2 S 19
19
1-4Max yaben eb anima tol chi ok' cham rey David, c'al tac is c'ul yuj Absalón is c'ajol, yuj tu' xan, a jun tzalojc'ulal yuj max je' yuj yak'wi owal, max meltzojcan oc yin cusc'ulal. A eb soldado max bet yin owal tu' yinxac'al q'uixwiltakil c'al ewantakil max yun jayoc eb nak bay conob tu' axcaxac'al tol max el eb bay eb ajc'ul. Axa pax cham rey David xin, makan el sat cax chi el yaw: ¡Ay ach in c'ajol Absalón! ẍi. 5Axa yet max yaben Joab, max toj il-lay cham rey yuj bay yul is cuarto tu', max yalon axca ti':
—A tinani' lanan aon oc eb a soldado yin q'uixwilal, max lajwi ach colon el eb yetok onenal c'al yetok eb estzil. 6Axa tinani', lanan a tx'oxon elok axca tol c'am yelapnok eb ayoc yin opiso ti' c'al eb soldado yul a sat, axca wal tol yelxac'al chi cus a c'ul yin mac chach yajoni, cax c'am yelapnok yul a sat eb chach ocheni. A tinani' chi nachaj el wuj, yel mi watx' chabej ta a Absalón tu' maj camok, axa ayon ti' co masanil max on cami. 7Yuj tu xin, elantok cax chak'on mimanil is c'ul masanil mac ayoc etok, yujtol wojtak wali tatol man ok ach eltok, c'amxa junok mac ayic' etok cax ok k'inibok ajok. Caw wal yelxac'al yob tzet ok jay eban tinani' yintakc'al tzetak max jay yettax ach'ej ach ocok, ẍi Joab.
8Yuj tu' xan max eltok cham rey David, cax max bet ay chotan bay ti' puertail conob. A yet max yaben masanil eb ayoc yetok, max toj eb tx'oxon ba bay satak.
Meltzojnak cham rey David bay conob Jerusalén
Axa pax eb israel ayoc yetok Absalón xin, yinxa elilal max yun paxtok eb bay yatut. 9Masanil eb tribual Israel chi yal eb yin junjunal axca ti': A cham rey max on colon yul k'ab eb ajc'ul ma wal axca eb filisteo, axa tinani' xin, elilal chi yun bay is c'ajol Absalón. 10Axa pax Absalón max jaoc co reyalok xin, mayal cam pax nak bay xol owal tu'. ¿Tzet chi jechbanej xan c'am chi ji paxtek David co reyalok? ẍi eb.
11A masanil juntzan k'anej chi yal eb israel tu', max al-lay yab cham rey David. Yuj tu' xan max chektok cham al-lay bay eb sacerdote Sadoc c'al Abiatar tol k'anlej el bay eb yicham winakil conob Judá tzet yuj xan chi ec' tiempo yilaytek cham rey yuj eb bay despacho. 12K'anlejek bay eb tzet yuj xan puralxac'al chi yal eb yet chin meltzoj bay in despacho junelxa. Nabaxac'al tol wican in ba yetok eb nak cax junej tribual on, quex chi bay eb, ẍi. 13Maxto yal David tol chi toj al-lay bay Amasa: Axca ach ti' jicanto co ba etok, yuj tu' a yet ok beytok ti', ach chach oc is yajawilok eb soldado is q'uexelok Joab. Ta c'am chi yun tzet chi wal ti', jayokab oc yailal wiban yuj Dios, ẍi David.
14Xan max tzalojbi aj c'ul eb aj Judá, tol max junanej ba is nabal eb, max yalontok eb bay cham rey tol chi meltzojtek yetok masanil eb ayoc yin opiso yetok. 15Maxc'al wal apni oc k'anej, max tit cham rey David, max jayoc bay ti a' Jordán. Ac'ala' c'apax eb aj Judá max jayoc eb bay Gilgal yet chi chalay ec'tek cham yuj eb bay yul a' Jordán tu'. 16Axca tu' c'apax Simei is c'ajol Gera yin is tribual Benjamín aj Bahurim, ayman max oc xol eb aj Judá, max ul chalay David yuj, 17tzakan oc mil soldado yinatil Benjamín yintak. Ac'ala' c'apax Siba chekbej yayji oc bay is yinatil Saúl, tzakan oc olajonwan is c'ajol yintak, yetok junc'alwan is chekbej, babel max apni oc eb ti a' Jordán satak cham rey David tu'. 18Ayman max k'axpoj ec'tok eb yul a' tu' yet chi toj yiec'tek eb, eb xal yistzil c'al eb yuninal cham rey tu', cax max colwaj yin tzanc'al tzet yetal is cawxinakil. A yet toxa wal chi k'axpoj ec' cham rey bay yul a' Jordán tu', max apni oc Simei, cax max ay nojan satak. 19Max yalon axca ti':
—Chin tewi ayach mamin rey, tol chak' mimanc'ulal win yet c'amxa cha natek in mul ayin a chekbej in ti' max waoc ayach, yet max ach el bay Jerusalén. C'amokab chi tit owal win. 20Chi wojtaknej elok tol yob max wut in ba, yuj tu' xan a yin masanil is yinatil José, ayinc'al babel max in jay ul ach in chaon mamin rey, ẍi Simei tu'.
21Yuj tu' xan max yal Abisai is yune' xal Sarvia:
—¿Tom man mojok cam jun Simei ti', yujtol caw wal yob max yal yin cham rey sic'bil el yuj Jehová? ẍi.
