2 S 20
20
Yuchnak aj bulnaj Seba eb conob
1Ay jun winak yelxac'al yob yin is tribual Benjamín, chi yik Seba. A jun tu' is c'ajol Bicri, a tu' ayic' bay Gilgal. A' max xuon is cacho, max yuchon aj bulnaj conob, max yaloni: Ayon ti' c'amc'al jalon jet, tamwal ay co satak yetok David jun c'ajol Isaí ti'. Tonek bay jatut co masanil ayon israel on ti', ẍi bay eb.
2Yuj tu' xan, max beklaycan cham rey David yuj eb yet israelal tu', axa tzakloj eb yintak Seba is c'ajol Bicri tu'. Axa pax eb soldado yin yinatil Judá xin, tzakanc'al eb yintak cham rey max titc'al eb bay ti a' Jordán masantac'al bay Jerusalén.
3A yet max jayoc cham rey David junelxa bay yatut bay Jerusalén, max yiontok eb xal lajonwan cab yistzil aycan taynemalok yatut, max cancan eb yuj bay jun na yet chi taynelay eb xal. Ac'al bay tu' max lotzelay eb palta c'amxac'al bay max way cham yetok eb. A bay tu' max makayc'alcan eb xal axca eb xal ix tol c'amxa yichamil, masantac'al max yal cam eb.
4Lajwi tu' max yalon cham rey bay Amasa:
—Awtej masanil eb winak yet Judá, yet wal cabej tinani' cax chach jayoc yetok eb cayti', ẍi cham rey.
5Yuj tu' max toj Amasa wajban oc eb, palta max ec' tiempo, maj jay axca wal c'ual max al-lay tu'. 6Axa yalon cham rey David bay Abisai:
—Tekan yelxac'al ok on yetnej Seba ti' yintak axca max yun Absalón. Yuj tu' xan ikbaj masanil eb in soldado, tzaklojan yintak, axa talaj chi yunej tol chi yak' c'ul juntzan conob tol ayoc is murallail, cax chi elaj ayon, ẍi.
7A masanil eb soldado yet cham Joab yetok eb cereteo c'al eb peleteo, a ton eb taynemal cham rey, yetok juntzanxa eb soldado caw wal jelan, max el eb bay Jerusalén, max toj eb yetok Abisai, yuj tzakloj eb yintak Seba. 8A yet max apni oc eb bay cawilal jun miman sat ch'en ay bay Gabaón, a tu' max eltek Amasa satak eb. Axa cham Joab ayoc is pichil yet owal, c'albil is nan yetok jun cinturón. Axa bay is tz'eyil tu', a tu' jekan aytok jun ch'en espada yul tz'umal. A jun tu' max ayc'ay c'otnajok yet max yak'on yip toji. 9A yet max yaon oc cham Joab is watx' k'ab yin xil is ti' Amasa yuj tz'ubon is ti', max k'anlen bay:
—¿Watx'c'al mi max yun elocok? ẍi bay.
10Palta a Amasa tu' c'am chi na yuj ch'en espada ibil oc yuj Joab tu', yuj tu' xan a cham Joab ayman max tektok ch'en yul is c'ul. Masanil yul c'ul max ay secnaj sat tx'otx'. Junocnej max yak' cham Joab tu', max cami. Lajwi tu xin, max tojc'al cham Joab yetok yuẍtak chi yik Abisai yintak Seba, is c'ajol Bicri. 11A junok eb soldado cham Joab max oc waan cawilal is mimanil Amasa tu', max yaloni:
—A mactxel ayoc yetok cham Joab c'al yetok cham rey David tzaklojokab yintak Joab tu', ẍi.
12Palta a Amasa xin, max canc'al can telan yul be xol is chiq'uil. A yet max yilon jun soldado tu' tol masanilxac'al anima chi ec' bay tu' chi oc waan yiloni, xan max jitzil ti' be tu', max yaontok jun k'ap yiban. 13A yet mayal yican el bay ti' be tu xin, max ec'tok masanil eb chi toj yintak cham Joab, yet chi toj saylay ec' Seba.
