PĀ GƏ̄ 19
19
Kɔsə gɔn yā Nə́ɓā ō Ndū najə̄ yān ō
1Pā kə́ kem makətūbə̄ yā ngār yā gōsə̄ gə̄ tə́. I pā yā Dabid.
2Dɔ rā̰ ɔjə i kɔsə gɔn yā Nə́ɓā kə̄ ndágá,
no rā̰ ɔjə i yá̰á̰ ń Nə́ɓā rāā ní kə̄ ndágá.
3Loo kə́ kadaá ənī gotə yá̰á̰ ń Nə́ɓā rāā ní adə̄ loo kə́ kadaá madə̄n oō ō,
loo kə́ ndɔ̄ɔ́ ɔjə madə̄n adə̄ ger̄ ō.
4I gotə najə̄ kə́ kənī alé, kum najə̄ gə̄ gətóon̄ tū tə́ ō.
Deē oō kōōdə́ aĺ ō.
5Banī ndūdə́ əsō gō naā tə́ ō, taā loo dɔ nang tə́ malang ō.
Deē ra i ta ngóy dɔ nang tə́ gə̄gē anī a oō najə̄ kɔr̄də́ ní.
Nə́ɓā udə kújə tandā nú tām̄ yā mbang tə́.
6Kə ndɔ̄í anī mbang əɓa.
Teē tītə̄ ngaa dəyá̰ kijə kə́ teē kújə ɓīīn tə́ kə̄ ndágá beē.
Teē tītə̄ nge rāā go̰ ngɔ̄də̄ kə́ rāā walya ngɔ̄də̄ ń a rāā yā ka̰ȳ ní beē.
7Ni teē ta ngóy dɔ rā̰ kə́ dām̄ kə́rēý tə́,
njə̄rā bátə́ ugə̄ ta ngóy dɔ rā̰ kə́ dām̄ kə́ noō tə́ ō,
yá̰á̰ kə́ kəngān ɔdən aĺ gətóo ō.
8 Ndū najə̄ yā Kɔ́ɔ̄ɓē majə ɔtə̄ kə taá,
rāā adə̄ deē tél ajə gogə́.
Yá̰a̰ gə̄ ń Kɔ́ɔ̄ɓē əda ní i yá̰á̰ kə́ rɔ̄kum gə̄,
rāā adə̄ de kə́ mbóo tél de kə́ ngáā.
9Yá̰a̰ gə̄ ń Kɔ́ɔ̄ɓē ra kə deē ta rāā ní i yá̰á̰ kə́ gōtə́ gə̄,
ā əlan̄ rɔ̄nel̄ kem deē tə́.
Gō míndə gə̄ ń Kɔ́ɔ̄ɓē əda kadə̄ yā rāā ní
i yá̰á̰ kə́ unjə̄ njáý njáý gə̄,
a rāān̄ kadə̄ kum deē a̰a̰ loo rá ráńg.
10Ɓōĺ ndíĺ Kɔ́ɔ̄ɓē i yá̰á̰ kə́ majə ō,
to ngándáńg kə dɔ ɓāl̄ gə̄ ō.
Ndū gə̄ ń Kɔ́ɔ̄ɓē ra dɔ tə́ ní i ndū kə́ rɔ̄kum gə̄,
i ndū kə́ gōtə́ gə̄ malang.
11Adə̄ nel̄ kem de gə̄ ngá̰ý tɔȳ lɔ́r,
tɔȳ dūbə̄ lɔ́r kə́ unjə̄ njáý njáý.
Adə̄ nel̄də́ ngá̰ý tɔȳ yibə̄ tejə, tɔȳ yibə̄ tejə kə́ kijə.
12Kɔ́ɔ̄ɓē, mā nge kəla yāí m̄-ger̄ yá̰a̰ i kə ta kūl̄də́ ō,
rāān̄ seḿ ngá̰ý dan ń m-ún gōdə́ ní ō.
13I náā n kumən teē dɔ yá̰á̰ kə́ rāā gō ger̄ aĺ tə́ ní?
Ī-māȳ rɔ̄í dɔ yá̰á̰ kə́ gōtə́ aĺ ń m̄-rāā ba m̄-ger̄ alé ní tə́.
14Ɔ̄r̄ nge kəla yāí kɔ̄ɔ́ dan ngé kɔjə rɔ̄də́ gə̄ tə́.
Ī-rāā ādə̄ asən̄ yá̰a̰ rɔ̄n tə́ alé.
Ɓá anī najə̄ a gətóo dɔn tə́ ō, deē a ɓār̄ rī majaĺ kə́ ngá̰ý dɔn tə́ aĺ ō.
15Kɔ́ɔ̄ɓē, mbal̄ yāḿ, nge rɔ̄ɔ̄ dɔḿ tə́,
ādə̄ najə̄ gə̄ ń teēn̄ taḿ tə́ ō, ngé gə̄ ń m̄-yṵ́r̄də́ kemḿ tə́ ō ní,
əsōn̄ kumií.
Currently Selected:
PĀ GƏ̄ 19: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.