Hebrey 13
13
Alcye tu'n kbinchante tu'n ttzalaj Dios k'ij
1Cucx tu'n tten cyc'ujlalile cyxolxe porque cyerman cyibe. 2Mi'n tzic' tna'l cyu'ne tu'n cyk'onteye cyposad xjal tuc'ix ju at tajben cye, porque at junjun cybincha jlu, xi cyk'o'n cyposad anjel ex minti' ba'n cyu'n ka anjel ke.
3Cyna'ntze keju ate' tuj pres, ic tza'n ax keye ate'ye tuj pres junx cyuc'il; ex cyna'ntze keju in che yajlanjtz, ic tza'n ax keye in che yajlanjtze.
4Nimanxwit ju mejeble'n cyu'n cycyakil, ex tu'n mi'n tcnet jun cyyaẍ, porque jun tz'il jlu; porque akeju yaẍil ex ke aj pajil cbel cycastiw tu'n Dios.
5Mi'n pon cyc'u'je ti'j pwak; che tzalaje ti'j ch'in at cyeye ja'lo; porque in tma'n Dios: Mlay cyaj ncoline, ex mlay cyaj nk'o'ne. 6Cyja'tzun in ke'xix kc'u'j tu'n t-xi kma'n:
Ate Kman onil weye; mlay chin xobe. Minti' jun mya ba'n jacu cybincha xjal wi'je.
7Cyna'ntze ke nejenel e ten cyxole, akeju e k'mante tyol Dios cyeye; che ximane ti'j cyak'unben ex tza'n tten japun baj cychwinklal, ex tenx cyocslable ic tza'n cye.
8Axte Jesucrist ew, ex ja'lo, ex te jumajx. 9Mi'n txi cyk'on cyibe tu'n cyxi k'i'ne tuj junxilchak xnak'tzbil mya ba'n; porque ba'n tu'n tcyuwset kanmi tu'nju t-xtalbil Dios; mya tu'nju ley banin ti'j alcyechak chibj ba'n t-xi' ku'n ex alcye mya ba'n; porque minti' jun ba'n o cycamba keju o ke' cyc'u'j ti'j ju ley lu.
10At jun ke kaltar, aju minti' cyoclen pal ti'j tu'n t-xi cychyo'n aju chojbil in cub patit tibaj, akeju pal in che ajben tuj ja xbalun te nabl Dios ojtxi. 11Porque aju cychc'el alumaj nno'cx k'o'n tuj Lugar Mas Xjanxix tu'n tnejel pal te chojbil il, atzun cyximlal in cub patit ti'jxi campament. 12Cyja'tzun, ax icx te Jesús cyim ti'jxi tnam tu'n cyel pa'n ke xjal tu'n tu'ncu tchc'el, tu'n cyajben o'cx te Dios. 13Ko extzun tuc'il Jesús ti'jxi campament, tzic'xcu ku'n aju yasbil ke tu'n tlaj, ic tza'n te ic'x tu'n. 14Porque minti' jun ktanmi tzalu te jumajx, nok o'cx in ko ayon ti'j ju ktanmi ctzajel yec'un. 15Cyja'tzun, cucx tu'n tjaw knimsa'n tbi Dios nok tu'n Jesucrist, ic tza'n jun oyaj tu'n t-xi kk'o'n te; atzunju yol in tma'n ktzi' tu'nju in jaw knimsa'n tbi. 16Ex mi'n tzic' tna'l cyu'ne tu'n cybinchanteye aju ba'n ex tu'n cyoninte cyibe cyxolxe; porque ate jlu jun oyaj in xi cyk'o'ne te Dios in tzalaj ti'j.
17Cynimanxe ke nejenel cyeye, ex cybinxe cycawbil; porque atzun ke cwentil cyeye tu'n mi'n cyel tzpete, ba'n cyu'n atzun ke che k'ol tajlal twitz Dios. Cynimanxe tu'ntzun cycwentin tuj tzalajbil ex mya tu'n cybisun; porque ka ma che bisun tu'nju minti' in xi cynimane, mlay cycambaye ch'in ba'n icju.
18Che na'ne Dios ki'je, porque k'ukl kc'u'je ti'j in kbincha'ne ba'n ic tza'nx in tma'n kanmiye, kajbile tu'n kbinchanteye aju ba'n tuj tcyakil. 19Pero chin cubsalxixe cywitze tu'n cyna'ne Dios wi'je, tu'ntzun npon naje juntl maj cyuc'ile.
In kaninjtz t-xtalbil Dios cyibaj ocslal ex in che k'olbenjtz
20Ate Dios k'olte kmojbabl kib, ex tu'n Dios jatz ank'in Kajaw Jesús cyxol cyimni, ate Jesús Pastor cyi'j ẍne'l ex ma' toclen, aju tchc'el oc te cyuwsabl teju yol ma cyaj bant ti'j tu'n Dios te jumajx. 21Awt Dios k'onte cynable tuj tcyakil ak'untl ba'n, tu'ntzun cybinchanteye aju tajbil, ex ax ck'olte kipumal tu'n kbinchante aju ba'n tuj twitz, nok tu'n Jesucrist. Nimanxwit ju tbi tuj tcyakil tabk'iyil te jumajx. Icxwitju.
22Chin cubsale cywitze erman tu'n tten cypasense tu'n t-xi cybi'ne ju yol lu te k'obl cynable; porque mya nim yol ma txi ntz'ibane cyeye. 23Ba'n tu'n cybinteye, ma tzokpet kerman Timotey; ka ma tzul naj, junx ko xe'le tuc'il tu'n kpone que'yil cyeye.
24Cyk'onxe jun k'olbebl cye cycyakil nejenel ate' cyxole ex cye cycyakil ocslal. Ke ocslal tuj Italia in che'x k'olbe'ne cyu'n.
25Tenwt t-xtalbil Dios cyuc'ile cycyakile. Icxwitju.
Currently Selected:
Hebrey 13: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993