14A Seba tu' max ec' bay masanil is tribual eb israel masantac'al max apni oc bay Abel-bet-maaca. Axa masanil eb yinatil Bicri max wajnaj oc yuj, tzakanxa eb yintak max octok eb yul conob tu'. 15A yet max apni oc eb is soldado cham Joab bay Abel-bet-maaca, max watx'nen aj eb tx'otx' walubok bay yinlak murallail conob tu', yet chi oc eb yak'on owal yin. Masanil eb max oc yuchon ay jun muralla tu'. 16A bay tu' ay jun xal ix caw wal aj nabal max awjitac'al bay yiban murallail conob tu', max yaloni:
—Abek, abek tzet chi wala', elok yin e c'ul che yal bay Joab tol chi jitztek ba. Ay tzet ok wal bay, ẍi xal.
17A yet max jayoc cham Joab cawilal tu' max k'anlen jun ix tu' axca ti':
—¿Ach mi Joab ach tu'? ẍi bay.
—Ayin toni, ẍi cham Joab tu'.
Max yalon xal bay:
—Ab wal tzet yetal ok wal ayin a chekbej in ti', ẍi bay.
—Ti' chi wabej, ẍi cham Joab tu' bay xal.
18Axa yalon xal ix tu' axca ti':
—A yet payxa chi al-lay axca ti': A mac chi yochej chi yojtaknej junok tzet yetal, k'anlejokab yin Abel, ẍi; axca tu' chi yun watx'ji el junok k'anej. 19A co conobal ti' a ton jun conob watx', yikem yul co conobal ayon israel on ti', a ton jun conob ti' yelxac'al miman yelapnok. Palta ach ti' chi yochej a c'ul tol chak' lajwok. ¿Tzet yuj xan chi yochej a c'ul chak' lajwok tzet yetal tol yet Jehová yayji ocok? ẍi xal.
20Max yalon cham Joab axca ti':
—A jun tu' c'am chin na axca tu', c'am chin na tol chi wuchcan lajwok. 21Manak jun tu' chi co saya', palta a jun winak chi yik Seba, aj siquilal tx'otx' yul yet Efraín, a jun tu' max aj wan ajc'ulal yin cham rey David. Asan jun tu' che yak' yul in k'ab, cax chin el bay jun conob ti', ẍi cham.
—Ok co k'ok aytok is jolom ayach bay yiban muralla ti', ẍi jun xal tu' bay cham Joab.
22Max lajwi tu' max yalon xal bay masanil eb anima yin is yajnabalil, max tzoc'on el eb jolom Seba tu', max k'okon aytek eb bay cham Joab. Lajwi tu xin, max yalon cham Joab tol chi xulay trompeta yet chi el eb bay yin conob tu', xan max tojcan eb soldado bay yatut junjun, max meltzoj c'apax can cham Joab bay Jerusalén k'anjab yetok cham rey.
Eb is chekbej cham rey David
(2 S 8.15-18; 1 Cr 18.14-17)
23Caytu' max yun cancan cham Joab yajawilal xol masanil eb soldado yet israel, axa pax Benaía is c'ajol Joiada, a yajaw yayji yin eb cereteo c'al yin eb peleteo. 24Axa pax Adoram chi ilon mulnaj eb tol yowalil chi mulnaji, axa Josafat yajtz'ib cham rey yayji ocok, a ton is c'ajol Ahilud. 25Ac'ala' Seva, a' chi tz'iben yabixal tzet chi yun cham rey. A pax Sadoc yetok Abiatar, a eb tu' sacerdote yayji eb. 26A pax Ira, aj conob bay Jair, a jun tu' sacerdote yayji oc bay cham David.
Currently Selected:
2 S 20: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989