22Cax max tak'wi cham rey David axca ti':
—¿Tzet wal e yoc ayex yune' ex xal Sarvia ti' yin jun k'anej ti'? Manchakxac'al e som in c'ul. A tinani' wojtakxa tol ok in oc pax reyalok eb wet israelal, yuj tu' c'am junok mac chi je' cam yul co conobal ti' tinani', ẍi cham. 23Max yalon bay Simei:
—Chi wak' in ti' bay Jehová tol c'am chach cami, ẍi.
24Ac'ala' c'apax Mefi-boset is yitxiquin Saúl, max eltek chaon cham rey. Yettaxc'al max toj cham rey tu' elok, masantac'al yet max meltzoj yin watx'c'ulalil, c'am wal junelok max tx'aj Mefi-boset tu' yakan, tamwal xil is ti' majc'al tzukilok, cax majc'al q'uex is pichil. 25A yet max chalen ba eb bay Jerusalén, max yalon cham David bay Mefi-boset:
—¿Tzet yuj xan maj ach tok wetok? ẍi bay.
26Max tak'wi Mefi-boset:
—Mamin rey, yujtol man wal watx'ok yayji oc wakan, xan max wal bay in chekbej Siba tol chi yaoc tz'um no in burro cax chin oc yiban no', axa in toj etok tu' waloni, palta maj yikej. 27¿Tzet xam max naaj yalon aj win ayach? Palta axca wal junok yángel Dios, caywal tu' ayji mamin rey. Yunokab tzet chi cha a c'ul. 28Caxc'al masanil is yinatil wichmam moj tol mayal ak'lay camok, palta ach ti' max in awtej low etok bay a meẍa, xan c'amxa tzet watx' waloni, ẍi Mefi-boset. 29Max yalon cham rey bay axca ti':
—C'amxa tzet watx' chi jal xin, mayal in na' asan tol cha pojay nan tx'otx' tx'otx' en yetok Siba, ẍi cham rey.
30Max tak'wi Mefi-boset:
—Canokabcan Siba yin tx'otx' masanil, asan tol watx' max yun a meltzoj bay a despacho junelxa, ẍi bay.
31Axa pax Barzilai aj Galaad, max tittac'al bay Rogelim cax max ul yilon k'axpojcan ec'tok cham rey David c'al tak'encanok. 32Caw wal icham winakxa cham Barzilai tu', ayxa 80 abil is k'inal. A yet max ayji ec' cham rey David bay Mahanaim max bet yak'c'al tzet chi lolay bay cham rey tu', yujtol caw wal beyom cham. 33Max yalon cham David bay axca ti'.
—Ton wetok bay Jerusalén, ayin ok ach in lotzej, ẍi bay.
34Max tak'wi cham Barzilai:
—Jayebxanej abil iquis in, cax okto wal in tok etok bay Jerusalén. 35Ayxa 80 abil in k'inal, c'amxa chi wab chial tzet chi co lo' c'al tzet chi juq'uej, c'amxa chi je' wiloni ta watx' ma c'amak, cax c'amxa chi wab bitni eb nak chi bitni c'al eb ix chi bitni. Toxac'al mi chin oc tz'akilok a bilc'ulal mamin rey. 36Asannej tol chin k'axpoj ec'tok yul a' Jordán ti' cax chin toj janic'okxa etok, cax chi wilon a tojcanok. ¿Tzetto wal yuj xan chala' tol chin toj etok bay Jerusalén yuj is paktzebalok in watx'c'ulal? 37Yuj tu' xan elok yin a c'ul, chin a cha meltzoj bay watut, asanxanej tol chi wechbanej in cami, cax ok in muklay bay mukan in mam c'al in txutx. Asan wal xin, ay jun a chekbej chi je' eontok mamin rey, a ton nak in c'ajol Quimam ti', itok cax chak'on a watx'c'ulal tu' yin nak, ẍi cham Barzilai.
38Max yalon cham rey David:
—Tokab nak Quimam tu' wetok xin, ta ẍi a c'ul. Yunokab axca tu'. Tzanc'al tzet cha k'ana' ok wikej ayach, ẍi cham.
39Masanil eb ajun yetok cham max k'axpoj ec'tek bay yul a' Jordán, axa yet max k'axpoj cham rey David xin, cax max tz'uboncan el is ti' cham Barzilai, max tak'licanok cax max meltzoj cham Barzilai tu' bay yatut. 40Max toj cham rey bay Gilgal, tzakan oc nak Quimam yetok masanil eb aj Judá, cax tzakan c'apax nanxa eb Israel.
41Masanil eb conob Israel max bet ilon cham rey, max yal eb bay axca ti':
—¿Tzet yuj xan tol asan eb jet conob yinatil Judá max ach iontek, max ach yion ec'tek eb bay yul a' Jordán yetok eb xal etbi c'al yetok eb oninal, c'al yetok masanil eb a chekbej? ẍi eb.
42Masanil eb aj Judá max tak'wi bay eb yet israelal eb tu':
—Yujtol a cham rey ti' jicantoc'al co ba yetok, xan c'am chi je' chi tit e yowal yuj jun ti'. ¿Tokwal tol a yuj cham rey ti' cax ok on lowok, tokwal ay janic'ok tzet yetal ok ji' yin? ẍi eb.
43Max tak'wi eb yet israelal eb tu' bay:
—Caxc'al mi axca tu' palta ayon ti' lajoneb tribual ec'ban on e yintak ayex ti', yuj tu' xan caw wal ay jalon jet yin cham rey David ti' e yintak. ¿Tzet yuj xan chon e yintaknej elok? ¿Tokwal maonnak ayon ti' max jal yin babelal tol chi meltzojtek co reyal? ẍi eb.
Palta xin, a eb aj Judá yelxac'al ya' tzet max yal eb yintak juntzanxa yet israelal eb tu'.
Currently Selected:
2 S 19: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989