max lajwi yec'cantok juntzan tu xin, max toj cham Moisés yetok cham Aarón k'anjab satak cham reyal Egipto, max yalon eb cham:
—Mamin rey, axca wal ti' yalon Jehová co Diosal ayon israel on ti': Tol cha chatok in conob bay takin tx'otx' yet chin yion aj can eb yetok junok k'in, ẍi Dios, ẍi eb cham.
2Cax max tak'wi cham rey tu':
—¿Mactxel jun chi yik Jehová tu' yet chi wikej bay tzet chi yala', cax chin chaontok jun conob Israel ti'? Man wojtakok jun Jehová tu', xan c'am chin chatok eb, ẍi cham rey.
3Max yalon eb cham bay:
—A co Diosal ayon hebreo on ti' max tx'oxaj ba ayon; yuj tu' xan chaontok bay takin tx'otx' yet chi toj jak' co xajanbal bay Jehová co Diosal on, oxeb c'ual tec'banil bay ok on tok tu'. Ta c'am chon toji, axa talaj ok yunej chon yak'on cam Cham yuj junok yailal, ma yuj owal, ẍi eb bay cham rey.
4Cax max yalon cham rey:
—¿Tzet yuj xan tol che yiec' tiempo juntzan e yet conob ti' yin is mulnajil? Asek mulnajil. 5¿Tom c'am che yil xin tol xiwilxa eb e yet conob bay yul conob Egipto ti', cax che yion ec' is tiempo eb yin mulnajil? ẍi cham rey.
6A ton yet jun c'ual tu' max chekon cham eb yajawil, c'al eb nak caporal, max yalon bay eb:
7—C'amxa che yak' an ch'im is calok tz'otz'ew eb nak israel tu' axcac'alta' chi yunej, palta tol axa eb chi toj sayon yet. 8Cax ac'ala' bisil xan chi watx'nej eb axca yet yalantok. Yisajil eb nak chi oni, xan xiwil chi el yaw eb: Tol chon toj jak' co xajanbal bay co Diosal, ẍi eb. 9Aek oc jabokxa tz'akil mulnajil eb nak, yet watx' c'amxa is tiempo eb yaben juntzan lek'tial k'anej chi al-lay tu', ẍi cham rey tu'.
10Yuj tu xin, max toj eb egipcio ayoc yajawilok eb caporal c'al eb israel ayoc yin caporal tu' yalon bay eb mulnajwom:
—Mayal yal cham rey tol manxa ok ak'lay e ch'im. 11A tinani' ayexxa chi toj e say e yet che k'ana', palta ac'ala' is bisil tx'otx' xan ok e yak'a', ẍi eb.
12Axca tu' max yun saklem eb nak israel bay masanil yul yet Egipto sayon yakan trigo yet chi k'an eb nak q'uexelok an ch'im tu'. 13Caxc'al mi axca tu' max yunej, palta a eb yajawil eb caporal tu', ac'ala' bisil xan yowalil chi k'an eb, axca chi yak' eb yet chi ak'lay an ch'im bay eb. 14Cax chi mak'lay eb israel ayoc yin caporalil yuj eb ayoc yajawilal yin eb yuj cham rey, cax chi al-lay bay eb:
—¿Tzet yuj xan man tz'akanok che yitek tx'otx' xan yet ewi, c'al tinani' axcac'alta' che yut e yitek yet yalantok? ẍi eb yajaw tu'.
15Max toj eb nak caporal yal bay cham rey axca ti':
—¿Tzet yuj xan ok'bal c'ulxac'al chon ot ayon a chekbej on ti', mamin rey? 16C'amxa chi ak'lay an ch'im ayon yet chi oc xol co xan chi co watx'nej, tolab tz'akan chi jak' pax tx'otx' axca yet yalantok, cax chon mak'lay paxok; tokwal ayon ay pax co mul, ẍi eb.
17Max tak'wi cham rey:
—Ayex ti' toc'al isajtak ex ec'ok, xan che yala': Chon toj jak' co xajanbal bay Jehová, quex chi. 18Asek mulnajil, caxc'al ayex che say an ch'im che yaoc xol tx'otx' xan tu', asan tol ac'ala' is bisil tx'otx' che yak'a', ẍi cham rey tu' bay eb.
19Yuj tu xin, a eb nak israel ayoc yin caporalil tu', caw wal max tac c'ul eb nak, yujtol max al-lay bay eb nak, tol ac'ala' is bisil tx'otx' xan chi yak' eb junjun c'u. 20A yet max eltek eb nak yul is despacho cham rey tu xin, max chalen ba eb nak yetok cham Moisés c'al yetok cham Aarón, lanan yechbanelay eb nak yuj eb cham. 21Max yalon eb nak:
—Okxaab yil Jehová tzet ok ex yutej, yujtol ayex ay e mul xan tol a cham rey c'al eb ay yikbej yetok cham, caw wal chon yaj eb tinani'. Tolab ayex max e yak' ch'en espada bay eb nak cax chon is mak'on cam eb, ẍi eb.
Is txaj cham Moisés
22Max lajwi tu xin, max yalon cham Moisés yin is txaj:
—Mamin Jehová, ¿tzet wal yuj xan ec'om ya' chi yun eb conob ti'? ¿Tzet yuj xan max quin a chektek? 23Yettaxc'al max in jay k'anjab bay cham rey ti' oj, yelxac'al ok'bal c'ul chi utlay eb a conob ti' yuj cham, cax c'amtoc'al jabok chach colwaji, ẍi Moisés.
Currently Selected:
Ex 5: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989